༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༧ ཉིན་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་སུད་སི་གྲོས་ཚོགས་ཀྱི་དགུན་ཁའི་ལྷན་ཚོགས་ཀྱི་ཟུར་དུ་བོད་དོན་ལས་འཆར་བགྲོ་གླེང་གནང་སླད་ལྷན་འཛོམས་གནང་ཡོད། སུད་སི་གྲོས་ཚོགས་ཀྱི་དགུན་ཁའི་ལྷན་ཚོགས་ཕྱི་ལོ་ ༢༠༢༡ ཟླ་ ༡༡ ཚེས་ ༢༧ ནས་ཕྱི་ཟླ་ ༡༢ ཚེས་ ༡༧ བར་འཚོགས་ཀྱི་ཡོད་པ་རེད། 

དེ་ཡང་སུད་སི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ནས་ཟུང་འབྲེལ་ཚོགས་གཙོ་ནི་ཀོ་ལ་ས་ཝལ་ཊར་ (Nicholas Walder) ལགས་དང་། ཕ་བྷི་ན་མོ་ལི་ན་ (Fabian Molina) ལགས། གཞན་ཡང་མཱ་ཡ་ག་ར་ཕ་ (Maya Graf) ལགས། ཀ་ཐྲྀ་ན་པྲྀ་ལི་ཛ་ཧུ་བར་ (Katharina Preliez-Huber) ལགས་བཅས་མཉམ་ཞུགས་གནང་ཡོད། 

དེ་བཞིན་ཚོགས་འདུའི་ནང་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་། འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས། སུད་སི་དང་ལིག་ཊེན་ཚིན་བོད་རིགས་ཚོགས་པའི་ཚོགས་གཙོ་ཀརྨ་ཆོས་སྐྱིད་ལགས། སུད་བོད་མཐུན་གྲོགས་ཚོགས་པའི་སྐུ་ཚབ་ལྷ་དབང་ངོར་ཁང་གསར་ལགས། ཨུ་ཝེ་མེ་ཡ་ (Uwe Meya) ལགས་བཅས་ཚོགས་བཅར་ཞུས་ཡོད་པ་རེད། 

ཚོགས་འདུའི་ནང་ད་ལྟའི་བོད་ནང་གི་གནས་ཚུལ་དང་། བོད་མི་སྐྱབས་བཅོལ་མ་ཐོབ་པ་རྣམས་ཀྱི་གནས་སྟངས། བོད་དོན་མ་འོངས་ལས་འཆར་གྱིས་གཙོས་གནད་དོན་མང་པོའི་ཐོག་གོ་བསྡུར་གནང་ཡོད། ཚོགས་འདུ་གྲོལ་བའི་རྗེས་གྲོས་ཚོགས་འཐུས་མི་རྣམ་པ་སུད་སིར་རྟེན་གཞི་བྱས་པའི་མི་སེར་ཚོགས་པ་ཞིག་གིས་གོ་སྒྲིག་ཞུས་པའི་སུད་སི་གཞུང་ནས་ཕྱི་ལོ་ ༢༠༢༢ ལོའི་རྒྱ་ནག་དགུན་དུས་ཨོ་རྩེད་འགྲན་ཚོགས་སུ་མཉམ་ཞུགས་མི་ཡོང་བའི་ཞུ་འབོད་ལས་འགུལ་ནང་མཉམ་ཞུགས་གནང་ཡོད་པ་རེད་བཅས།།