༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༨ དང་ ༡༩ བཅས་ཉིན་གྲངས་གཉིས་རིང་ཡུ་རོབ་བོད་མི་མང་སྤྱི་འཐུས་རྣམ་གཉིས་དང་། ཡུ་རོབ་སྐུ་ཚབ་དོན་གཅོད་རྣམ་པ་གསུམ་ཐུན་མོང་གིས་གཙོ་འགན་བཞེས་ཏེ། ཕ་རཱན་སི་བོད་རིགས་ཚོགས་པ་དང་སུད་སི་སྐུ་ཚབ་དོན་གཅོད་ཁང་གཉིས་ཀྱི་གོ་སྒྲིག་འོག་ཡུ་རོབ་བོད་རིགས་ཚོགས་པ་ཁག་གི་ལོ་འཁོར་ཚོགས་ཆེན་ཐེངས་གཉིས་པ་ཕ་རཱན་སིའི་རྒྱལ་ས་པེ་རི་སིར་རྟེན་གཞི་བྱས་པའི་རིག་པ་ཆོས་ཚོགས་སུ་ཚོགས་ཡོད།དེ་ཡང་ཡུ་རོབ་བོད་རིགས་ཚོགས་པ་ཆེ་ཁག་སྟེ་ཨོསྟྲི་ཡཱ་དང་། བེལ་ཇི་ཡམ། ཅེཀ་སྤྱི་མཐུན་རྒྱལ་ཁབ། ཕ་རཱན་སི། ཇར་མ་ནཱི།  ཨི་ཊ་ལཱི། ནི་དར་ལེནྜ། པོ་ལེནྜ། སུད་སི། སི་པན་བཅས་ཀྱི་ཚོགས་གཙོ་དང་ཚོགས་གཞོན་སོགས་ཚོགས་བཅར་བ་ཉི་ཤུ་དང་ལས་བྱེད་ཁག་གཅིག་བཅས་མཉམ་ཞུགས་ཐོག་ཡུ་རོབ་བོད་རིགས་ཚོགས་པ་ཁག་ཕན་ཚུན་འབྲེལ་བ་དམ་ཟབ་ཐོག་༧རྒྱལ་བའི་བཀའ་དགོངས་འགལ་མེད་སྒྲུབ་རྒྱུ་དང་། བོད་མིའི་སྒྲིག་འཛུགས་ལ་དབུ་འོག་དཔུང་འདེགས་ཞུ་ཕྱོགས་སྐོར། ཆོས་དང་རིགས་གཞུང་སྐད་ཡིག་སོགས་འཛིན་སྐྱོང་སྤེལ་གསུམ་བྱེད་ཕྱོགས་སྐོར། ཐུན་མོང་གིས་གཞི་རྒྱ་ཆེ་བའི་ཆབ་སྲིད་ཀྱི་ལས་འགུལ་སྤེལ་ཕྱོགས་སྐོར། ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ལ་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་ཕྱོགས་སོགས་ཀྱི་སྐོར་བགྲོ་གླེང་དང་གྲོས་བསྡུར་ལྷུག་པོར་གནང་སྟེ་གྲོས་ཆོད་ཁག་ལྔ་གཏན་འབེབས་དང་། ལོ་འཁོར་ཚོགས་ཆེན་ཐེངས་གསུམ་པ་ཚོགས་ཡུལ་གཏན་ཁེལ་བཅས་ཀྱི་སྒོ་ནས་ཚོགས་འདུ་རྒྱལ་ཁའི་ངང་གྲོལ་ཡོད་པ་བཅས། །