༄༅། །བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨིན་ཌོ་ནེ་ཤི་ཡཱ་དང་། མ་ལེ་ཤི་ཡཱ། འབར་མ། ཤྲི་ལང་ཀཱ། ཐའེ་ལེནྜ་བཅས་ཀྱི་གནས་བརྟན་སྡེ་པའི་རྗེས་འབྲང་པ་གཙོ་བོར་དམིགས་ཏེ་ཕྱི་ལོ་ ༢༠༢༡ ཟླ་ ༡༢ ཚེས་ ༡༧ ནས་ ༡༨ བར་ཉིན་གྲངས་གཉིས་རིང་གི་དྲ་ལམ་བརྒྱུད་མདོ་དྲན་པ་ཉེར་བཞག་གི་བཀའ་ཆོས་ལེགས་པར་མཇུག་སྒྲིལ་མཛད་ཡོད།
དེ་ཡང་ཕྱི་ཚེས་ ༡༨ ཉིན་གྱི་སྔ་དྲོ་ཆུ་ཚོད་ ༨ ཙམ་ལ་མགོན་པོ་གང་ཉིད་མཆོག་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་མཇལ་འཕྲད་ཁང་དུ་ཆིབས་སྒྱུར་གྱིས་བཀའ་སློབ་སྩལ་དོན། དེ་རིང་བཀའ་ཆོས་ཉིན་གཉིས་པ་རེད། སངས་རྒྱས་ཀྱི་བསྟན་པ་ལོ་ལྔ་སྟོང་གནས་རྒྱུ་ཡིན་པ་གསུངས་ཡོད། ད་ལྟ་ལོ་ཉིས་སྟོང་ལྷག་ཕྱིན་ཟིན་པ་རེད། ཆོས་ལུགས་མང་པོ་ཡར་རྒྱས་འགྲོ་བ་དང་མར་རྒུད་འགྲོ་བ་ཡོང་གི་ཡོད། སངས་རྒྱས་པའི་ཆོས་འདི་ཕལ་ཆེར་ཧ་ཅང་བརྟན་པོར་གནས་འདུག ལྷག་པར་དེང་སང་ནུབ་ཕྱོགས་པའི་ཡུལ་གྲུའི་ནང་དང་། དེ་སྔ་སངས་རྒྱས་པའི་ཆོས་མེད་སའི་ཡུལ་གྲུ་ཁག་གི་ནང་དུའང་དོ་སྣང་བྱེད་མཁན་ཡོང་གི་འདུག འདི་ལྟ་བུའི་དུས་ཚོད་ལ་ལོ་སྟོང་ཕྲག་རིང་བཅོམ་ལྡན་འདས་ཀྱི་རྗེས་འབྲང་རྣལ་མ་ཡིན་པ། ང་ཚོས་ཕན་ཚུན་གྱི་གནས་ཚུལ་ཤེས་པའི་ཐོག་ནས་ཐུན་མོང་གིས་བཅོམ་ལྡན་གྱི་ཆོས་ཚུལ་འདི་འཛམ་གླིང་ལ་ད་ལྟའི་བར་གནས་ཡོད་པ་མུ་མཐུད་གནས་པ་དང་། བར་སྐབས་ཉམས་པ་རྣམས་ཉམས་པ་སོར་ཆུད་ཐུབ་པ་ཞིག་དགོས།
དཔེར་ན། རྒྱ་ཧོར་བོད་གསུམ་གྱི་ཡུལ་གྲུ་ཁག་མང་པོ་ཞིག་ཏུ་བར་སྐབས་བསྟན་པ་ཏོག་ཙམ་ཉམས་ཡོད་པ་དེ་དག་ཉམས་པ་སོར་ཆུད་དང་མི་ཉམས་གོང་འཕེལ་ཡོང་ཐུབ་པ་ཞིག་ལ་ངོས་ཀྱིས་སྨོན་ལམ་རྒྱག་གི་ཡོད་ལ་ཆོས་གྲོགས་རྣམ་པ་ཚོས་ཀྱང་དེ་དགོངས་པར་བཅངས་རོགས། དེ་མིན་དེ་སྔ་སངས་རྒྱས་པའི་ཆོས་དང་འབྲེལ་བ་མེད་མཁན་ཚོས་ཀྱང་སངས་རྒྱས་པའི་ཆོས་ནང་སེམས་ཁམས་རིག་པའི་སྐོར་དང་། ལྟ་གྲུབ་ཀྱི་སྐོར་ཧ་ཅང་རྒྱ་ཆེན་པོ་དང་གཏིང་ཟབ་པོ་ཡོད་སྟབས། ཆོས་དད་ཡོད་མེད་ལ་མ་ལྟོས་པར་དོ་སྣང་བྱེད་མཁན་ཡོང་གི་ཡོད། འདི་ལྟ་བུའི་དུས་ཚོད་ལ་ང་ཚོ་བཅོམ་ལྡན་འདས་ཀྱི་རྗེས་འབྲང་གཅིག་མཚུངས་ནམ་རྒྱུན་བཤད་སྟངས་ལྟར་བྱས་པ་ཡིན་ན་པཱ་ལིའི་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་ཅེས་ཡོད་པ་ཚོས་ཕན་ཚུན་འབྲེལ་བ་བྱེད་རྒྱུ་གང་ཐུབ་ཤུགས་ཆེ་རུ་གཏོང་དགོས།
སྐབས་འགར་ང་ཚོ་འབྲེལ་བ་ཉུང་དྲག་པ་ལྟ་བུ་འདུག མ་འོངས་པར་པཱ་ལིའི་ཆོས་བརྒྱུད་དང་ལེགས་སྦྱར་གྱི་ཆོས་བརྒྱུད་དབར་བགྲོ་གླེང་བྱེད་རྒྱུ་བྱུང་ན་ཕན་ཐོགས་ཏན་ཏན་ཡོང་གི་རེད། རྡོ་རྗེ་གདན་དུ་ཐའེ་ལེནྜ་ཡི་བསྟི་གནས་ཆུང་ཆུང་ཞིག་ཡོད་པ་རེད། ངོས་རང་དེར་ཐེངས་ཁ་ཤས་ཕྱིན་པ་ཡིན། དེ་ལྟར་ཆོས་བརྒྱུད་གཉིས་ལྷོད་ལྷོད་བྱས་ཏེ་འབྲེལ་བ་བཟང་དུ་འགྲོ་ཆེད་བགྲོ་གླེང་ཞིག་བྱུང་ན་ཏན་ཏན་ཕན་ཐོགས་ཡོང་གི་རེད། ཅེས་བཀའ་སློབ་སྩལ་བ་དང་། དེ་ནས་དྲན་པ་ཉེར་བཞག་གི་མདོའི་ཆོས་འབྲེལ་དང་དྲི་བ་ཁག་ལ་བཀའ་ལན་སྩལ་ཏེ་ཉིན་གྲངས་གཉིས་རིང་གི་ཆོས་འབྲེལ་ལེགས་པར་གྲུབ་ཡོད་པ་བཅས། །
