༄༅། །ཕྱི་ལོ ༢༠༢༠ ཟླ་ ༡༠ ཚེས་ ༢༦ ཉིན་བོད་ཀྱི་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་ལྷ་སའི་རྒྱ་ནག་གི་གསང་བའི་ལས་བྱེད་མི་སྣ་དང་ཉེན་རྟོག་པས་གློ་བུར་དུ་ཁྲིན་ཏུའུ་གྲོང་ཁྱེར་ནས་འཛིན་བཟུང་བྱས་ཡོད་ཀྱང་ད་བར་ཁོང་གི་གནས་སྟངས་སྐོར་ཁ་གསལ་མེད་པར་གྱུར་ཡོད་པ་དང་། ཉེ་ཆར་ལྷ་སའི་འབྲིང་རིམ་མི་མང་ཁྲིམས་ཁང་ཟེར་བས་སྒོ་ཤེས་རབ་རྒྱ་མཚོ་ལགས་མི་ལོ་བཅུའི་དུས་བཀག་བཙོན་འཇུག་ཁྲིམས་ཐག་བཅད་ཡོད་པའི་གནས་ཚུལ་ཞིག་ཐོན་ཡོད།
ཕྱི་ལོ་ ༢༠༢༡ ཟླ་ ༧ ཚེས་ ༢༡ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་མཁས་པ་ཁག་གཅིག་གིས་རྒྱ་ནག་གཞུང་ལ་སྒོ་ཤེས་རབ་རྒྱ་མཚོ་ལགས་གར་སོང་ཆ་མེད་དུ་གྱུར་ཡོད་པའི་སྐོར་དང་། དེ་བཞིན་རིན་ཆེན་ཚུལ་ཁྲིམས་ལགས་ཁྲིམས་མེད་ལུགས་མེད་ཀྱིས་བཙོན་འཇུག་བྱས་ཡོད་པའི་སྐོར་འདྲི་རྩད་བྱས་པར་རྒྱ་ནག་གཞུང་གིས་ཕྱི་ལོ་ ༢༠༢༡ ཟླ་ ༨ ཚེས་ ༢༩ ཉིན་སྒོ་ཤེས་རབ་རྒྱ་མཚོ་ལགས་ཀྱིས་ཁ་བྲལ་གྱི་ལས་འགུལ་སྤེལ་ཚུལ་བརྗོད་དེ་འཛིན་བཟུང་བྱས་ཡོད་པའི་ལན་འདེབས་བྱས་ཡོད་པ་རེད།
སྒོ་ཤེས་རབ་རྒྱ་མཚོ་ལགས་ནི། ཕྱི་ལོ ༡༩༧༦ ཟླ་ ༩ ཚེས ༩ ཉིན་རྒྱ་ནག་གཞུང་གིས་ཆ་བགོས་བྱས་པའི་སི་ཁྲོན་ཞིང་ཆེན་རྔ་བ་རང་སྐྱོང་ཁུལ་རྔ་བ་རྫོང་དུ་སྐྱེས་ཤིང་། དགུང་ལོ ༡༠ ལ་སོན་སྐབས་རྔ་བ་ཀིརྟི་དགོན་དུ་ཆོས་ཞུགས་གནང་ཡོད། ཕྱི་ལོ་ ༡༩༩༨ ལོར་རྒྱ་ནག་གཞུང་གིས་རྔ་བ་ཁུལ་དུ་རྒྱལ་གཅེས་ཆོས་གཅེས་ཞེས་པའི་ལས་འགུལ་ཤུགས་ཆེ་སྤེལ་ཡོད་པ་དང་། སྐབས་དེར་རྒྱ་ནག་གཞུང་གིས་སྒོ་ཤེས་རབ་རྒྱ་མཚོ་ལགས་ཀྱིས་ཕར་ཕྱིན་དམ་བཅའ་འཇོག་སྐབས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་བཤམས་ཡོད་ལུགས་བརྗོད་དེ་ཁོང་འཛིན་བཟུང་དང་བཙོན་འཇུག་ལོ་གསུམ་རིང་བྱས་ཡོད་པ་དང་། ཕྱི་ལོ་ ༢༠༠༨ ལོར་བོད་ཀྱི་ས་ཁུལ་ཡོངས་སུ་ས་བྱི་ཞི་རྒོལ་ཆེན་མོ་བྱུང་སྐབས་ལྷ་ས་ནས་རྒྱ་ནག་གི་ཉེན་རྟོག་པས་ཁོང་འཛིན་བཟུང་བྱས་ནས་ལོ་གཅིག་ཙམ་རིང་བཀག་ཉར་བྱས་ཡོད་པ་རེད།
སྒོ་ཤེས་རབ་རྒྱ་མཚོ་ལགས་ཀྱིས་ད་བར་རྒྱུན་ཤེས་དང་ལམ། ང་ཚོ་སད་རན། བསམ་གཞིག་པའི་སེམས་སྒྲ། དཔྱད་འཚོལ་དང་ལྟ་ཚུལ། སྐྱེས་ཆེན་གྱི་བཞུད་ལམ། ཧི་མ་ལ་ཡའི་ཕར་ཚུར། རང་ལམ་རང་འཚོལ། བླང་དོར་ལྟ་ཚུལ། འགྱུར་ལྡོག་ཁྲོད་ཀྱི་བསམ་གཞིག་སོགས་དཔེ་དེབ་དགུ་ལྷག་བརྩམས་ཡོད་པ་དང་། ཁོང་ནི་གཞིས་བྱེས་བོད་མིའི་ཤེས་ཡོན་གྱི་སྡེ་ཁག་གིས་ཧ་ཅང་བརྩི་བཀུར་དང་གཙིགས་ཆེན་དུ་འཛིན་སའི་མི་སྣ་ཞིག་ཆགས་ཡོད།།
