༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༦ ཉིན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཌོལ་ (Bob Dole) མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་གསན་པར་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ཨེ་ལི་ཛེ་བྷི་ཐི་ཌོལ་ (Elizabeth Dole) ལགས་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཌོལ་མཆོག་ནི། ཨ་རིའི་རྒྱལ་ས་ཝ་ཤིན་ཊོན་དུ་ཡོད་པའི་ཨ་རིའི་གྲོས་ཚོགས་གོང་མའི་འཐུས་མི་ཁྲོད་ནས་ངོས་ལ་རྒྱུས་མངའ་ཆེ་ཤོས་གྲས་ཤིག་ཡིན། ནམ་རྒྱུན་དམ་པ་ཁོང་དང་མཇལ་འཕྲད་བྱུང་སྐབས་ཁོང་གིས་མི་མང་ཉམ་ཐག་དང་། རང་དབང་དང་རིག་གཞུང་མི་ཉམས་རྒྱུན་འཛིན་སླད་འཐབ་རྩོད་བྱེད་བཞིན་པའི་བོད་མི་རྣམས་ལ་དངོས་གནས་དྲང་གནས་བྱམས་སྐྱོང་གནང་གི་ཡོད་པ་ངོས་ཀྱིས་ཤེས་རྟོགས་བྱུང་། དམ་པ་ཁོང་བོད་མི་མང་གི་གྲོགས་པོ་ཞིག་ཡིན།

ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཌོལ་མཆོག་གིས་ལོ་ངོ་བཅུ་ཕྲག་ཁ་ཤས་རིང་མི་མང་ཆེད་དུ་བློས་བཏང་གིས་ཞབས་འདེགས་ཞུས་ཏེ་མི་ཚེ་དོན་དང་ལྡན་པ་ཞིག་བསྐྱལ་ཡོད། སྐུ་ཞབས་བྷོབ་ཌོལ་མཆོག་ངོས་ཀྱིས་ཧ་ཅང་བརྩི་བཀུར་ཞུ་སའི་ཨ་རིའི་ཆེས་རིན་ཐང་ཆེ་བའི་རང་དབང་དང་། འདྲ་མཉམ། དྲང་བདེན་བཅས་ཀྱི་སྐུ་ཚབ་ལྟ་བུ་མཚོན་གྱི་ཡོད་པ་དང་། དམ་པ་ཁོང་སྒེར་གྱི་ངོས་ནས་ཕྱག་རོགས་རྣམ་པ་ཚོ་དང་ལྷན་དུ་གནད་དོན་བྱེ་བྲག་པའི་ཐོག་དགོངས་ཚུལ་མ་མཐུན་པ་བྱུང་སྐབས་འགྲོ་བ་མི་གཅིག་གྱུར་ཡིན་པའི་འདུ་ཤེས་གཞིར་བཞག་ཐོག་མིག་དཔེ་བསྟན་ནས་ཕན་ཚུན་བརྩི་བཀུར་ཞུས་གནང་གི་ཡོད། ཅེས་འཁོད་ཡོད།

མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདས་པོ་དམ་པ་དེ་ཉིད་ཀྱིས་གཙོས་ཤུལ་ལུས་ནང་མི་སོགས་ལ་ཐུགས་སྨོན་མཛད་ཡོད་པ་བཅས།།