༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༢༣ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༡ དེ་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་དང་། སྨན་པ་བསྟན་འཛིན་བརྩོན་འགྲུས་ལགས་རྣམ་གཉིས་ཀྱིས་སྤེལ་གནང་སོང་།
དེ་ཡང་ཐོག་མར་འཕྲོད་བསྟེན་དྲུང་གཞོན་བསྟན་འཛིན་ཀུན་བཟང་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་བོད་མི་རང་ཁྱིམ་དུ་མི་གྲངས་ ༡༠༡ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༣༠ བཅས་ཁྱོན་བསྡོམས་བོད་མི་གྲངས་ ༡༣༡ འགོག་དབྱེ་ཟུར་བཀག་ཐོག་བཞུགས་ཡོད། ད་བར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་བོད་ཀྱི་སྨན་རྩིས་ཁང་ནས་གསོ་རིག་ལུས་སེམས་ནུས་གསོའི་སྨན་ཁྱོན་བསྡོམས་མི་གྲངས་ ༥༧༠༥༦ ལ་རིན་མེད་བགོ་འགྲེམས་གནང་ཡོད། གཞན་ཡང་ནད་ཡམས་ཁྱབ་བརྡལ་སྔོན་འགོག་སླད་འདས་པའི་བདུན་ཕྲག་ནང་རྒྱ་གར་ནང་གི་བོད་མི་གྲངས་ ༣༨༤ དང་བལ་ཡུལ་ནང་གི་བོད་མི་གྲངས་ ༢ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད།
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་ལོ་ན་ ༡༨ ཡན་གྲངས་ ༤༦༧༧༤ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབ་ཟིན་པ་དང་། མི་གྲངས་ ༣༥༠༢ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་གྲངས་ ༠༦ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་དང་མི་གྲངས་ ༧༠༠༢ ལ་སྔོན་འགོག་སྨན་ཁབ་ཆ་ཚང་ཐོབ་ཡོད། འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་གྲངས་ ༧ ལ་ནད་གཞི་ཕོག་པ་ར་འཕྲོད་བྱུང་ཡོད་པ་དང་། དེའི་ནང་ནས་དགུང་ན་མཐོ་ཤོས་དེ་ལོ་ ༧༣ དང་ཆུང་ཤོས་དེ་ལོ་ ༢༥ ཡིན། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༦༩༧༦ དང་། དྲག་སྐྱེད་བྱུང་བ་མི་གྲངས་ ༦༨༠༠། འདས་གྲོངས་སུ་གྱུར་བ་མི་གྲངས་ ༡༦༢། ད་ལྟ་གསོ་བཅོས་བྱེད་བཞིན་པ་མི་གྲངས་ ༡༤ ཡོད་ཅེས་སོགས་གསུངས་གྲུབ་མཚམས་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། སྟབས་ལེགས་པ་ཞིག་ལ་ད་ལྟའི་ཆར་རྒྱ་གར་ནང་སྔོན་འགོག་སྨན་ཁབ་གཉིས་ཀར་བརྒྱབ་ཟིན་པ་བརྒྱ་ཆ་ ༦༠ ཙམ་སླེབ་ཡོད་པ་དང་། དྲག་སྐྱེད་བྱུང་བ་ ༩༨་༤༠ རེད་འདུག དེར་བརྟེན་གལ་ཏེ་མི་གྲངས་བརྒྱ་ན་བ་ཡིན་ན་མི་གྲངས་ ༩༨ ཙམ་དྲག་སྐྱེད་འབྱུང་གི་ཡོད་པ་རེད། འདས་པའི་ཆུ་ཚོད་ ༢༤ ནང་རྒྱ་གར་དུ་ཏོག་དབྱིབས་གཉན་རིམས་ཕོག་པ་མི་གྲངས་བདུན་སྟོང་བཞི་བརྒྱ་བརྒྱད་ཅུ་གྱ་ལྔ་དང་། མི་གྲངས་བཞི་བརྒྱ་སུམ་ཅུ་སོ་བཞི་ནད་ཡམས་ཀྱིས་རྐྱེན་པས་འདས་གྲོངས་སུ་གྱུར་ཡོད།
ཨོ་མི་ཀྲོན་ (Omicron) ཞེས་པའི་ནད་ཡམས་འདི་ཉིད་འཛམ་གླིང་རྒྱལ་ཁབ་ ༡༠༦ ཙམ་ལ་ཁྱབ་བརྡལ་བྱུང་ཡོད་འདུག་པ་མ་ཟད། རྒྱ་གར་ནང་ད་བར་མི་གྲངས་ ༢༣༦ ལ་ནད་ཡམས་འདི་ཕོག་ཡོད་པའི་ཁོངས་ནས་མི་གྲངས་ ༡༠༤ དྲག་སྐྱེད་བྱུང་འདུག ཅེས་སོགས་གསུངས་ཏེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༩༡ དེ་མཇུག་སྒྲིལ་གནང་ཡོད། །
