༄༅། །བོད་མིའི་སྒྲིག་འཛུགས་ཀྱི་སྣེ་ཁྲིད་འོག་ས་གནས་ཁག་གི་འཕྲོད་བསྟེན་སྨན་ཁང་དང་། བོད་མི་ཚོགས་སྒེར་མཉམ་རུབ་ཀྱི་ནུས་པ་ལ་བརྟེན་ནས་རྒྱ་གར་ནང་གནས་སྡོད་རང་ལོ་ ༡༨ ཡན་གྱི་བོད་མི་བརྒྱ་ཆ་དགུ་བཅུ་ལྷག་དང་། བལ་ཡུལ་ནང་གི་རང་ལོ་ ༡༨ ཡན་གྱི་བོད་མི་བརྒྱ་ཆ་བརྒྱད་ཅུ་གྱ་ལྔ་ལྷག་ལ་ཏོག་དབྱིབས་འགོག་སྨན་ཐོབ་ཡོད་པ་དང་། ད་བར་འཛམ་གླིང་འཕྲོད་བསྟེན་ལྷན་ཁང་ནས་ནད་ཡམས་ཁྱབ་གདལ་སྔོན་འགོག་ཆེད་ཚང་མས་འགོག་སྨན་རྒྱག་དགོས་པའི་ལམ་སྟོན་མུ་མཐུད་གནང་བཞིན་ཡོད་པ་དང་། འགོག་སྨན་གྱིས་ནད་ཡམས་སྔོན་འགོག་ལ་ཕན་གྱི་ཡོད་པ་མ་ཟད། ནད་གཞི་འགོས་པའི་དབང་དུ་བཏང་ནའང་ཛ་དྲག་ཅན་དུ་མི་འགྱུར་བའི་ཁྱད་པར་འགྲོ་གི་ཡོད་པའི་དཔང་རྟགས་གསལ་པོ་ཡོད། རིང་མིན་རྒྱ་གར་གཞུང་ནས་རང་ལོ་ ༡༨ མན་གྱི་བྱིས་པ་དག་ལ་ཏོག་དབྱིབས་འགོག་སྨན་བརྒྱག་རྒྱུའི་སྟ་གོན་གནང་བཞིན་ཡོད་པ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་འདས་པའི་ཉམས་མྱོང་ལས་འགོག་སྨན་རྒྱག་འགོ་མ་ཚུགས་སྔོན་ཡིག་ཆ་ཕྱོགས་བསྒྲིགས་དང་གྲངས་ཐོ་བསྡུ་རུབ་བྱ་རྒྱུ་གལ་ཆེར་མཐོང་བས། དེ་ལུགས་ཏོག་དབྱིབས་གཉན་རིམས་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གཙོས་སྨན་པ་བསྟན་འཛིན་བརྩོན་འགྲུས་ལགས་དང་། འཕྲོད་བསྟེན་ལས་ཁུངས་ཀྱི་ལས་ཀྱི་སྣེ་མོ་བ་བཅས་ཚང་འཛོམས་ཐོག་ས་གནས་འགོ་འཛིན་རྣམ་པ་དང་། སློབ་གྲྭ་ཁག་གི་འགན་འཛིན། བོད་མིའི་དང་བླངས་འཕྲོད་བསྟེན་ཚོགས་པའི་སྨན་ཁང་གི་དྲུང་ཆེ་རྣམ་པ་དང་ལྷན་འགོག་སྨན་རྒྱག་འགོ་མ་ཚུགས་སྔོན་གྲ་སྒྲིག་གནང་ཕྱོགས་ཐད་ལམ་སྟོན་ཞུ་རྒྱུར་དམིགས་ཏེ་དྲ་ཐོག་ཚོགས་འདུ་རིམ་པ་གོ་སྒྲིག་གནང་ཡོད། ཚོགས་འདུའི་རྗེས་སློབ་གྲྭ་སོ་སོས་ལས་བྱེད་གཅིག་ཆེད་བསྐོས་ཀྱིས་སློབ་ཕྲུག་གི་གྲངས་ཐོ་བསྡུ་རུབ་གནང་གི་ཡོད། འཕྲོད་བསྟེན་གྲངས་ཐོ་ལས་གཞིའི་ (Health Information System) འགན་འཛིན་བསྟན་འཛིན་སྒྲོལ་མ་ལགས་དང་། འགོག་སྨན་གྲངས་ཐོ་ལྟ་ཞིབ་པ་བསྟན་འཛིན་སྒྲོལ་དཀར་ལགས་དང་བསྟན་འཛིན་ཟླ་མཛེས་ལགས་བཅས་ནས་ཕྱི་ལོ་ ༢༠༢༡ ཟླ་༡༢ ཚེས་ ༡༤ ཉིན་རྒྱ་གར་ནང་གི་བཙན་བྱོལ་བོད་མིའི་སློབ་གྲྭ་ཁག་སོ་སོའི་ཆེད་བསྐོས་ལས་བྱེད་ལྷན་དྲ་ཐོག་ཚོགས་འདུ་ཚོགས་ཡོད་ཅིང་། ཕྱི་ཚེས་ ༡༥ དང་ ༡༦ ཉིན་དབུས་བོད་སློབ་འཛིན་ཚོགས་དང་སཾ་བྷོ་ཊ་ཁྱབ་ཁོངས་སློབ་གྲྭ་ཁག་གི་ཆེད་བསྐོས་ལས་བྱེད་རྣམས་ལ་ཟབ་སྦྱོང་དབུལ་རྒྱུ་རེད་འདུག་བཅས།།