༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ ཧྲིལ་པོ་འཁོར་བའི་དུས་ཆེན་ཉིན་རྒྱ་གར་ནང་གི་བོད་དོན་རྒྱབ་སྐྱོར་ཚོགས་པ་ཁག་གིས་དུས་ཆེན་སྲུང་བརྩི་གཟབ་རྒྱས་ཞུས་ཡོད། 

དེ་ཡང་རྒྱ་གར་གུཇ་རཱཏ་ཀྱི་ཨ་ཧམ་དཱ་བཱད་དུ་ཧིན་བོད་མཛའ་འབྲེལ་ཚོགས་པ་དང་བོད་མིའི་སུད་ཚོང་ཚོགས་པ་ཟུང་སྦྲེལ་ཐོག་དུས་ཆེན་སྲུང་བརྩི་ཞུས་ཡོད་ཅིང་། མཛད་སྒོའི་ཐོག་ཨ་ཧམ་དཱ་བཱད་ཀྱི་གྲོང་སྡེའི་སྤྱི་ཁྱབ་པ་སྐུ་ཞབས་ཀི་རིཊ་བྷ་ཡི་པཱར་མཱར་ (Kiritbhai Parmar) ལགས་སྐུ་མགྲོན་གཙོ་བོ་དང་། སྐུ་ཞབས་ཧེ་མཱནྟ་བྷཊ་(Hemant Bhatt) ལགས་དམིགས་བསལ་སྐུ་མགྲོན་དུ་ཕེབས་ཡོད་པ་རེད། 

རཱ་ཇསྠན་གྱི་ཇོཊ་པུར་ནང་ཧིན་བོད་མཛའ་འབྲེལ་ཚོགས་པ་དང་བོད་མིའི་སུད་ཚོང་ཚོགས་པ་ཟུང་སྦྲེལ་གྱིས་དུས་ཆེན་སྲུང་བརྩི་ཞུས་ཡོད་ལ། མཛད་སྒོའི་གཙོ་སྐྱོང་ཇོཊ་པུར་རྫོང་གི་ཧིན་བོད་མཛའ་འབྲེལ་ཚོགས་པའི་འབྲེལ་མཐུད་པ་ལྕམ་རེ་ཤམ་བྷ་ལ་ (Resham Bala) ལགས་ཀྱིས་གནང་ཡོད། སྐབས་དེར་བོད་མིའི་སུད་ཚོང་ཚོགས་པའི་འགན་འཛིན་སྐལ་བཟང་ལགས་ཀྱིས་ཇོཊ་པུར་མི་མང་ནས་བཙན་བྱོལ་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།ཇར་ཁནྜ་ཡི་ཧ་ཛ་རི་བྷག་ཏུ་ཧིན་བོད་མཛའ་འབྲེལ་ཚོགས་པའི་ས་གནས་འབྲེལ་མཐུད་པ་སྐུ་ཞབས་སུ་དེཤ་ཀུ་མཱར་ (Sudesh Kumar) ལགས་ཀྱིས་སྣེ་ཁྲིད་འོག་རྒྱ་གར་བོད་དོན་རྒྱབ་སྐྱོར་ཚོགས་པས་མཛད་སྒོ་ཞིག་གོ་སྒྲིག་ཞུས་ཡོད་པ་དང་། མཛད་སྒོར་མཁས་དབང་དང་བོད་དོན་རྒྱབ་སྐྱོར་བ་མང་པོ་མཉམ་ཞུགས་གནང་ཡོད། 

བི་ཧཱར་ནང་གི་མུ་ཛ་ཕར་ནཱ་གར་དུ་ཧིན་བོད་མཛའ་འབྲེལ་ཚོགས་པས་འགྲོ་བ་མིའི་ཐོབ་ཐང་དང་བོད་ཅེས་པའི་བརྗོད་གཞིའི་ཐོག་ཨེམ་པི་ཨས་ཚན་རིག་མཐོ་སློབ་ (M. P. S. Science College) ཏུ་བགྲོ་གླེང་ཚོགས་འདུ་ཞིག་གོ་སྒྲིག་ཞུས་ཡོད།

ཀརནཱ་ཊཀ་ཡི་མཻ་སོར་ནང་ཧིན་བོད་མཛའ་འབྲེལ་ཚོགས་པའི་ཚོགས་མི་སྐུ་ཞབས་ཇེ་པི་ཨུརས་ (J. P. Urs) ལགས་དང་མཻ་སོར་བོད་ཕྲུག་ཚོགས་པ། གཞན་ཡང་བོད་དོན་རྒྱབ་སྐྱོར་ཚོགས་པ་བཅས་ནས་དུས་ཆེན་སྲུང་བརྩི་ཞུས་ཡོད།

མཧཱ་རཱཥཊྲ་ནང་གི་བྷན་དྷ་ར་རུ་ས་གནས་ཀྱི་གནད་ཡོད་མི་སྣ་གཙོས་བོད་དོན་རྒྱབ་སྐྱོར་བ་དང་བོད་མི་སུད་ཚོང་བ་བཅས་ཚང་འཛོམས་ཐོག་དུས་ཆེན་སྲུང་བརྩི་ཞུས་ཡོད་པ་དང་། སྐབས་དེར་ཧིན་བོད་མཛའ་འབྲེལ་ཚོགས་པའི་ནཀ་པུར་ས་གནས་ཀྱི་ཚོགས་གཙོ་སྐུ་ཞབས་ཨམ་རུཊ་བན་སོད་ (Amrut Bansod)་ལགས་ཀྱིས་མཛད་རིམ་གཙོ་སྐྱོང་གནང་ཡོད་པ་དང་། ཚོགས་བཅར་བ་རྣམས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཚེ་བརྟན་པ་དང་ཏིབ་བྷཊ་མུཀ་ཏི་སཱད་ན་ (Tibbat Mukti Sadhana) ཞེས་པའི་ལས་འགུལ་ལེགས་གྲུབ་ཡོང་བའི་ཆེད་སྨོན་ལམ་བཏབ་ཡོད། 

གཞན་ཡང་རྒྱ་གར་བོད་དོན་རྒྱབ་སྐྱོར་ཚོགས་པའི་ས་གནས་འབྲེལ་མཐུད་པ་དང་ནཀ་པུར་ཧིན་བོད་མཛའ་འབྲེལ་ཚོགས་པའི་ཚོགས་མི་སྐུ་ཞབས་སན་དེཤ་མེཤ་རམ་ (Sandesh Meshram) ལགས་ཀྱིས་རྐང་འཁོར་ཐོག་བོད་དོན་གོ་རྟོགས་ལས་འགུལ་ཞིག་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ཉིན་དབུ་འཛུགས་གནང་ཡོད་ཅིང་། རྐང་འཁོར་འགྲུལ་བཞུད་དེ་བཞིན་རྒྱ་གར་གྱི་ལྷོ་ཕྱོགས་མངའ་སྡེ་ཀརནཱ་ཊཀ་དང་། ཀེ་རལ། ཏ་མིལ་ནཱ་ཌཱུ། པུ་ཌུ་ཅེ་རཱི་བཅས་བརྒྱུད་ཁྱོན་བསྡོམས་ཀི་ལོ་མི་ཊར་ ༢༤༠༠ བརྒལ་ཏེ་ཕྱི་ལོ་༢༠༢༢ ཟླ་ ༡ ཚེས་ ༡༢ ཉིན་བྷེང་ལོར་མཇུག་བསྡུ་རྒྱུ་རེད་འདུག 

ལྡི་ལིར་འཕགས་བོད་མཛའ་འབྲེལ་ཚོགས་པས་བོད་ནང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་གསལ་སྟོན་བྱ་རྒྱུ་དང་། རྒྱ་ནག་དམར་ཤོག་གཞུང་འོག་ནས་བོད་ཐར་པའི་ཆེད་འགྲོ་བ་མིའི་ཐོབ་ཐང་སྦག་སྦག་སྐོར་བསྐྱོད་ཅེས་པ་ཞིག་གོ་སྒྲིག་ཞུས་ཡོད་ཅིང་། གྲོས་ཚོགས་འཐུས་མི་དུཤ་ཡནྟ་གཽ་ཏམ་ (Dushyant Gautam) ལགས་ཀྱིས་ས་དེབ་ཨ་ཏལ་ས་ཏལ་(Sadev Atal Sthal) དུ་སྐོར་བསྐྱོད་དབུ་འབྱེད་གནང་བ་དང་མཐར་བོད་སྒར་བསམ་ཡས་གླིང་དུ་མཇུག་བསྡུས་ཡོད།  ཕྱི་དྲོར་འཕགས་བོད་མཛའ་འབྲེལ་ཚོགས་པས་རྒྱལ་སྤྱིའི་རང་བཞིན་ལྡན་པའི་དྲ་ཐོག་ཚོགས་འདུ་ཞིག་ཀྱང་གོ་སྒྲིག་ཞུས་ཡོད། 

བུམ་དི་ལ་དང་རྟ་དབང་ཁུལ་དུ་འཕགས་བོད་མཛའ་འབྲེལ་ཚོགས་པས་ས་གནས་མི་མང་དང་ལྷན་དུ་བྷོམ་དི་ལ་རྫོང་གི་སྤྱི་ཁྱབ་ལས་ཁུངས་དང་རྟ་དབང་དགོན་པ་སོ་སོར་དུས་ཆེན་སྲུང་བརྩི་ཞུས་ཡོད། 

ཨུ་ཏར་པྲ་དེཤ་ཀྱི་མི་རུཊ་ནང་རྒྱལ་སྤྱིའི་འཕགས་བོད་མཛའ་འབྲེལ་ཚོགས་པས་ (Antarrashtriya Bharat Tibbat Sahyog Samiti (ABTSS) ) ས་རས་ཝ་ཊི་ཤི་ཤུ་མན་དིར་ (Saraswati Shishu Mandir) དུ་༧གོང་ས་མཆོག་གི་སྐོར་རི་མོའི་འགྲན་སྡུར་ཞིག་གོ་སྒྲིག་ཞུས་ཡོད་པ་དང་། འགྲན་སྡུར་ནང་སློབ་གྲྭ་ཁག་ ༡༢ མཉམ་ཞུགས་གནང་ཡོད། ནུབ་བྷེང་གྷལ་གྱི་ས་ལུ་ག་ར་རུ་ཧི་མ་ལ་ཡའི་བོད་དོན་ལས་འགུལ་མཐུན་ཚོགས་ (Himalayan Committee for Action on Tibet) ཀྱིས་དུས་འཁོར་ཐང་ཆེན་གྱི་ཕོ་བྲང་དུ་ཧི་མ་ལ་ཡའི་བོད་དོན་ལས་འགུལ་མཐུན་ཚོགས་ཀྱི་ཚོགས་གཙོ་བླ་མ་ཆོས་འཕེལ་བཟོད་པ་ལགས་དང་། དྲུང་ཆེ་བསོད་ནམས་ལྷུན་གྲུབ་བླ་མ་ལགས་དབུ་བཞུགས་ཐོག་ཧི་མ་ལ་ཡའི་ནང་པའི་རིག་གཞུང་སློབ་གྲྭའི་དགེ་ལས་སློབ་ཕྲུག་ཚང་འཛོམས་ངང་དུས་ཆེན་སྲུང་བརྩི་ཞུས་ཡོད། 

འབྲས་ལྗོངས་ཀྱི་རྒྱལ་ས་སྒང་ཏོག་ཏུ་རྒྱ་གར་བོད་དོན་རྒྱབ་སྐྱོར་ཚོགས་པའི་ས་གནས་འབྲེལ་མཐུད་པ་སྐུ་ཞབས་པདྨ་དབང་འདུས་བོ་ཊི་ཡ་ལགས་ས་གནས་འགོ་འཛིན་ལས་ཁུངས་ནས་གོ་སྒྲིག་ཞུས་པའི་གཞུང་འབྲེལ་མཛད་སྒོར་ཆེད་བཅར་གནང་ཡོད། 

གཞན་ཡང་བྷེང་ལོར་ནང་གི་ཧིན་བོད་མཛའ་འབྲེལ་ཚོགས་པ་དང་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་བོད་ཀྱི་གཞོན་ནུ་ལྷན་ཚོགས་ཀྱིས་ཕྱི་ལོ་ ༢༠༢༢ ལོའི་པེ་ཅིང་ཨོ་རྩེད་འགྲན་ཚོགས་ལ་ངོ་རྒོལ་མཚོན་ཆེད་གོ་སྒྲིག་ཞུས་པའི་བྷེང་ལོར་ནས་ལྡི་ལི་བར་གྱི་སྦག་སྦག་སྐོར་བསྐྱོད་ལས་འགུལ་གྱི་དབུ་འབྱེད་མཛད་སྒོར་བཅར་ཡོད། 

ཕྱོགས་མཚུངས་རྒྱ་གར་གྱི་ས་གནས་འདྲ་མིན་ནང་རྒྱ་གར་བོད་དོན་རྒྱབ་སྐྱོར་ཚོགས་པ་ཁག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བའི་དུས་ཆེན་སྲུང་བརྩི་ཞུས་ཡོད་པ་བཅས།།