༄༅། །སུད་སི་སྐུ་ཚབ་དོན་ཁང་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཐོག་གི་གླེང་སྟེགས་སུ་བོད་ནང་གི་གནས་སྟངས་གླེང་བའི་ཐོག་རྒྱ་ནག་གཞུང་གིས་བོད་མི་རྣམས་ཀྱི་ལོ་རྒྱུས་དང་། སྤྱི་ཚོགས། རིག་གཞུང་ལ་གུས་བརྩི་ཞུས་ཏེ་ཁོང་ཚོའི་དཀའ་སྡུག་སེལ་དགོས་པའི་རེ་སྐུལ་བཏོན་འདུག 

དེ་ཡང་སུད་སི་སྐུ་ཚབ་དོན་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས་གླེང་སྟེགས་སུ་རྒྱ་ནག་གཞུང་གིས་བོད་ནང་ལག་བསྟར་བྱས་པའི་སྤྱི་ཚོགས་ཀྱི་སྒྲོམ་གཞི་དང་། མི་འབོར་གྲངས་ཚད་འགྱུར་ལྡོག བོད་ཀྱི་ལོ་རྒྱུས་དང་རིག་གཞུང་སློབ་གཉེར་བྱ་རྒྱུའི་གོ་སྐབས་མེད་པ། ལས་ཀའི་གོ་སྐབས་མེད་པའི་སྐོར་གླེང་སློང་གནང་ཡོད། གཞན་ཡང་ཁོང་མོས་གནས་སྟངས་དེ་དག་ལ་བརྟེན་ནས་བོད་ནང་གི་བོད་མིས་ངོ་རྒོལ་ཞི་འབོད་དང་། བོད་མི་ ༡༥༥ ལྷག་གིས་རང་ལུས་མེར་སྲེག་བཏང་ཡོད་པ་རེད་ཅེས་གསུངས། 

མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཐོག་གི་གླེང་སྟེགས་ནི། ཕྱི་ལོ་ ༢༠༢༡ ཟླ་ ༡༢ ཚེས་ ༢ ནས་ ༣ བར་ཚོགས་ཡོད་པ་དང་། གླེང་སྟེགས་སུ་གྲངས་ཉུང་མི་རིགས་དང་འབྲེལ་བའི་དེང་རབས་ཀྱི་དཀའ་རྙོག་གི་རྒྱུ་རྐྱེན་དང་། ཁྲིམས་དང་སྒྲིག་འཛུགས་ཀྱི་སྒྲོམ་གཞི། དཀའ་རྙོག་གི་སྔོན་འགོག གྲངས་ཉུང་མི་རིགས་ཀྱི་ཐོབ་ཐང་སྲུང་སྐྱོབ་སྐོར་བགྲོ་གླེང་གནང་ཡོད་པ་རེད། 

སྐལ་ལྡན་མཚོ་མོ་ལགས་ཀྱིས་གླེང་སྟེགས་སུ་རྒྱ་ནག་གཞུང་གིས་ཉེ་ལམ་དཀར་མཛེས་ཁུལ་བྲག་མགོ་དགོན་པའི་དགེ་ལྡན་ནང་བསྟན་སློབ་གྲྭ་གཏོར་བཤིག་བྱས་པ་མཚོན་བོད་སྐད་ཐོག་སློབ་ཁྲིད་བྱེད་པའི་སློབ་གྲྭ་ཁག་དང་། སྤྱིར་བཏང་གི་བོད་ཡིག་སློབ་ཁྲིད་འཛིན་གྲྭ་རྣམས་སྒོ་བརྒྱབ་ཡོད་པའི་སྐོར་དང་། ལས་ཀའི་གོ་སྐབས་ཕལ་མོ་ཆེ་གཞུང་གིས་བོད་མི་འདུས་སྡོད་ཁག་ཏུ་སྡེབ་བསྡུས་བྱས་པའི་རྒྱ་མི་རིགས་ཀྱིས་བཟུང་བར་བརྟེན་བོད་རིགས་སློབ་ཐར་སོན་པ་རྣམས་ལ་ལས་ཀ་ཐོབ་ཀྱི་མེད་སྐོར་གསལ་སྟོན་ཞུས་ཡོད།  ཕྱོགས་མཚུངས་སྐལ་ལྡན་མཚོ་མོ་ལགས་ཀྱིས་རྒྱ་ནག་གཞུང་གིས་བོད་མིའི་ངོ་བོ་དེ་རྒྱ་ནག་གི་ཁྱད་ཆོས་ལྡན་པར་བཟོ་བའི་འབད་བརྩོན་འོག་བོད་མི་དང་། དེའི་ངོ་བོ་མཚོན་པའི་སྐད་ཡིག་རིག་གཞུང་རྩ་བརླག་ཏུ་འགྲོ་ཉེན་ཡོད་སྐོར་གསུངས།

གཞན་ཡང་སྐལ་ལྡན་མཚོ་མོ་ལགས་ཀྱིས་དཀའ་ངལ་དེ་དག་སེལ་ཐབས་སུ་ཡུན་གནས་ཀྱི་ཐབས་ལམ་གང་ཡོད་སྐོར་གསུངས་དོན། རྒྱ་ནག་གཞུང་གིས་བོད་མིའི་ལོ་རྒྱུས་དང་། སྤྱི་ཚོགས། རིག་གཞུང་ལ་གུས་བརྩི་ཞུས་པའི་ཐོག་བོད་མིའི་དཀའ་སྡུག་སེལ་དགོས་པར་རེེ་སྐུལ་བཏོན་པ་མ་ཟད། རྒྱ་ནག་གཞུང་གིས་གཉིས་སྨན་དབུ་མའི་ལམ་གཞིར་བཞག་ཐོག་བོད་མིའི་སྐུ་ཚབ་ལྷན་ཞི་མོལ་གནང་དགོས་པའི་སྐོར་དང་། མཉམ་འབྲེལ་རྒྱལ་ཚོགས་ཀྱིས་བསྐོས་པའི་རང་དབང་ཅན་གྱི་ཁྱད་ལས་པ་རྣམས་ལ་རྒྱ་ནག་གཞུང་གི་དབང་འོག་ཏུ་ཡོད་པའི་བོད་མི་རྣམས་ལ་འཕྲད་བཞིན་པའི་དཀའ་ངལ་རྣམས་ཤེས་རྟོགས་ཐུབ་པ་དགོས་རྒྱུ་དང་། དེ་བཞིན་སྤྱི་ཚོགས་ནས་ཟུར་འདོན་བྱེད་པའི་རྒྱུད་རིམ་དང་། རིག་གཞུང་རྩ་གཏོར་བཅས་ཀྱི་ཐད་དོ་སྣང་བྱེད་དགོས་པའི་རེ་འདུན་བཏོན་ཡོད་པ་བཅས།།