༄༅། །སུད་སི་སྐུ་ཚབ་དོན་གཅོད་ཁང་དང་ཕ་རཱན་སི་བོད་རིགས་ཚོགས་པ་གཉིས་ཀྱིས་གོ་སྒྲིག་ཞུས་པའི་ཡུ་རོབ་བོད་རིགས་ཚོགས་པ་ཁག་གི་ལོ་འཁོར་ཚོགས་ཆེན་ཐེངས་གཉིས་པ་ཕྱི་ལོ་ ༢༠༢༡ ཟླ་ ༡༢ ཚེས་ ༡༩ ཉིན་མཇུག་སྒྲིལ་ཡོད་པ་དང་། ཚོགས་ཆེན་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུ་དང་། བོད་མིའི་སྒྲིག་འཛུགས་ཀྱི་སྲིད་བྱུས་དང་ལམ་སྟོན་ཁག་ལག་བསྟར་ཞུ་རྒྱུར་དམ་བཅས་འདུག 

ཚོགས་མི་རྣམས་ནས་སྤྱི་མོས་ཐོག་གཏན་འབེབས་གནང་བའི་གྲོས་ཆོད་གཤམ་གསལ། 

༡༽ བོད་ཀྱི་སྐད་ཡིག སྲོལ་རྒྱུན། རིག་གཞུང་ཐད།   བོད་རྒྱུད་ནང་བསྟན་དང་། བོད་ཀྱི་ལོ་རྒྱུས། སྲོལ་རྒྱུན། རིག་གཞུང་བཅས་ཀྱི་ཐོག་གསུང་བཤད་དང། དབྱར་དུས་འཛིན་གྲྭ གཟའ་མཇུག་སློབ་གྲྭའི་དགེ་རྒན་རྣམས་ལ་ཟབ་སྦྱོང་གོ་སྒྲིག་ཞུ་རྒྱུ། 

༢༽ ཆབ་སྲིད་ལས་འགུལ་ཐད། ཡུ་རོབ་སྤྱི་མཐུན་ཚོགས་པ་གཙོས་པའི་ཡུ་རོབ་རྒྱལ་ཁབ་སོ་སོར་རྒྱལ་ཁབ་གཞན་ལྟར་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་སུ་ཆབ་སྲིད་མི་སྣ་གཏོང་གནང་མི་ཡོང་བའི་འབོད་སྐུལ་ཞུ་ཡིག་དབུལ་རྒྱུ་དང་། ཕྱི་ལོ་ ༢༠༢༢ ཟླ་ ༠༡ ཚེས་ ༠༤ ཉིན་རྒྱལ་ཁབ་སོ་སོའི་ནང་བོད་སྐྱོབས། པེ་ཅིང་ ༢༠༢༢ ལ་མཉམ་ཞུགས་མ་བྱོས། བོད་ནང་མི་གསོད་ཁྲག་སྦྱོར་མཚམས་འཇོག་དགོས་སོགས་ཀྱི་ཕྲེད་དར་ཐོགས་ཏེ་ངོ་རྒོལ་གོ་སྒྲིག་ཞུ་རྒྱུ། དེ་བཞིན་ཕྱི་ལོ་ ༢༠༢༢་ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ཀྱི་འགོ་འབྱེད་མཛད་སྒོ་དང་སྟབས་བསྟུན་སུད་སི་བོད་མི་རྣམས་ནས་ལའུ་ས་ནེ་ (Lausanne) རུ་གོ་སྒྲིག་ཞུ་རྒྱུའི་ངོ་རྒོལ་སྐད་འབོད་ནང་ས་གནས་སོ་སོ་ནས་བོད་མི་གང་མང་འདུ་བསྐོང་ཐུབ་པ་དགོས་རྒྱུ། ཕྱོགས་མཚུངས་གྲོས་ཚོགས་དང་། ས་གནས་ཀྱི་ཆབ་སྲིད་མི་སྣ། བོད་དོན་རྒྱབ་སྐྱོར་ཚོགས་པ་དང་ལྷན་འབྲེལ་བ་གོང་མཐོར་གཏོང་རྒྱུ་དང་ཟུང་སྦྲེལ་ལས་འགུལ་སྤེལ་རྒྱུ།