༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༢ ཚེས་ ༨ རེས་གཟའ་ལྷག་པའི་ཉིན་ཨ་རི་ནིའུ་ཡོག་ཏུ་བྱང་ཨ་རི་བོད་ཀྱི་སྐུ་ཚབ་དོན་གཅོད་ཁང་གི་གོ་སྒྲིག་དང་ས་གནས་བོད་རིགས་སྤྱི་མཐུན་ཚོགས་པའི་མཐུན་འགྱུར་འོག་བོད་རྒྱ་མི་རིགས་གཉིས་མཉམ་འཛོམས་ཀྱིས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༣༢ ཧྲིལ་པོ་འཁོར་བའི་དུས་དྲན་སྲུང་བརྩི་ཞུས་ཡོད་པ་དང་། མཛད་སྒོའི་ཐོག་རྒྱ་རིགས་སྐུ་མགྲོན་དང་དེ་བཞིན་རྒྱ་རིགས་མི་གྲངས་བརྒྱ་ལྷག་དང་བོད་རིགས་ལྔ་བཅུ་ལྷག་ལྷན་འཛོམས་དུ་ཕེབས་ཡོད། དེ་ཡང་མཛད་རིམ་དེ་བཞིན་བོད་རྒྱ་མི་རིགས་མཉམ་དུ་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་སྐལ་བརྒྱར་བརྟན་པའི་ཞལ་འདོན་གསོལ་འདེབས་དབུ་འཛུགས་གནང་བ་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ཚོགས་འཛོམས་ལ་ཕེབས་པའི་ས་གནས་བོད་མིའི་ཚོགས་པ་ཁག་གི་སྐུ་ཚབ་རྣམ་པ་དང་རྒྱ་རིགས་སྐུ་མགྲོན་དང་མཉམ་ཞུགས་གནང་མཁན་ཡོངས་ལ་འཚམས་འདྲི་དང་འབྲེལ་ནད་ཡམས་ཀྱི་འགྲོ་འོང་བཀག་བསྡོམས་རྗེས་བོད་རྒྱ་མི་རིགས་གཉིས་མཉམ་དུ་དངོས་སུ་ཐུག་འཕྲད་ཀྱི་ལྷན་འཛོམས་དང་པོ་དེ་ལ། བོད་རྒྱ་འབྲེལ་མཐུད་ཀྱི་ལས་དོན་ནི་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཙོ་བོ་དབུ་མའི་ལམ་གྱི་སྲིད་བྱུས་ལས་བྱུང་བ་ཡིན་པ་དྲན་པའི་ཐོག  བོད་རིགས་དང་རྒྱ་རིགས་གཉིས་མཉམ་འཛོམས་ཐོག་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་ཀྱི་ཉིན་མོ་སྲུང་བརྩི་ཞུས་པ་འདིས་ལོ་རྒྱུས་ཀྱི་དེབ་ཐེར་ཐོག་བརྡ་ལན་ཞིག་འཇོག་ཐུབ་རྒྱུ་ཡིན་པར་བརྟེན་ཚོགས་འཛོམས་ཐོག་ཕེབས་མཁན་ཡོངས་ལ་བྱང་ཨ་རི་སྐུ་ཚབ་དོན་གཅོད་ཁང་གི་ཚབ་བྱས་ནས་བཅོས་མིན་གྱི་དགའ་བསུ་ཞུས་ཡོད།དེ་ནས་སྐུ་མགྲོན་གཙོ་བོ་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་འདས་པའི་བདུག་ཕྲག་ནང་ལས་འགན་རྩིས་ལེན་ཞུས་ནས་ཕྱི་ལོ་ ༢༠༢༡ ཟླ་ ༡༢ ཚེས་ ༣ ཉིན་ནས་དོན་གཅོད་ཀྱི་ལས་གནས་སུ་དངོས་སུ་ཕེབས་པ་དང་། དེ་རིང་གི་ཚོགས་འཛོམས་ལ་ཕེབས་ཐུབ་པ་དགའ་སྤྲོ་བྱུང་ཞེས་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས། གོ་ལ་གཅིག་གྱུར་གྱི་ལས་འགན་དང་། དེ་བཞིན་བོད་དོན་དཀའ་རྙོག་སེལ་ཐབས་ལ་དབུ་མའི་ལམ་གྱི་སྲིད་བྱུས་ནི་གོང་ས་མཆོག་གི་དགོངས་བཞེད་ཡིན་པ་དང་བོད་མིའི་སྒྲིག་འཛུགས་ཀྱི་ངོས་ནས་ཀྱང་གཏན་འཇགས་ཐབས་ཇུས་འཆར་འགོད་ཚོགས་ཆུང་བཀོད་ནས་དབུ་མའི་ལམ་གྱི་སྲིད་བྱུས་གཞིར་བཟུང་ལས་དོན་སྒྲུབ་བཞིན་ཡོད་པ་འགྲེལ་བརྗོད་གནང་།

གཞན་ཡང་སྐུ་ཚབ་དོན་གཅོད་ཀྱིས་ལོ་རྒྱུས་རྒྱབ་ལྗོངས་ཤེས་རྟོགས་དགོས་པ་ནི་ཧ་ཅང་གལ་ཆེན་ཡིན་པ་དང་། ད་ལྟ་རྒྱ་ནག་ནང་ལོ་རྒྱུས་ཀྱི་གནས་ཚུལ་མང་པོ་སྦས་སུབ་བྱས་ཡོད་པ་དཔེར་ན་དྲུག་བཞིའི་དོན་རྐྱེན་གྱི་གནས་ཚུལ་དྲ་ཐོག་ནས་གཞོན་སྐྱེས་ཚོས་འཚོལ་མི་ཐུབ་པ་ལྟ་བུ་ཡིན་པར་བརྟེན་འདིར་ཕེབས་པའི་རྒྱ་རིགས་གྲོགས་པོ་རྣམས་ཀྱིས་བོད་དོན་སྐོར་དངོས་ཡོད་གནས་ཚུལ་མང་པོ་མཁྱེན་བཞིན་ཡོད་སྟབས། རྒྱ་ནག་སྐམ་སར་བཞུགས་པའི་རྒྱ་ཆེའི་རྒྱ་རིགས་མི་མང་གིས་ཤེས་རྟོགས་ཐུབ་པར་འབད་བརྩོན་བྱེད་དགོས་པའི་འབོད་སྐུལ་གནང་། མགྲོན་འབོད་སྐུ་མགྲོན་རྒྱ་རིགས་རྩོམ་པ་པོ་གྲགས་ཅན་པེ་ཅིང་དཔྱིད་ཀའི་དུས་དེབ་ཀྱི་རྩོམ་སྒྲིག་པ་སྐུ་ཞབས་ཧུ་ཕིང་ལགས་ཀྱིས། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་སུམ་ཅུ་སོ་གཉིས་འཁོར་བའི་དུས་དྲན་ནས་གཟེངས་རྟགས་དེའི་ཆེ་བསྟོད་ལ་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་མཚན་སྙན་གྲགས་ཀྱིས་གཟི་བརྗིད་ཆེ་རུ་ཕྱིན་ཡོད་པ་དང་། རྒྱ་ནག་ནང་མང་གཙོའི་ལས་འགུལ་ལ་དྲག་གནོན་ཤུགས་ཆེ་བྱས་པའི་སྐབས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་གཟེངས་རྟགས་འདི་འབུལ་པར་སྐབས་དེར་རྒྱ་རིགས་མང་པོར་སེམས་འགུལ་ཆེན་པོ་བྱུང་ཡོད་པ་མ་ཟད། སྐུ་ཞབས་ལིའུ་ཞོའོ་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་ཐོབ་པ་ནི་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གིས་རྒྱབ་གཉེར་ཤུགས་ཆེ་གནང་བ་ལ་བརྟེན་ནས་ཡིན་པ་འགྲེལ་བརྗོད་གནང་།གཞན་ཡང་ཁོང་གིས་མུ་མཐུད་བརྗོད་དོན། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་རམ་ས་ལ་དང་འཛམ་གླིང་ཡུལ་གྲུ་གང་སར་ཆིབས་སྒྱུར་སྐབས་རྒྱ་རིགས་ཤེས་ཡོན་ཅན་དང་སློབ་ཕྲུག་སོགས་དང་དམིགས་བསལ་ཐུག་འཕྲད་གནང་སྟེ་བོད་དོན་དང་མགོན་པོ་གང་ཉིད་ཀྱི་དགོངས་པ་གང་ཡིན་གསལ་པོ་གསུངས་ཡོད་པ་མ་ཟད། ས་གནས་གང་སར་ཡོད་པའི་བོད་མི་རྣམས་ནས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་བཀའ་གཞིར་བཟུང་རྒྱ་བོད་འབྲེལ་མཐུད་ཀྱི་ལས་དོན་ལ་རྒྱབ་སྐྱོར་ཤུགས་ཆེ་བྱེད་བཞིན་པར་བརྟེན། རྒྱ་རིགས་ཤེས་ཡོན་ཅན་ཚོས་ཀྱང་ནུས་པ་གང་ཡོད་ཀྱིས་བོད་ཀྱི་གནས་ཚུལ་དངོས་རྣམས་རྒྱ་ནག་སྐམ་སར་ཡོད་པའི་རྒྱ་རིགས་རྣམས་ལ་ཤེས་རྟོགས་བྱེད་ཐུབ་ཐབས་གནང་བཞིན་པ་དང་མུ་མཐུད་གནང་རྒྱུ་ཡིན་ཞེས་གསུངས་སོང་།

ཕྱོགས་མཚུངས་སྐུ་མགྲོན་དུ་མང་གཙོའི་ལས་འགུལ་གྱི་འགོ་འཁྲིད་དང་ཆབ་སྲིད་དཔྱད་གླེང་བ་གྲགས་ཅན་སྐུ་ཞབས་ཁྲེན་པོ་ཁུང་ལགས་ཀྱིས། སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དོན་གཅོད་ཀྱི་ལས་གནས་ལ་ཕེབས་པར་ལས་དོན་ཐམས་ཅད་ལམ་ལྷོངས་ཡོང་བའི་སྨོན་འདུན་དང་འབྲེལ་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་བོད་ཀྱི་རང་དབང་འཐབ་རྩོད་ལ་འཚེ་མེད་ཞི་བའི་ལམ་ནས་དཀའ་གནད་སེལ་ཐབས་གནང་བ་ལ་ནོ་སྦེལ་ཞི་བདེའི་གཟེངས་རྟགས་འབུལ་ཡོད་པ་དང་། བོད་རིགས་དང་རྒྱ་རིགས་མི་མང་གི་རང་དབང་འཐབ་རྩོད་གཉིས་ཀར་རྒྱ་ནག་གཞུང་གིས་གཉའ་གནོན་བྱས་ཡོད་ཀྱང་མི་རིགས་གཉིས་ཀས་དཔའ་མ་ཞུམ་པར་མུ་མཐུད་འཐབ་རྩོད་བྱེད་བཞིན་པ་དང་། སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་དང་སྐུ་ཞབས་ལིའུ་ཞོའོ་པོ་ལགས་ལ་ནོ་སྦེལ་ཞི་བདེའི་གཟེངས་རྟགས་ཕུལ་བའི་རྒྱུ་མཚན་ཡང་ཁོང་རྣམ་གཉིས་ཀྱིས་འཚེ་མེད་ཞི་བའི་ཐབས་ལམ་གཙོ་བོར་འཛིན་པ་ལ་བརྟེན་ནས་ཡིན་པ་དང་། བོད་རིགས་དང་རྒྱ་རིགས་དེ་བཞིན་མི་རིགས་གཞན་རྣམས་ནས་ཀྱང་ཐབས་ལམ་འདི་བརྒྱུད་འཐབ་རྩོད་ཐོག་མུ་མཐུད་ཤུགས་རྒྱག་དགོས་སྐོར་གསུངས།རྒྱལ་སྤྱིའི་རྒྱ་བོད་མཛའ་འབྲེལ་ཚོགས་པའི་ཚོགས་གཙོ་ཤོའི་ཝི་ལགས་ཀྱིས་འདས་པའི་ལོ་ངོ་སུམ་ཅུ་ལྷག་རིང་ཕྱི་རྒྱལ་ཡུལ་གྲུ་ཁག་ནང་བོད་རྒྱ་འབྲེལ་མཐུད་ཀྱི་ལས་དོན་ཡར་རྒྱས་བྱུང་ནས་རྒྱ་རིགས་དང་བོད་རིགས་དབར་ཕན་ཚུན་ཤེས་རྟོགས་མང་པོ་བྱུང་ཡོད་ལ་བོད་རྒྱ་མི་རིགས་གཉིས་དབར་མཛའ་མཐུན་གྱི་འདུ་ཤེས་གཏན་པོ་བཞག་ཐུབ་པ་དང་། ཁོང་གིས་རེ་སྨོན་གཉིས་ཡོད་པ་ནས། དང་པོ་ནི་ཁོ་པ་༧གོང་ས་མཆོག་ལ་མཇལ་ཁ་ཞུ་སྐབས་སྐྱེ་བ་སྔ་ཕྱི་ཡོད་མེད་ཀྱི་བཀའ་འདྲི་ཞུས་སྐབས་མགོན་པོ་གང་ཉིད་མཆོག་གིས་བློ་སེམས་ཁེངས་པའི་ལམ་སྟོན་སྩལ་བྱུང་བ་ལ་བརྟེན་ཁོ་པ་ཚེ་ཕྱི་མ་བོད་མི་ཞིག་གི་སྐྱེ་བ་བླང་ཐུབ་པའི་རེ་སྨོན་ཡིན་པ་དང་། གཉིས་པ་ནམ་ཞིག་རྒྱ་ནག་མང་གཙོ་ཚད་ལྡན་གྱི་རྒྱལ་ཁབ་ཏུ་འགྱུར་སྐབས་བོད་ཀྱི་མདུན་ལམ་བོད་མི་སོ་སོས་ཐག་གཅོད་བྱེད་ཆོག་པ་ལས་རྒྱ་ནག་གཞུང་གིས་ཐེ་བྱུས་བྱེད་མི་དགོས་པའི་རེ་སྨོན་ཡིན་པ་གསུངས།

བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་དང་བྱང་ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲ་ཤིས་ལགས་ཀྱིས་རྒྱ་རིགས་གྲོགས་པོ་རྙིང་པ་མང་པོ་དང་གྲོགས་མོ་གསར་པ་མང་པོ་ཕེབས་འདུག་པར་ཐུགས་རྗེ་ཆེ་ཞུས་པ་དང་། བོད་མིའི་སྒྲིག་འཛུགས་ཀྱི་ལངས་ཕྱོགས་ནི་མུ་མཐུད་དབུ་མའི་ལམ་གྱི་སྲིད་བྱུས་གཞིར་བཟུང་ཡིན་ལ། སྐུ་ཚབ་དོན་གཅོད་གསར་པ་རྣམ་རྒྱལ་ཆོས་གྲུབ་ལགས་ཕྱོགས་བསྐྱོད་ཀྱི་ལས་དོན་དང་པོ་དེ་རྒྱ་རིགས་འབྲེལ་མཐུད་ཀྱི་མཛད་རིམ་ལ་ཕེབས་པར་བོད་རྒྱ་འབྲེལ་མཐུད་ཀྱི་ལས་དོན་གལ་འགངས་ཆེན་པོ་ཡིན་པ་འགྲེལ་བརྗོད་དང་། འདིར་གྲོགས་པོ་གསར་པ་མང་པོ་ཕེབས་ཡོད་པ་རྣམས་ལ་ཕན་ཚུན་ཤེས་རྟོགས་ཀྱི་བཀའ་མོལ་གནང་ཐུབ་ན་དགེ་ཚན་ཆེ་བ་ཡོད་པ་དང་རྒྱ་རིགས་གྲོགས་པོ་ཚོས་མུ་མཐུད་ལས་དོན་དེ་རིགས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་སོང་།དེ་བཞིན་རྒྱ་ནག་མང་གཙོ་ཚོགས་པའི་ཚོགས་གཞོན་ཁྲིན་ལིས་ཆུན་ལགས་དང་རྒྱ་ནག་བུད་མེད་ཐོབ་ཐང་ཚོགས་པའི་ཚོགས་གཙོ་ཀྲང་ཅིང་ལགས་རྣམ་གཉིས་ཀྱིས་གཏམ་བཤད་གནང་ཡོད་པ་དང་ཁོང་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེ་ནི་མིང་དོན་མཚུངས་པའི་ཆེ་བསྟོད་ཞུ་རིན་ཆོག་པ་ཡིན་པ་དང་། རྒྱ་བོད་འབྲེལ་མཐུད་ཀྱི་ལས་དོན་ལ་མུ་མཐུད་རྒྱབ་སྐྱོར་གནང་རྒྱུ་ཡིན་པ་གསུངས་པ་དང་། ཡང་ཀྲང་ཅིང་ལགས་ཀྱིས་རྒྱ་ནག་གི་ལོ་རྒྱུས་ནང་ཐང་རྒྱལ་རབས་ཀྱི་སྐབས་སུ་བོད་ལ་ཐུ་བོད་ཅེས་འབོད་པ་དང་རྒྱལ་རབས་འདིའི་སྐབས་སུ་རྒྱ་ནག་གི་ཀོང་ཇོ་བོད་ལ་མནའ་མར་བཏང་ཡོད་པ་ནི་བོད་དམག་འགོག་ཆེད་ཡིན་པ་དང་། དེ་ལས་རྒྱ་ནག་ནི་དེའི་སྐབས་བོད་ཀྱི་ཁྱིམ་མཚེས་རྒྱལ་ཁབ་ལས་གཞན་མིན་པ་གསུངས་གནང་སོང་། ས་གནས་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ལྷ་དབང་དངོས་གྲུབ་ལགས་ཀྱིས་ཐེངས་འདིའི་བོད་རྒྱ་འབྲེལ་མཐུད་ཀྱི་ལས་རིམས་ནིའུ་ཡོག་ཀྱི་བོད་ཀྱི་རིག་གཞུང་བསྟི་གནས་ཁང་ཕུན་ཚོགས་སྡེ་བཞི་ཚོགས་ཁང་དུ་འཚོགས་གནང་བར་དགའ་སྤོབས་དང་། བོད་ཀྱི་གནད་དོན་གསལ་བཤད་དང་༧གོང་ས་མཆོག་གི་དགོངས་པར་བོད་མི་ཚང་མས་ཤར་བསྐྱོད་ཡིན་པ་གསུངས་གནང་སོང་།

གཏམ་བཤད་ཀྱི་ལས་རིམ་རྗེས་ས་གནས་སྤྱི་མཐུན་ཚོགས་པའི་མཐུན་འགྱུར་འོག་རྒྱ་རིགས་སྐུ་མགྲོན་གཏམ་བཤད་པ་རྣམས་ལ་སྒྲོལ་མའི་སྐུ་ཐང་ཆེ་བ་རེ་དང་མཇལ་དར་ཕུལ་ནས་སྐུ་པར་སྒྲོན་གནང་བ་དང་། ཚོགས་འཛོམས་ལ་ཕེབས་པའི་རྒྱ་རིགས་ཡོངས་ལ་སྐུ་ཐང་ཆུང་བ་རེ་དང་མཇལ་དར་རེ་ཕུལ་ཡོད་པ་རེད། དེ་རྗེས་རིག་གཞུང་འཁྲབ་སྟོན་གྱི་ལས་རིམ་དེ་བཞིན་ནིའུ་ཡོག་ནིའུ་ཇར་སི་བོད་རིགས་སྤྱི་མཐུན་ཚོགས་པས་གཙོ་སྐྱོང་གནང་ནས་ས་གནས་ཀྱི་འཁྲབ་སྟོན་པ་རྣམས་ནས་བོད་ཀྱི་རིག་གཞུང་ངོ་སྤྲོད་བྱས་ཏེ་ཚོགས་འཛོམས་དེ་བཞིན་རྒྱལ་ཁའི་ངང་ལེགས་གྲུབ་བྱུང་བ་དང་བཅས། །