༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡ ཉིན་རྒྱ་གར་བོད་དོན་རྒྱབ་སྐྱོར་པ་ (Bharat Tibbat Sahyog Manch) ཞེས་པས་གོ་སྒྲིག་ཞུས་པའི་རྟ་དབང་གནས་སྐོར་ཞེས་པའི་བོད་དོན་གོ་རྟོགས་ལས་འགུལ་ཐེངས་བཅུ་པ་རྒྱ་གར་བྱང་ཤར་ས་གནས་གོ་ཧ་ཊི་ནས་དབུ་འཛུགས་གནང་ཡོད།

དེ་ཡང་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་ཚོགས་མི་རྒན་པ་དང་སློབ་སྟོན་པ་སྐུ་ཞབས་ཨིནྡྲེཤ་ཀུ་མཱར་ལགས་ཀྱིས་གནས་སྐོར་དབུ་འབྱེད་གནང་བ་མ་ཟད་གནས་སྐོར་མཉམ་ཞུགས་པ་རྣམས་ལ་འཚམས་འདྲི་དང་ལེགས་གསོལ་ཞུས་ཡོད། 

དབུ་འབྱེད་མཛད་སྒོར་ཨ་སམ་གཞུང་གི་ཚོགས་གཙོ་གཞོན་པ་འབུམ་རམས་པ་ནུ་མོལ་མོ་མིན་ (Dr Numol Momin) ལགས་དང་། རྒྱ་གར་བོད་དོན་རྒྱབ་སྐྱོར་པའི་རྒྱལ་ཡོངས་ཚོགས་གཙོ་སྐུ་ཞབས་ཧར་ཇཱིཏ་སིངྷ་གྲེ་བཱལ་ (Harjit Singh Grewal) ལགས། ཚོགས་གཞོན་རིན་ཆེན་མཁའ་འགྲོ་ལགས། བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག  རྒྱ་གར་བྱང་ཤར་ཁུལ་གྱི་བྷི་ཇེ་པི་སྲིད་དོན་ཚོགས་པའི་སྒྲིག་འཛུགས་ཀྱི་དྲུང་ཆེ་སྐུ་ཞབས་ཨ་ཇེ་ཇམ་ཝལ་ (Ajay Jamwal) ལགས། འཕགས་བོད་མཛའ་འབྲེལ་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་པཾ་ཀཛ་གོ་ཡལ་ (Pankaj Goyal) ལགས། གོ་ཝ་ཧ་ཊིའི་ས་གནས་གྲོས་ཚོགས་འཐུས་མི་སྐུ་ཞབས་ཧེ་མང་ཐ་ཀ་རི་ཡ་ (Hemang Thakaria) ལགས་ལ་སོགས་ལྷན་བཅར་ཞུས་ཡོད། གནས་སྐོར་བ་རྣམས་གོ་ཝ་ཧ་ཊི་ནས་གོམ་བགྲོད་དབུ་འཛུགས་ཀྱིས་བྷོམ་ཌི་ལ་དང་། སྡེ་རང་སོགས་བརྒྱུད་རྟ་དབང་དུ་ཕེབས་ཀྱི་ཡོད་པ་དང་། རྟ་དབང་དུ་འབྱོར་མཚམས་གནས་སྐོར་བ་རྣམས་རྟ་དབང་དགོན་པར་མཆོད་མཇལ་ཞུས་རྗེས་ཉིན་ཕྱི་མར་རྒྱ་བོད་ས་མཚམས་བྷུམ་ལར་ཕེབས་ཀྱི་ཡོད།

རྟ་དབང་གནས་སྐོར་ནི་རྒྱ་གར་བོད་དོན་རྒྱབ་སྐྱོར་པའི་ལོ་འཁོར་དུས་སྟོན་ཆེ་གྲས་ཤིག་ཡིན་པ་དང་། དེ་ཉིད་ཀྱི་དམིགས་ཡུལ་ནི་རྒྱ་ནག་གཞུང་ལ་ཨ་རུ་ཎཱ་ཅལ་པྲ་དེཤ་ནི་རྒྱ་གར་གྱི་ཁོངས་གཏོགས་ཡིན་པ་དྲན་གསོ་གཏོང་རྒྱུ་དང་། རྒྱ་ནག་གཞུང་གིས་བོད་བཙན་བཟུང་བྱས་པ་གསལ་སྟོན་བྱ་རྒྱུ་ཡིན་འདུག་བཅས།།