༄༅། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཐུགས་གཤིན་ཆེ་བའི་ཡེ་ཤུའི་བླ་ཆེན་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༦ ཉིན་སྐུ་ཚེ་མ་ཟིན་པའི་གནས་ཚུལ་ཐོན་འཕྲལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག བོད་མི་མང་སྤྱི་འཐུས་ཚོགས་གཙོ་མཆོག་བཅས་ནས་ཐུགས་གསོའི་གསུང་འཕྲིན་གནང་ཡོད་པ་དང་། དེ་རིང་སྟེ་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༧ ཉིན་གངས་སྐྱིད་སྲིད་སྐྱོང་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཀྱིས་སྨོན་ལམ་གསུང་འདོན་གནང་ཡོད།སྐབས་དེར་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འདས་པོ་དམ་པ་དེ་ཉིད་ལ་ཕྱིར་དྲན་གྱིས་ངོ་སྤྲོད་གནང་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚེ་འདིའི་ནང་སྙིང་ཉེ་བའི་གྲོགས་པོ་མང་པོ་ཡོད་པའི་ནང་ནས་གཙོ་བོ་གཉིས་ཡོད། གཅིག་དེ་ཚེ་འདས་རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨེ་པི་ཇེ་ཨབ་ཏུལ་ཀ་ལམ་ (A. P. J Abdul Kalam) མཆོག་རེད། གཞན་དེ་ཡེ་ཤུའི་བླ་ཆེན་ཌེ་སི་མོན་ཊུ་ཊུ་མཆོག་ཡིན་པ་རེད། ཁོང་ཁ་སང་འདས་གྲོངས་སུ་ཕྱིན་པར་བརྟེན་དེ་རིང་བོད་མིའི་སྒྲིག་འཛུགས་ཀྱི་ངོས་ནས་༸རྒྱལ་བ་རིན་པོ་ཆེའི་ཐུགས་ཉེ་བའི་གྲོགས་པོ་དང་བོད་དོན་ལ་དོ་སྣང་ཡོད་མཁན། འཛམ་གླིང་ནང་དཀའ་ངལ་འཕྲད་བཞིན་པའི་མི་མང་ལ་རོགས་རམ་གནང་རྒྱུར་འབད་རྩོལ་ལྷོད་མེད་གནང་མཁན་གང་ཟག་ཅིག་འདས་གྲོངས་སུ་གྱུར་བར་གཞུང་འབྲེལ་མཆོད་འབུལ་སྨོན་ལམ་གོ་སྒྲིག་ཞུས་པ་རེད།ཁོང་གི་སྐོར་ངོ་སྤྲོད་མདོར་ཙམ་ཞུས་ན། ཁོང་ཕྱི་ལོ་ ༡༩༣༡ ལོའི་ཟླ་བ་ ༡༠ ཚེས་ ༠༧ ཉིན་ལྷོ་ཨ་ཕི་རི་ཀའི་ས་ཁུལ་ཀི་ལག་སི་ཌོབ་ (Klerksdorp) ཞེས་པའི་ནང་འཁྲུངས་ཤིང་། ཁོང་བུ་ཕྲུག་གསུམ་པ་ཡིན། ཁོང་གི་སྐུ་ཟླ་ནི་ནོ་མ་ལི་ཛོ་ལཱེ་ཧ་ (Nomalizo Leah Shenxane) ལགས་ཡིན་ཞིང་། ཁོང་གཉིས་ལ་སྲས་བཞི་བྱུང་འདུག ཕྱི་ལོ་ ༡༩༨༥་་་༡༩༨༦ ལོར་ཁོང་ལ་ཇོ་ནས་བྷག་ཏུ་ཡེ་ཤུའི་ཆོས་པ་བྷི་ཤོབ་ (Bishop) ཞེས་པའི་མཚན་གནས་ཐོབ་འདུག་པ་དེ་ནི་མི་རིགས་ནག་པོ་ཞིག་ལ་མཚན་གནས་དེ་ཐོབ་པ་ཐེངས་དང་པོ་ཆགས་འདུག དེའི་རྗེས་ཀེབ་ཀྲ་ཧོན་ (Cape Town) གྱི་ (Arch Bischop) གནང་འདུག དེ་བཞིན་ཁོང་གིས་ལྷོ་ཨ་ཕི་རི་ཀའི་ཡེ་ཤུའི་ལྷ་ཁང་ལྷན་ཚོགས་ཀྱི་གཙོ་སྐྱོང་གནང་བ་དེ་འདྲ་ཡང་བྱུང་འདུག ཕྱི་ལོ་༡༩༨༤ ལོར་ནོ་ཝེལ་ཞི་བདེའི་གཟེངས་རྟགས་བཞེས་གནང་བ་དང་། དེ་ཡང་གཙོ་བོ་འཚེ་བ་མེད་པའི་ལས་འགུལ་སྤེལ་བ་དང་། ལྷོ་ཨ་ཕི་རི་ཀའི་ནང་མི་རིགས་དཀར་ནག་དབྱེ་འབྱེད་ཀྱི་དཀའ་རྙོག་གང་ཡོད་པ་ཚང་མ་འཚེ་བ་མེད་པ་དང་མི་མང་མཉམ་རུབ་ཀྱིས་ཕྱག་ལས་གནང་བའི་རྒྱུ་མཚན་ལ་བརྟེན་ནས་ནོ་ཝེལ་ཞི་བདེའི་གཟེངས་རྟགས་ཕུལ་འདུགལོ་ལྔའི་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོ་ཝེལ་ཞི་བདེའི་གཟེངས་རྟགས་བཞེས་གནང་བ་རེད། དེ་བཞིན་མགོན་པོ་གང་ཉིད་མཆོག་གིས་ཨིན་ཡུལ་གྱི་ཇོན་ཊེམ་པེལ་ཊེན་(John Templeton) ཞེས་པའི་སྙན་གྲགས་ཅན་གྱི་གཟེངས་རྟགས་བཞེས་གནང་ཡོད། ཕྱི་ལོ་ ༢༠༡༣ ལོར་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གིས་ཨིན་ཡུལ་གྱི་ཇོན་ཊེམ་པེལ་ཊེན་གཟེངས་རྟགས་བཞེས་གནང་འདུག ཕྱི་ལོ་ ༢༠༡༢ ལོར་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མགྲོན་རང་བྱས་ནས་རྡ་ས་ཐེངས་དང་པོ་ཕེབས་ཡོད་པ་མ་ཟད། ཕྱི་ལོ་ ༢༠༡༥ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ལ་ཕེབས་པའི་༧སྐུའི་གྱ་སྟོན་གྱི་སྔོན་ཙམ་ལ་རྡ་སར་ཕེབས་སྐབས་ཕྲན་རང་བོད་མི་མང་སྤྱི་འཐུས་ཚོགས་གཙོ་དང་སྲིད་སྐྱོང་བློ་བཟང་སེངྒེ་ལགས་རེད། ངེད་གཉིས་གནམ་ཐང་དུ་ཕེབས་བསུར་བཅར་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཌེ་སི་མོན་ཊུ་ཊུ་མཆོག་རྣམ་གཉིས་ཐུགས་ཉེ་པོ་ཇི་ཙམ་ཡོད་མེད་དངོས་སུ་མཇལ་རྒྱུའི་གོ་སྐབས་བྱུང་། ཁོང་རྣམ་གཉིས་འཛོམས་པའི་སྐབས་བྱིས་པ་ཆུང་ངུ་གཉིས་འཛོམས་པ་ནང་ལྟར་ཕན་ཚུན་སྐུ་རྩེད་དང་ཐུགས་འདྲི་བོ་ཇི་ཙམ་ཡོད་མེད་མཇལ་རྒྱུའི་གོ་སྐབས་བྱུང་བ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཡེ་ཤུའི་བླ་ཆེན་ཊུ་ཊུ་རྣམ་གཉིས་དབར་བགྲོ་གླེང་མཛད་པ་ཕྱོགས་སྒྲིག་དཔེ་དེབ་སྤྲོ་དེབ། (Book Of Joy) ཞེས་པ་འདི་དེང་སྐབས་འཛམ་གླིང་ནང་མི་མང་པོ་ཞིག་གིས་ལྟ་ཀློག་དང་དོ་སྣང་སྤྲོད་ཡུལ་གྱི་དེབ་ཅིག་ཆགས་ཡོད།ལོ་རྒྱུས་ཞིབ་ཕྲ་རེ་རེ་བཞིན་འགྲོ་མི་དགོས་པར་དེ་རིང་ང་ཚོ་བོད་མིའི་སྒྲིག་འཛུགས་ཀྱི་ངོས་ནས་ཌེ་སི་མོན་ཊུ་ཊུ་མཆོག་ལ་ཆེས་མཐོང་གི་ཚུལ་དུ་ནང་མི་རྣམས་ལ་ཐུགས་གསོའི་ཕྱག་བྲིས་ཕུལ་ཡོད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མི་མང་སྤྱི་འཐུས་ལྷན་ཚོགས་ནས་ཀྱང་ཕྱག་བྲིས་ཕུལ་གནང་ཡོད་པ་རེད།   ང་རང་སྒེར་གྱི་ངོས་ནས་ཁོང་གི་ནང་མི་དང་མཇལ་རྒྱུའི་གོ་སྐབས་བྱུང་། ཚང་མས་ཐུགས་སྨོན་སྐྱབས་འཇུག་ཡག་པོ་གནང་རོགས། ཞེས་གསུང་བཤད་གནང་རྗེས་ཕྱི་དྲོ་ཆུ་ཚོད་ ༤ བར་སྨོན་ལམ་གསུང་འདོན་གནང་ཡོད་པ་དང་ཉིན་རྒྱབ་ཆུ་ཚོད་ ༤ ནས་གཞུང་འབྲེལ་མྱ་ངན་གུས་འདུད་མཚོན་ཕྱིར་དབུས་ཀྱི་ལས་ཁུངས་ཁག་ལས་མཚམས་བཞག་ཡོད་པ་བཅས།།