༄༅། །འདི་གར་ལྡི་ལི་ས་གནས་འགོ་འཛིན་ལས་ཁུང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༢ ཚེས་ ༢༧ ནས་ ༢༩ བར་ཉིན་གསུམ་རིང་ལྡི་ལི་བསམ་ཡས་གླིང་ས་གནས་འགོ་འཛིན་ཕུན་ཚོགས་སྟོབས་རྒྱལ་ལགས་དང་ཚབ་གསར་རྡོ་རྗེ་ཚེ་རིང་ལགས་རྣམ་གཉིས་དབར་རྩིས་སྤྲོད་རྩིས་ལེན་གནང་ཡོད།

དེ་ཡང་རྩིས་སྤྲོད་རྩིས་ལེན་གྱི་ལས་དོན་ཐོག་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་དྲུང་འཕར་ཟླ་བ་ཚུལ་ཁྲིམས་ལགས་སྤྲོད་དཔང་གི་འགན་འཁུར་བཞེས་པའི་ཐོག་ཉིན་དང་པོར་ས་གནས་འགོ་འཛིན་གསར་རྙིང་དབར་གཞུང་འབྲེལ་ཡིག་འཕེལ་དང་ཡིག་ཆ། དཔེ་དེབ། ཅ་དངོས་སོགས་རྩིས་སྤྲོད་རྩིས་ལེན་དང་ལས་དོན་མཇུག་སྐྱོང་སོགས་ངོ་སྤྲོད་གནང་ཡོད།  ཉིན་གཉིས་པའི་ཐོག་ས་གནས་འགོ་འཛིན་གསར་རྙིང་དབར་ཞབས་སྟེགས་བརྗེ་ལེན་གྲུབ་མཚམས་ཏོག་དབྱིབས་ནད་ཡམས་རྐྱེན་པས་མི་མང་འདུ་སྐོང་མི་དགོས་པར་ཁྱབ་ཁོངས་གཞུང་དང་གཞུང་ཁོངས་མ་ཡིན་པའི་ཚོགས་པ་ཁག་གི་ཚོགས་གཙོ་གཙོས་པའི་ཚོགས་མི་དང་སྡེ་ཚན་ཁག་གི་འགན་འཛིན་གྱིས་གཙོས་ལས་བྱེད་དང་། ཧ་རི་ཡཱ་ཎཱ་བོད་མི་སུད་ཚོང་ཚོགས་པ་ཁག་ ༡༣ གྱི་འཐུས་མི། ཨམ་བཱ་ལཱ་བོད་མི་སྡོད་སྒར་གྱི་འཐུས་མི་བཅས་ཚང་འཛོམས་ཐོག་མཛད་སྒོ་སྟབས་བདེ་ཞིག་ཚོགས་ཡོད།  སྐབས་དེར་ས་འགོ་ཟུར་པས་མཇུག་བསྡོམས་གཏམ་བཤད་དང་ས་འགོ་གསར་པའི་གཏམ་བཤད། དེ་བཞིན་སྤྲོད་དཔང་ཟླ་བ་ཚུལ་ཁྲིམས་ལགས་ཀྱི་ས་འགོ་གསར་རྙིང་དབར་རྩིས་སྤྲོད་རྩིས་ལེན་གྱི་གཟིགས་ཚུལ་གྱི་གསུང་བཤད་གནང་སྟེ་མཛད་སྒོ་གྲོལ།ཉིན་མཐའ་མར་ས་གནས་འགོ་འཛིན་ཕུན་ཚོགས་སྟོབས་རྒྱལ་ལགས་ཀྱིས་ས་གནས་འགོ་འཛིན་གསར་པ་རྡོ་རྗེ་ཚེ་རིང་ལགས་དང་ལས་དྲུང་། རྩིས་པ་བཅས་ལ་ས་གནས་ཀྱི་འབྲེལ་ཡོད་ཕྱི་ནང་དཔོན་རིགས་དང་ལྡི་ལི་དོན་གཅོད་འབྲོང་ཆུང་དངོས་གྲུབ་ལགས། འཕགས་བོད་འབྲེལ་མཐུད་ལས་ཁུང་གི་འགན་འཛིན་འཇིགས་མེད་ཚུལ་ཁྲིམས་ལགས། དེ་བཞིན་ (Prahlad Singh Sahney  (MLA Chandni Chowk) AAP,Avtar Singh,Councillor MCD,Civil Line, North Delhi) BJP, Shri Pankaj Goyal BTSM National General Secretary, Shri Anil Kumar Mongai ji (BTSM) གཞན་ཡང་གསང་བའི་ལས་ཁུངས་ཀྱི་ལས་བྱེད་བཅས་ངོ་སྤྲོད་གནང་སྟེ་རྩིས་སྤྲོད་རྩིས་ལེན་གྱི་ལས་དོན་ལེགས་གྲུབ་བྱུང་ཡོད། །