༄༅། །དབུས་འོས་བསྡུ་ལས་ཁང་གི་ལས་བྱ་ཁ་ལོ་བ་དཔལ་ལྡན་ཚེ་རིང་ལགས་ཕྱི་ལོ་ ༢༠༢༡ ཟླ་ ༡༢ ཚེས་ ༦ རེས་གཟའ་ཟླ་བ་ཉིན་གྱི་ཞོགས་པར་གློ་བུར་དུ་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་བཀའ་ཤག་ཏུ་སྙན་སེང་བྱུང་བར་ཐུགས་ཕམ་དང་བཅས་འདས་པོ་དེ་ཉིད་ཀྱིས་ཚེ་རབས་ཕྲེང་བ་ནས་བསགས་པའི་སྡིག་སྒྲིབ་བྱང་ཞིང་དག་ནས་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་ཆེད། དེ་རིང་ཕྱི་ཚེས་ ༦ ཉིན་གྱི་ཕྱེད་ཡོལ་ཆུ་ཚོད་ ༣ ཐོག་གངས་སྐྱིད་སྲིད་སྐྱོང་ཚོགས་ཁང་ནང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་ཚེ་འདས་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་སྨོན་ལམ་གསུང་འདོན་གནང་། དེ་རྗེས་འདས་པོ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ཕྱེད་ཡོལ་ཆུ་ཚོད་ ༤ ནས་དབུས་ལས་ཁུངས་ཁག་ལས་མཚམས་བཞག་ཡོད།
དེ་ཡང་ཚེ་འདས་ཁོང་ནི། ཕྱི་ལོ་ ༡༩༦༦ ཟླ་ ༠༧ ཚེས་ ༠༡ ཉིན་སྐྱེས་ཤིང་། གཞི་རིམ་སློབ་སྦྱོང་མན་སྤར་ཉིན་སློབ་ནས་གནང་། ཕྱི་ལོ་ ༢༠༡༠ ཟླ་ ༠༢ ཚེས་ ༠༤ ཉིན་སྲི་ཞུའི་ལས་བྱེད་དུ་གསར་བསྐོ་གནང་སྟེ་ཕྱི་ལོ་ ༢༠༡༠ ཟླ་ ༠༢ ཚེས་ ༢༢ ཉིན་རྡོར་གླིང་ས་གནས་འགོ་འཛིན་ལས་ཁུངས་ཀྱི་ཚོད་ལྟའི་ཡིག་གད་དང་ཁ་ལོ་བར་བསྐོ་གཞག་གནང་། ཕྱི་ལོ་ ༢༠༡༠ ཟླ་ ༡༠ ཚེས་ ༠༤ ཉིན་རྡོར་གླིང་ས་གནས་འགོ་འཛིན་ལས་ཁུངས་ཀྱི་ཁ་ལོ་བ་ངོ་མར་བསྐོ་གཞག་གནང་། ཕྱི་ལོ་ ༢༠༡༡ ཟླ་ ༠༦ ཚེས་ ༡༦ ཉིན་མན་ཌི་ས་གནས་འགོ་འཛིན་ལས་ཁུངས་ཀྱི་ཡིག་གད་དང་ཁ་ལོ་བར་གནས་སྤོས། ཕྱི་ལོ་ ༢༠༡༤ ཟླ་ ༤ ཚེས་ ༠༡ ཉིན་ནས་དབུས་འོས་བསྡུ་ལས་ཁང་གི་ཁ་ལོ་བར་གནས་སྤོས་གནང་ཡོད་པ་བཅས། །
