༄༅། །འདི་གར་མེའོ་ཆོས་འཕེལ་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ལས་ཚབ་ལས་དྲུང་བསྟན་འཛིན་རང་གྲོལ་ལགས་དང་། ཚབ་གསར་ས་གནས་འགོ་འཛིན་རྡོ་རྗེ་རིག་འཛིན་ལགས་དབར་ལས་འགན་རྩིས་སྤྲོད་རྩིས་ལེན་གནང་ཡོད། དེ་ཡང་ཕྱི་ལོ་ ༢༠༢༡ ཟླ་ ༡༢ ཚེས་ ༡༦ ཉིན་གྱི་སྔ་དྲོར་ས་གནས་འགོ་འཛིན་གསར་པས་ལས་བཅར་ཞུས་མ་ཐག་ས་གནས་ཀྱི་གནད་ཡོད་མི་སྣ་ཁག་དང་མཇལ་འཕྲད་གནང་མཚམས་ཉིན་རྒྱབ་རྩིས་སྤྲོད་རྩིས་ལེན་དངོས་སུ་འགོ་འཛུགས་ཞུས་ཡོད་པ་དང་། ཚེས་ ༡༧ ཉིན་ཡང་མུ་མཐུད་རྩིས་སྤྲོད་ལེན་མཇུག་སྐྱོང་གིས་རྩིས་སྤྲོད་རྩིས་ལེན་གྱི་ལས་དོན་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་ཏུ་སྤྲོད་དཔང་ཏེ་ཛུ་དར་རྒྱས་གླིང་གི་ས་གནས་འགོ་འཛིན་བསྟན་འཛིན་རྣམ་རྒྱལ་ལགས་དབུ་བཞུགས་ཐོག་ས་གནས་འགོ་འཛིན་གསར་པར་ཞབས་སྟེགས་རྩིས་སྤྲོད་དང་། དེ་རྗེས་གཞིས་ཆགས་ཀྱི་ཚོགས་ཁང་ནང་མི་མང་འདུ་འཛོམས་ཐོག་ལས་དྲུང་ནས་ལས་དོན་མཇུག་སྐྱོང་གནང་དགོས་ཁག་ངོ་སྤྲོད་གནང་ཡོད། དེ་བཞིན་ནང་སྲིད་སྐུ་ཚབ་སྤྲོད་དཔང་ནས་རྩིས་སྤྲོད་རྩིས་ལེན་ཀྱི་ལས་རིམ་སྐོར་དང་གཟིགས་ཚུལ་སྐོར་གསུང་བཤད་གནང་གྲུབ་རྗེས་ས་གནས་འགོ་འཛིན་གསར་པས་འཚམས་འདྲིའི་གསུང་བཤད་གནང་སྟེ་རྩིས་སྤྲོད་རྩིས་ལེན་གྱི་ལས་རིམ་ལེགས་གྲུབ་བྱུང་ཡོད་པ་བཅས། །