༄༅། །བོད་ཀྱི་སྲིད་བྱུས་ཉམས་ཞིབ་ཁང་གིས་འགྲེམས་སྤེལ་ཞུས་པའི་བོད་ཀྱི་རིག་གནས་ཐོག་ཉམས་ཞིབ་དུས་དེབ་འདོན་ཐེངས་བརྒྱད་པ་དང་འབྲེལ་བའི་གླེང་མོལ་ཞིག་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༢ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་ཚོགས་ཁང་ནང་ཚོགས་སོང་།

དེ་ཡང་གླེང་མོལ་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། དུས་དེབ་རྩོམ་སྒྲིག་པ་ཚེ་རིང་བསམ་གྲུབ་ལགས་ཀྱིས་གཙོས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བཅས་མཉམ་ཞུགས་ཀྱིས་ཐོག་མར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་དུས་དེབ་འདོན་ཐེངས་བརྒྱད་པར་བསྔགས་བརྗོད་དང་བཅས་དུས་དེབ་དེེར་འཁོད་རྩོམ་ཡིག་རྣམས་ཀྱི་བརྗོད་བྱའི་ཆ་ནས་བོད་ཀྱི་རིག་གཞུང་དང་འབྲེལ་ཆགས་ཤ་སྟག་ཡིན་ཞིང་། རྗོད་བྱེད་ཚིག་སྦྱོར་གོ་སླ་ལ་ཀློག་བདེ་བའི་ཁྱད་ཆོས་ལྡན་པ་མ་ཟད། དཔྱད་བརྗོད་བྱེད་སྟངས་ཀྱང་དེང་རབས་ཞིབ་འཇུག་ཐབས་ལམ་དཔྱད་དེ་ཞིབ་འཇུག་བྱས་པ་ཤ་སྟག་ཡིན་སྐོར་དང་། དེ་བཞིན་དུས་དེབ་དེའི་ནང་ཕྱོགས་བསྒྲིགས་བྱས་པའི་རྩོམ་ཡིག་ཁག་གི་སྤུས་ཚད་དང་། རྒྱལ་སྤྱིའི་ཚད་གཞི་ལོངས་པའི་དཔེ་དེབ་འཇུས་འགོད་ཀྱི་ཁྱད་ཆོས་ལ་བརྟེན་ནས་ད་ཐེངས་གླེང་མོལ་གྱི་མཛད་སྒོ་ཚོགས་ཡོད་སྐོར་སོགས་གསུངས་སོང་། དུས་དེབ་རྩོམ་སྒྲིག་པ་ཚེ་རིང་བསམ་གྲུབ་ལགས་ཀྱིས་རང་ཉིད་ཀྱི་མཁྱེན་ཡོན་དང་ཉམས་མྱོང་ལ་བརྟེན་ནས་དུས་དེབ་རྩོམ་སྒྲིག་གི་བརྒྱུད་རིམ་དང་། དུས་དེབ་ཀྱི་ནང་དོན། རྩོམ་སྒྲིག་བྱེད་ཕྱོགས། བརྗོད་བྱ་ངོ་སྤྲོད། དཔེ་དུབ་འཇུས་འགོད་སོགས་ཀྱི་ཐད་འགྲེལ་བརྗོད་དང་གསལ་བཤད་གནང་གྲུབ་མཚམས་དུས་དེབ་ནང་འཁོད་པའི་རྩོམ་ཡིག་ཨེ་ཤི་ཡའི་ཚོགས་འདུ་ ༼ ༡༩༤༧ ༽ ལས་འཕྲོས་ཏེ་བོད་ཀྱི་རྒྱལ་གླུའི་བྱུང་འཕེལ་ལ་དཔྱད་པ་ཞེས་པ་རྩོམ་མཁན་སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་སྟོབས་ལགས་ཀྱིས་དུས་དེབ་ལེགས་བཅོས་གཏོང་ཐབས་ཐད་བསམ་ཚུལ་དུ། བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་རྣམ་པ་དང་། དེའི་དུས་དེབ་དེ་ཀྲུང་གོ་བོད་རིག་པ་ཞིབ་འཇུག་གི་ཉམས་ཞིབ་པ་དང་དུས་དེབ་ལས་ཉམ་མི་དམའ་བ་དགོས་ཚུལ་གསུངས་སོང་།

ཕྱོགས་མཚུངས་ཁོང་གིས་རང་ཉིད་ཀྱི་དཔྱད་རྩོམ་དང་འབྲེལ་ནས་ཕྱི་ལོ་ ༡༩༤༠ ཙམ་ལ་བོད་ཀྱི་རྒྱལ་གླུར་གང་གཏོང་གི་ཡོད་པ་དང་། ཕྱི་ལོ་༡༩༤༧ ལོའི་ཨེ་ཤི་ཡའི་ཚོགས་འདུར་བོད་ཀྱི་སྐུ་ཚབ་རྣམ་པས་རྒྱལ་གླུ་གང་བཏང་ཡོད་མེད། ད་ལྟ་བཀོལ་སྤྱོད་བྱེད་བཞིན་པའི་བོད་ཀྱི་རྒྱལ་གླུའི་གཞི་རྐང་དང་རྒྱལ་གླུའི་ངོ་བོར་གྲུབ་ཚུལ་སྐོར་གསེད་བཀྲོལ་གནང་མཐར་དྲི་བར་ལན་འདེབས་དང་བགྲོ་གླེང་ཞིབ་རྒྱས་གནང་སོང་བ་བཅས།།