༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༢༠ རེས་གཟའ་ཟླ་བ་ཉིན་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀེན་ (Antony J. Blinken) མཆོག་གིས་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya ) མཆོག་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བའི་གསར་འགོད་གསལ་བསྒྲགས་ཤིག་སྤེལ་ཡོད། དེ་རིང་སྟེ་ཕྱི་ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ལྕམ་སྐུ་ཨ་ཛི་རཱ་ཛེ་ཡ་མཆོག་ལ་དགའ་བསུའི་འཚམས་འཕྲིན་ཞིག་གནང་བའི་ནང་འཁོད་དོན། ཨ་རིའི་གཞུང་གིས་སྐུ་ཉིད་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ལ་དགའ་བསུའི་འཚམས་འདྲི་ཞུ་རྒྱུ་ཡིན། སྐུ་ཉིད་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བ་དེས་ཨ་རིའི་འཛིན་སྐྱོང་དང་གྲོས་ཚོགས་ནང་བོད་མིར་རྒྱབ་སྐྱོར་ཤུགས་ཆེ་གནང་རྒྱུའི་ཆོད་སེམས་བརྟན་པོ་ཡོད་པ་དང་། བཟང་ཕྱོགས་སུ་གོམ་པ་སྤོ་བཞིན་ཡོད་པ་མཚོན་གྱི་ཡོད། ཅེས་དང་།
སྐུ་ཉིད་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བ་ལ་བརྟེན་ནས་བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་གྲོས་མོལ་བསྐྱར་གསོ་དོན་ཕན་ལྡན་པ་ཞིག་ཡོང་བའི་རེ་བ་ཡོད། སྐུ་ཉིད་སྒེར་གྱི་ངོས་ནས་མང་གཙོའི་ལས་འགུལ་བ་དང་སྨྲ་བརྗོད་རང་དབང་ཞུ་གཏུག་པ་རྣམས་དང་ལྷན་ཕྱག་ལས་གནང་བའི་ཉམས་མྱོང་གཞིར་བཞག་ཐོག་འཛམ་གླིང་ནང་མང་གཙོ་དང་འགྲོ་བ་མིའི་ཐོབ་ཐང་གོང་མཐོར་སྤེལ་བཞིན་ཡོད་པས་ཕྲན་རང་ཉིད་ཧ་ཅང་སེམས་འགུལ་ཐེབས་སོང་།
ལྷག་པར་འདི་ལོའི་ཕྱི་ཟླ་ ༤ ནང་ཨ་རིའི་གྲོས་ཚོགས་གོང་མའི་ནང་སྐུ་ཉིད་ཀྱིས་འོས་མིའི་ཉན་ཞིབ་གནང་སྐབས་རྒྱ་ནག་གཞུང་གིས་བོད་མི་རྣམས་ལ་དྲག་གནོན་བྱེད་བཞིན་པའི་སྐོར་ཐུགས་སྣང་དགོས་པ་དང་། དེ་བཞིན་ཨ་རིའི་གྲོས་ཚོགས་བརྒྱུད་རྒྱ་ནག་གི་དྲག་གནོན་འོག་ཡོད་པའི་མི་མང་གི་དཀའ་ངལ་སེལ་ཐབས་གནང་རྒྱུའི་ཐུགས་འདོད་ཡོད་པའི་སྐོར་གསུང་བཤད་གནང་བ་དེས་ཕྲན་རང་ཉིད་ཧ་ཅང་སེམས་འགུལ་ཐེབས་བཅུག་སོང་། གོ་སྐབས་འདི་བརྒྱུད་ངས་ཨ་རིའི་སྲིད་འཛིན་སྐུ་ཞབས་ཇོ་བཱཡི་ཌེན་ (Joe Biden) མཆོག་དང་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་སྐུ་ཞབས་ཨན་ཊོ་ནེ་བྷི་ལིན་ཀེན་ (Antony J. Blinken) མཆོག་གིས་སྐུ་ཉིད་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་གནང་བར་ཐུགས་རྗེ་ཆེ་ཞུ་རྒྱུ་ཡིན།
ཨ་རི་ནི་བོད་མིར་རྒྱབ་སྐྱོར་ཤུགས་ཆེ་ཤོས་གནང་མཁན་གྲས་ཡིན། དེ་སྔའི་ཨ་རིའི་སྲིད་འཛིན་དང་གྲོས་ཚོགས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་ཞུས་ཡོད་པ་མ་ཟད། ཕྱི་ལོ་ ༢༠༠༧ ལོར་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ (Congressional Gold Medal) ཕུལ་ཡོད། དེ་བཞིན་ཨ་རིའི་གཞུང་གིས་བོད་མི་རྣམས་ལ་མཐུན་འགྱུར་རོགས་རམ་རྒྱ་ཆེ་གནང་དང་གནང་བཞིན་ཡོད་སྟབས་ཨ་རི་ནི་བོད་མི་རྣམས་ལ་ཧ་ཅང་བཀའ་དྲིན་ཆེན་པོ་ཡིན། ལྕམ་སྐུ་མཆོག་དང་གང་མགྱོགས་མཇལ་འཕྲད་ཞུས་ཏེ་དབུ་མའི་ལམ་གྱི་སྲིད་བྱུས་གཞིར་བཞག་ཐོག་བོད་རྒྱའི་དཀའ་རྙོག་སེལ་ཐབས་སུ་ཕྱག་ལས་གནང་ཐུབ་པའི་རེ་ལྟོས་བྱེད་ཀྱི་ཡོད། ཅེས་འཁོད་ཡོད།།
