༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༥ རེས་གཟའ་ལྷག་པ་ཉིན་གྱི་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་བཞུགས་སྒར་༸རྒྱལ་བའི་ཕོ་བྲང་དུ་གཟིམ་ཆུང་མཇལ་ཁ་སྩལ་ཡོད།

དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཐེངས་འདིའི་གཟིམ་ཆུང་མཇལ་ཁའི་སྐོར་གསར་འགོད་པར་གསུང་དོན། ཏོག་དབྱིབས་གཉན་རིམས་ཀྱིས་རྐྱེན་པས་ལོ་གཅིག་དང་ཕྱེད་ཙམ་རིང་༸རྒྱལ་བའི་ཕོ་བྲང་དུ་གཟིམ་ཆུང་མཇལ་ཁ་མཚམས་འཇོག་གནང་ཡོད། ད་རེས་མཇལ་ཁ་ཐོག་མ་དེ་སྲིད་སྐྱོང་ལ་སྩལ་བར་བཀའ་དྲིན་ཆེ་ཞེས་ཞུ་རྒྱུ་ཡིན། བར་ལམ་དྲ་རྒྱ་བརྒྱུད་མཇལ་ཁ་ཐེངས་བཞི་ཐོབ་པ་རེད། ད་རེས་དངོས་སུ་མཇལ་ཁ་ཞུ་རྒྱུ་བྱུང་བ་ཧ་ཅང་སྐལ་པ་བཟང་པོ་བྱུང་། 

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་པ་གང་ཡིན་པ་དེ་དག་སྙིང་ལ་བཅངས་པའི་ཐོག་ནས་ལས་ཀ་བྱེད་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད་སྟབས། དམ་བཅའ་དེ་དག་མ་དོར་བའི་ཐོག་ནས་བོད་སྤྱི་དང་མི་མང་གི་ཁེ་ཕན་སླད་མུ་མཐུད་ལས་ཀ་བྱེད་རྒྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་པ་ཙམ་གྱིས་སྐུལ་འདེད་ཡོང་གི་འདུག་ཅེས་སོགས་གསུངས། །