༄༅། །རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་ཕྱི་ལོ་ ༢༠༢༡ ཟླ་ ༡༢ ཚེས་ ༡༣ ནས་ ༢༣ བར་སོག་ཡུལ་དུ་གཞུང་འབྲེལ་ཕྱོགས་ཕེབས་གནང་ཡོད། ཁོང་དེ་སྔ་སོག་ཡུལ་དུ་ཕྱི་ལོ་ ༢༠༡༩ ལོའི་སྟོན་དུས་ཕེབས་ཡོད་ཅིང་། དེ་ནས་བཟུང་ད་བར་སོག་ཡུལ་དུ་འགྱུར་བ་མང་པོ་ཕྱིན་ཡོད། 

ཕྱི་ལོ་ ༢༠༢༠ ལོར་སོག་ཡུལ་དུ་གྲོས་ཚོགས་འཐུས་མི་གསར་འདེམས་གནང་ཡོད་པ་མ་ཟད། ཕྱི་ལོ་ ༢༠༢༡ ལོར་སྲིད་འཛིན་ཡང་གསར་འདེམས་གནང་ཡོད། དེ་བཞིན་སོག་ཡུལ་ནང་པའི་དབུ་ཁྲིད་བླ་མ་ཆོས་རྒྱ་མཚོ་མཆོག་ལ་སོག་པོའི་ནོ་མིན་ཁམ་བོ་བླ་མའི་མཚན་གནས་གནང་ཡོད། རུ་སོག་སྐུ་ཚབ་དོན་གཅོད་ལ་སོག་ཡུལ་ནང་པའི་དབུ་ཁྲིད་ནོ་མིན་ཁམ་བོ་བླ་མ་མཆོག་གིས་ཕེབས་བསུའི་སྣེ་ལེན་ཞུས་གནང་ཡོད། སྐབས་དེར་སྐུ་ཚབ་དོན་གཅོད་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ། ནོ་མིན་ཁམ་བོ་མཆོག་ལ་མཚན་གནས་གསར་པ་གནང་བར་འཚམས་འདྲི་དང་འབྲེལ་གསུང་དོན། མཚན་གནས་དེ་ལ་བརྟེན་ནས་སོག་ཡུལ་དུ་སྐུ་ཉིད་ཀྱི་ཆོས་ཕྱོགས་ཀྱི་མཛད་འཕྲིན་སྔར་ལྷག་རྒྱས་ངེས་པ་རེད། བོད་དང་སོག་པོ་དབར་གྱི་འབྲེལ་བ་ལ་དོགས་པ་དང་ཐེ་ཚོམ་མེད། ང་ཚོ་དཀའ་ངལ་ཆེ་བའི་དུས་སུ་གཅིག་ཕན་གཅིག་གྲོགས་བྱས་ཏེ་མི་རིགས་གཉིས་ཀྱི་འབྲེལ་བ་དོར་མེད་ཅེས་གསུངས། 

ཉིན་དེའི་ཕྱི་དྲོ་སོག་ཡུལ་གནས་འཁོད་རྒྱ་གར་གཞུང་ཚབ་སྐུ་ཞབས་ཨེམ་པི་སིངྒ་ (M.P Singn) ལགས་ཀྱིས་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ལ་ཕེབས་བསུ་ཞུས་ཤིང་། སྐུ་ཚབ་དོན་གཅོད་ཀྱིས་བོད་དང་སོག་པོའི་འབྲེལ་ལམ་སྐོར་ངོ་སྤྲོད་དང་། མ་འོངས་ལས་འཆར་ཁག་གི་ཐད་བགྲོ་གླེང་གནང་། ད་ལྟའི་ཆར་སོག་ཡུལ་ནང་གནས་སྡོད་བོད་མི་གྲངས་ ༣༠ ཙམ་ཡོད་པ་དང་། དེའི་ནང་ནས་ཕལ་ཆེ་བ་དགོན་སྡེ་ཁག་གི་དགེ་འདུན་པ་ཡིན། སྐབས་དེར་སོག་ཡུལ་བོད་རིགས་ཚོགས་པ་ཞིག་གསར་འཛུགས་གནང་ཐད་ཚོགས་འདུ་ཚོགས་ཡོད་པ་དང་། ཚོགས་འདུའི་ཐོག་རུ་སོག་སྐུ་ཚབ་དོན་གཅོད་ཀྱིས་འབྱུང་གྱུར་སོག་ཡུལ་དུ་བོད་རིགས་ཚོགས་པ་གསར་འཛུགས་གནང་རྒྱུའི་དམིགས་ཡུལ་གཙོ་བོ་ནི་བོད་མི་ནང་ཁུལ་རྡོག་རྩ་ཆིག་སྒྲིལ་ཡོང་རྒྱུ་དང་། བོད་ཀྱི་གནད་དོན་ཤུགས་ཆེ་ཇི་ལྟར་གཏོང་རྒྱུའི་ཐབས་ལམ་བཙལ་རྒྱུ། གཞུང་འབྲེལ་དེབ་འགོད་བྱས་པའི་ཚོགས་པའི་ངོ་བོའི་ཐོག་ལས་འགུལ་སྤེལ་རྒྱུའི་ཆེད་ཡིན། ང་ཚོའི་དྲང་བདེན་གྱི་འཐབ་རྩོད་དེ་ནམ་ཡང་བརྗེད་མི་ཉན་པ་དང་། བོད་མི་ཡིན་པའི་ཆ་ནས་ས་གནས་གང་དུ་གནས་ཀྱང་ང་ཚོའི་རང་དབང་སྲུང་སྐྱོབ་བྱ་དགོས་པའི་ལས་འགན་ང་ཚོར་ཡོད་ཅེས་དང་། གཞན་ཡང་སྐུ་ཚབ་དོན་གཅོད་ཀྱིས་ས་གནས་བོད་མི་རྣམས་ལ་སྲིད་སྐྱོང་དང་སྤྱི་འཐུས་གསར་པ་ཕེབས་རྗེས་བོད་མིའི་སྒྲིག་འཛུགས་ཀྱི་ཕྱག་ལས་གནང་ཕྱོགས་ཐད་ངོ་སྤྲོད་གནང་ཡོད། ཚོགས་འདུའི་རྗེས་ས་གནས་བོད་མི་རྣམས་ནས་དགོང་ཚིགས་ཤིག་གོ་སྒྲིག་ཞུས་ཡོད། 

ཉིན་ཤས་ནང་སྐུ་ཚབ་དོན་གཅོད་ཀྱིས་ས་གནས་ཀྱི་ནང་པ་དང་། གཞུང་ཁོངས་མིན་པའི་ཚོགས་པ་ཁག གཞུང་འབྲེལ་དཔོན་རིགས། ཤེས་ཡོན་སྡེ་ཁོངས་ཀྱི་མཁས་པ་དང་ལྷན་ཚོགས་འདུ་འཚོགས་གནང་གི་ཡོད་པ་བཅས།།