༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་ཆེན་གྱི་མཛད་སྒོ་སིཌ་ཎི་ནང་ཡོད་པའི་མེག་ཀེ་ལར་བུ་མོ་སློབ་གྲྭའི་ (Mackellar Girls Campus) ར་བའི་ནང་གཟབ་རྒྱས་ངང་ཚོགས་ཡོད་པ་དང་། དུས་ཆེན་མཛད་སྒོར་ཨོསྟྲེ་ལི་ཡཱའི་གྲོས་ཚོས་འཐུས་མི་ལྕམ་སྐུ་བྷི་རོན་རེ་གྷན་ (Browen Regan) ལགས་ དང་། ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས། ཐེབས་རྩ་ཁང་ (Exodus Foundation) ཞེས་པའི་ཚོགས་གཙོ་བྷིལ་ཁི་རེའོ་སི་ (Rev Bill Crews) ལགས། ཨོསྟྲེ་ལི་ཡཱའི་འགྲོ་བ་མིའི་ཐོབ་ཐང་ལས་འགུལ་བ་པོབ་ལོ་ (Drew Pavlou) ལགས། སྤྱི་ཟུར་གདོང་འདུས་སྐྱིད་འཛོམས་ལགས། དེ་བཞིན་བོད་ཀྱི་གྲོགས་པོ་དང་བོད་དོན་རྒྱབ་སྐྱོར་བ། ས་གནས་བོད་རིགས་སོགས་ཁྱོན་མི་གྲངས་ ༥༠༠ ལྷག་མཉམ་ཞུགས་གནང་ཡོད།དེ་ཡང་མཛད་སྒོའི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་སྤྱན་འདྲེན་ཞུས་མཚམས་ཚང་མ་སྐུ་བཞེངས་ཐོག་བོད་ཀྱི་རྒྱལ་གླུ་དང་ཨོསྟྲེ་ལི་ཡཱའི་རྒྱལ་གླུ་བཏང་རྗེས་རྒྱ་ནག་གི་དབང་བསྒྱུར་འོག་བོད་ཀྱི་བསྟན་སྲིད་མི་རིགས་དང་བཅས་པའི་ཆེད་དུ་འདས་གྲོངས་སུ་གྱུར་བའི་བོད་ཀྱི་རྒྱལ་གཅེས་པ་རྣམས་ལ་མྱ་ངན་གུས་འདུད་སླད་ངག་བཅད་སྐར་མ་གཅིག་རིང་ཞུས་ཡོད། 

དེ་ནས་ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་སྐབས་བཅུ་དྲུག་པའི་བཀའ་ཤག་གི་གསུང་བཤད་སྒྲོངས་སྦྱང་གནང་བ་དང་འབྲེལ་བཙན་བྱོལ་བོད་མི་ཚོས་བོད་ཀྱི་རིག་གཞུང་དང་སྐད་ཡིག་མི་ཉམས་རྒྱུན་འཛིན་གནང་དགོས་པའི་གལ་གནད་དང་། བོད་པ་ནང་ཁུལ་རྡོག་རྩ་གཅིག་སྒྲིལ་གནང་དགོས་པ་སོགས་ཀྱི་སྐོར་གསུངས། དེ་བཞིན་ཁོང་གིས་ཉེ་ཆར་བོད་མིའི་སྒྲིག་འཛུགས་ནས་དང་བླངས་བོད་དོན་ཞུ་གཏུག་ལས་འགུལ་ (Voluntary Tibetan Advocacy Groups V-TAG) ཞེས་པའི་ལས་གཞི་གསར་པ་ཞིག་དབུ་འབྱེད་གནང་ཡོད་པས་བོད་རིགས་གཞོན་སྐྱེས་གཙོ་བོར་གྱུར་པའི་བོད་རིགས་རྣམས་ལས་གཞི་དེའི་ནང་མཉམ་ཞུགས་གང་མང་གནང་དགོས་པའི་རེ་སྐུལ་ཞུས་གནང་ཡོད།དེ་རྗེས་སིཌ་ཎི་བོད་རིགས་གཟའ་མཇུག་སློབ་གྲྭའི་སློབ་ཕྲུག་རྣམས་ཀྱིས་བོད་ཀྱི་རིག་གཞུང་འཁྲབ་སྟོན་དང་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་ཡོད། སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་ཆེན་གྱི་མཛད་སྒོར་ཨོསྟྲེ་ལི་ཡཱའི་ལྗང་ཁུ་ཆབ་སྲིད་ཚོགས་པའི་ཕྱི་སྲིད་མགྲིན་ཚབ་པ་དང་གྲོས་ཚོགས་གོང་མའི་འཐུས་མི་ཇེ་ནེ་ཊི་རཱ་ཡི་སི་ (Janet Rice) ལགས་དང་། ཨོསྟྲེ་ལི་ཡཱའི་ལྗང་ཁུ་ཆབ་སྲིད་ཚོགས་པའི་འགྲོ་བ་མིའི་ཐོབ་ཐང་དང་སྣ་མང་རིག་གཞུང་གི་མགྲིན་ཚབ་པ་གྲོས་ཚོགས་འཐུས་མི་ཇན་ནེ་ལེ་འོན་ (Jenny Leong) ལགས་རྣམ་གཉིས་ཀྱིས་ཨོསྟྲེ་ལི་ཡཱའི་ནང་གནས་སྡོད་བོད་མི་རྣམས་ཀྱིས་གཙོས་འཛམ་གླིང་ས་ཕྱོགས་གང་སར་གནས་པའི་བོད་མི་ཡོངས་ལ་གདུང་སེམས་མཉམ་སྐྱེ་དང་རྒྱབ་སྐྱོར་གྱི་གསུང་འཕྲིན་ཞིག་གནང་ནས་ང་ཚོས་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་དང་། འཚེ་མེད་ཞི་བ། འགྲོ་བ་མི་གཅིག་གྱུར་གྱི་འདུ་ཤེས་གོང་མཐོར་སྤེལ་བཞིན་པར་རྒྱབ་སྐྱོར་ཤུགས་ཆེ་བྱེད་ཀྱི་ཡོད། ཅེས་གསུངས་ཡོད་པ་བཅས།།