༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༣༠ ཉིན་བེལ་ཇི་ཡམ་གྱི་རྒྱལ་ས་སྦར་སིལ་དུ་རྟེན་གཞི་བྱས་པའི་ནཱ་ཌིན་ཨེ་ལེག་ཛམ་ཌར་ཐེབས་རྩ་ཁང་ (Nadine Alexandre Heusghem Foundation) ཞེས་པའི་ནང་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཀྱིས་བཟོས་པའི་འཇིགས་བྲལ་ཞེས་པའི་གློག་བརྙན་དེ་གཟིགས་འབུལ་ཞུས་ཡོད་པ་དང་། གློག་བརྙན་གཟིགས་འབུལ་གྱི་མཛད་སྒོར་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ (Mr. Vincent Metten) ལགས། བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལས་བྱེད་རིག་འཛིན་ལགས། རྩིས་པ་བསྟན་འཛིན་ལེགས་བཤད་ལགས། དེ་བཞིན་ས་གནས་ཀྱི་བོད་མི་གྲངས་ ༥༠ ཙམ་དང་ཡུ་རོབ་ཁུལ་གྱི་བོད་ཀྱི་གྲོགས་པོ་རྣམ་པ་བཅས་ཕེབས་ཡོད།

དེ་ཡང་འཇིགས་བྲལ་ཞེས་པའི་གློག་བརྙན་གཟིགས་འབུལ་མ་ཞུ་གོང་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྲིད་བྱུས་ངེས་སྟོན་པ་སྐུ་ཞབས་ཝིན་སེན་ཊི་མེ་ཊེན་ (Mr. Vincent Metten) ལགས། བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་བཅས་ཀྱིས་འཇིགས་བྲལ་ཞེས་པའི་གློག་བརྙན་གྱི་རྒྱབ་ལྗོངས་ཀྱི་བྱུང་རིམ་སྐོར་ངོ་སྤྲོད་གསུང་བཤད་གནང་ཡོད།

འཇིགས་བྲལ་ཞེས་པའི་དངོས་བྱུང་གློག་བརྙན་ནི། ཕྱི་ལོ་ ༢༠༠༨ ལོར་རྒྱ་ནག་གི་རྒྱལ་ས་པེ་ཅིང་དུ་ཨོ་རྩེད་འགྲན་ཚོགས་འཚོགས་ལ་ཉེ་སྐབས། དོན་གྲུབ་དབང་ཆེན་ལགས་དང་མགོ་ལོག་འཇིགས་མེད་ལགས་རྣམ་གཉིས་མདོ་སྨད་ཁུལ་གྱི་ས་གནས་ཁག་ལ་གསང་བའི་སྒོ་ནས་སྐོར་སྐྱོད་བྱས་ཏེ། ས་གནས་ཀྱི་མི་གྲངས་ ༡༠༨ ཙམ་ལ་པེ་ཅིང་དུ་འཚོགས་རྒྱུའི་ཨོ་རྩེད་འགྲན་ཚོགས་ལ་འདོད་མོས་ཡོད་མེད་དང་བོད་ནང་གི་དངོས་ཡོད་གནས་སྟངས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བྱེས་ཀྱི་བོད་མི་ཚོར་དད་པ་དམ་ཚིག་ག་འདྲ་ཡོད་མེད་བཅས་ཀྱི་སྐོར་བཅར་འདྲི་ཞུས་ཏེ་གློག་བརྙན་ཕབ་སྐྲུན་གནང་བ་ཞིག་ཡིན།

གློག་བརྙན་གཟིགས་འབུལ་ཞུས་རྗེས་དྲི་བ་དྲིས་ལན་ལྷུག་པོ་གནང་ཡོད་པ་དང་། འཇིགས་བྲལ་ཞེས་པའི་དངོས་བྱུང་གློག་བརྙན་གཟིགས་འབུལ་གྱི་ལས་རིམ་དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་དང་བེལ་ཇི་ཡམ་བོད་རིགས་ཚོགས་པ་གཉིས་ནས་གོ་སྒྲིག་གནང་ཡོད་པ་བཅས།།