༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ཉིན་ཏེ་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་སུད་སི་དང་ལིག་ཊེན་ཚིན་ནང་ཡོད་པའི་བོད་མི་རྣམས་ཀྱིས་ཇི་ནི་ཝར་གནས་འཁོད་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྟ་ཞིབ་ལྷན་ཚོགས་ཀྱི་མདུན་དུ་རྒྱ་ནག་གཞུང་ནས་བོད་ནང་གཉའ་གནོན་སྡུག་སྦྱོང་དང་འགྲོ་བ་མིའི་ཐོབ་ཐང་མུ་མཐུད་རྩིས་མེད་རྡོག་རོལ་གཏོང་བཞིན་པར་ཞི་བའི་ངོ་རྒོལ་བྱས་ཡོད།

དེ་ཡང་གནམ་གཤིས་གྲང་ངར་ཆེ་ནའང་སུད་སི་དང་ལིག་ཊེན་ཚིན་ནང་ཡོད་པའི་བོད་མི་བརྒྱ་ཕྲག་བརྒལ་བ་ཞི་བའི་ངོ་རྒོལ་ནང་མཉམ་ཞུགས་གནང་ཡོད་ཅིང་། ཞི་བའི་ངོ་རྒོལ་བ་རྣམས་ཀྱིས་རྒྱ་ནག་གཞུང་ནས་བོད་མི་ལ་གཉའ་གནོན་སྡུག་སྦྱོང་གཏོང་རྒྱུ་མཚམས་འཇོག་དགོས་པ་དང་། བོད་རྒྱའི་དཀའ་རྙོག་སེལ་བར་ཞི་བའི་ཐབས་ལམ་འཚོལ་ཆེད་བོད་མིའི་སྐུ་ཚབ་དང་ལྷན་ཞི་མོལ་དགོས་པའི་དགོས་འདུན་བཏོན་ཡོད་པ་རེད། གཞན་ཡང་ཞི་རྒོལ་བ་ཚོས་འཛམ་གླིང་མཉམ་འབྲེལ་རྒྱལ་ཚོགས་ནས་བོད་ཀྱི་སྐོར་གསུང་དགོས་པ་དང་། རྒྱ་ནག་གཞུང་ནས་བོད་ནང་འགྲོ་བ་མིའི་ཐོབ་ཐང་མུ་མཐུད་རྩིས་མེད་རྡོག་རོལ་བཏང་བར་འགན་ཁུར་འཇུག་དགོས་པའི་འབོད་ཚིག་བསྒྲགས་ཡོད་པ་མ་ཟད། རྒྱ་ནག་གཞུང་ནས་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་སྒྲིག་དོན་བཞིན་འགན་ཁུར་ཚུལ་བཞིན་བསྒྲུབས་མེད་པར་བརྟེན་རྒྱ་ནག་ཏུ་ཕྱི་ལོ་ ༢༠༢༢ ལོའི་ཨོ་རྩེད་འགྲན་ཚོགས་འཚོགས་མི་ཆོག་ཅེས་ཞི་འབོད་གནང་ཡོད་པ་རེད། འདུ་འཛོམས་ཐོག་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་རྒྱ་ནག་གཞུང་ནས་འཆར་གཞི་ལྡན་པའི་སྒོ་ནས་བོད་མིའི་ཆོས་དང་རིག་གཞུང་། ངོ་བོ་བཅས་རྒྱ་ནག་གི་ཁྱད་ཆོས་ཅན་དུ་བསྒྱུར་རྒྱུའི་འབད་རྩོལ་བྱེད་ཀྱི་ཡོད་པར་ཐུགས་འཚབ་དང་སྦྲགས། ཁོང་གིས་བྱེས་འབྱོར་བོད་མི་རྣམས་ཀྱིས་ནུས་པ་གཅིག་སྒྲིལ་གྱིས་གཞིས་ལུས་བོད་མི་རྣམས་ཀྱི་རང་དབང་ཐོབ་ཐང་ཆེད་ཞུ་གཏུག་བྱ་དགོས་སྐོར་གསུངས་ཡོད། 

གཞན་ཡང་འདུ་འཛོམས་ཐོག་སུད་སི་དང་ལིག་ཊེན་ཚིན་བོད་རིགས་མི་མང་གི་ཚོགས་གཙོ་ཀརྨ་ཆོས་སྐྱིད་ལགས་དང་། སུད་བོད་མཛའ་འབྲེལ་ཚོགས་པའི་ཇེ་ཁུ་ཨར་ནལ་ (Jacque Arnal) ལགས། ཡུ་རོབ་བོད་རིགས་གཞོན་ནུ་མཐུན་ཚོགས་ཀྱི་ཚོགས་གཙོ་བཀྲ་ཤིས་ལགས། སུད་སི་ས་གནས་བུད་མེད་ལྷན་ཚོགས་ཀྱི་ཚོགས་གཞོན་པ་སངས་སྒྲོལ་མ་ནོར་འཛོམས་ལགས་བཅས་ནས་ཀྱང་གསུང་བཤད་གནང་ཡོད།

དེ་བཞིན་ཨོསྟྲི་ཡཱ་གནས་སྡོད་བོད་མི་རྣམས་ཀྱིས་ཀྱང་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་ཞི་བའི་ངོ་རྒོལ་བྱས་ཡོད། དེ་ཡང་ཞི་རྒོལ་བ་རྣམས་རྒྱ་ནག་གཞུང་ཚབ་ཁང་གི་མདུན་དུ་ཚང་འཛོམས་ཀྱིས་རྒྱ་ནག་གཞུང་གིས་བོད་བཙན་བཟུང་བྱས་པ་མ་ཟད། བོད་མིའི་གཞི་རྩའི་ཐོབ་ཐང་དང་། རང་དབང་རྩིས་མེད་རྡོལ་རོལ་བཏང་བར་ངོ་རྒོལ་བྱས་ཡོད་ཅིང་། ཞི་རྒོལ་བ་རྣམས་ཀྱི་ལག་ཏུ་བོད་ཀྱི་རྒྱལ་དར་ཐོགས་ཏེ་རྒྱ་གཞུང་ནས་འགྲོ་བ་མིའི་ཐོབ་ཐང་ལ་གུས་རྩི་བྱེད་དགོས་པ་དང་། རྒྱ་ནག་ཏུ་ཨོ་རྩེད་འགྲན་ཚོགས་འཚོགས་མི་ཆོག་པ་སོགས་ཀྱི་འབོད་ཚིག་སྒྲོག་བཞིན་ཝི་ཡ་ན་ (Vienna’s city center) བར་གོམ་བགྲོད་གནང་ཡོད་པ་བཅས།།