༄༅། །འདི་གར་མན་སྤར་ཕན་བདེ་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༢ ཚེས་ ༡༠ རེས་གཟའ་པ་སངས་ཉིན་མན་སྤར་ཕན་བདེ་གླིང་བོད་མིའི་གཞིས་ཆགས་སུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་སྦེལ་ཞི་བདེ་གཟེངས་རྟགས་ཕུལ་ནས་མི་ལོ་ ༣༢ འཁོར་བའི་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦ ཐོག་མན་སྤར་ཕན་བདེ་གླིང་གཞིས་གྲོང་སོ་སོའི་ནང་མགོན་པོ་གང་ཉིད་མཆོག་༸སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ལྷུན་གྱི་གྲུབ་ཆེད་དཀར་ཕྱོགས་སྐྱོང་བའི་ལྷ་སྲུང་རྣམས་ལ་འཕྲིན་བསྐུལ་དང་བསང་གསོལ་བཏང་ཡོད།
དེ་རྗེས་ཆུ་ཚོད་ ༨ ཙམ་ལ་གཞིས་གྲོང་དང་པོར་རྟེན་གཞི་བྱས་པའི་དྭགས་པོ་བཤད་སྒྲུབ་གླིང་དགོན་པར་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་དང་། ས་འཐུས་ཚོགས་གཙོ་སངས་རྒྱས་བསྟན་འཛིན་ལགས། གཞན་ཡང་ས་གནས་ཀྱི་ལས་སྣེ་དང་མི་མང་བཅས་ཚང་འཛོམས་ཀྱིས་ཐོག་མར་ས་འཐུས་ཚོགས་གཙོ་དང་ས་གནས་འགོ་འཛིན་རྣམ་གཉིས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་སྐུ་ཁམས་དང་མཐུན་པའི་སྐུ་རླུང་དར་འཛུགས་དང་དཀར་ཕྱོགས་སྐྱོང་བའི་ལྷ་སྲུང་མཐུ་བོ་ཆེ་རྣམས་ཀྱི་དབུ་འཕང་དགུང་དུ་འདེགས་པའི་བསང་མཆོད་ཟབ་རྒྱས་བཏང་སྟེ་དྭགས་པོ་བཤད་སྒྲུབ་གླིང་དགོན་པའི་མདུན་ཐང་དུ་གཞུང་འབྲེལ་མཛད་སྒོ་དངོས་སུ་དབུ་འཛུགས་ཀྱིས་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་འབྲེལ་བོད་བསྟན་སྲིད་མི་རིགས་ཀྱི་ཆེད་དུ་རང་སྲོག་བློས་གཏོང་གནང་མཁན་གྱི་རྒྱལ་གཅེས་པ་རྣམས་ཀྱི་ཆེད་སྐར་མ་གཅིག་རིང་མྱ་ངན་གུས་འདུད་ཞུས་ཡོད།
དེ་ནས་སློབ་གྲྭའི་སློབ་ཕྲུག་ནས་ནོ་སྦེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་གྲུབ་མཚམས་ས་གནས་འགོ་འཛིན་བསྟན་འཛིན་ཟླ་སྒྲོན་ལགས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་གནང་གྲུབ་བསྟུན་ས་འཐུས་ཚོགས་གཙོ་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་། ཕྱོགས་མཚུངས་ས་གནས་འཛིན་དང་ས་འཐུས་ཚོགས་གཙོ་རྣམ་གཉིས་ཀྱིས་སློབ་གྲྭའི་སློབ་ཕྲུག་བུ་དང་བུ་མོ་རྩེ་ཕུད་གཉིས་ལ་བྱ་དགའ་གསོལ་རས་གནང་།
མཐར་ས་གནས་མཉམ་འབྲེལ་དྲུང་ཆེ་བསྟན་འཛིན་དཔལ་འབྱོར་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།
