༄༅། །འདི་གར་བལ་ཡུལ་དོན་གཅོད་ཁང་ནས་བཏང་གནས་ནང་འཁོད་དོན། བོད་རྒྱལ་ལོ་ ༢༡༤༨ ཕྱི་ལོ་ ༢༠༢༡ ཟླ་ ༡༢ ཚེས ༡༠ རེས་གཟའ་པ་སངས་ཉིན་བལ་ཡུལ་དོན་གཅོད་ཁང་གི་གོ་སྒྲིག་འོག་འཕགས་ཤིང་བྲག་དཀར་དགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༢ འཁོར་བའི་དུས་ཆེན་ཁྱད་པར་ཅན་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་དུས་ཆེན་གཉིས་འཛོམས་ཀྱི་ཉིན་བལ་ཡུལ་ཉེན་རྟོག་པའི་དམ་དྲག་འོག་ཟབ་རྒྱས་ངང་སྲུང་བརྩི་ཞུས་ཐུབ་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་སྐུ་མགྲོན་གཙོ་བོ་ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་གྲྭ་ཚང་གི་༸སྐྱབས་རྗེ་མཁན་རིན་པོ་ཆེ་དབུས་པའི་དགེ་འདུན་རྣམ་པ་དང་། བལ་ཡུལ་དོན་གཅོད། ཕྱོགས་བཞུགས་སྤྱི་འཐུས་དང་སྤྱི་ཟུར་རྣམ་པ། བལ་དོན་དྲུང་ཆེ། ས་གནས་འཐུས་ཚོགས་ཀྱི་ཚོགས་གཙོ། ས་གནས་འགོ་འཛིན། རང་བདེན་ཚོགས་ཆུང་གི་ཚོགས་གཙོ། བལ་ཡུལ་གངས་ཅན་བདེ་རྩྭའི་དྲུང་ཆེ་དང་འཛིན་སྐྱོང་འགན་འཛིན། སློབ་གྲྭ་ཁག་གི་དབུ་འཛིན་དང་དགེ་ཆེ་རྣམ་པ། གཞན་ཡང་སྐུ་མགྲོན་རྣམ་པ་བཅས་འདུ་འཛོམས་ཐོག་དགེ་འདུན་པ་རྣམས་ནས་འཁྲུས་གསོལ་རབ་གནས་དང། སྐུ་མགྲོན་གཙོ་བོ་མཁན་རིན་པོ་ཆེ་དང་། བལ་ཡུལ་དོན་གཅོད། ཕྱོགས་བཞུགས་སྤྱི་འཐུས་བཅས་ནས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་སྐུ་གསུང་ཐུགས་རྟེན་འདེགས་འབུལ་དང་སྐུ་མགྲོན་རྣམས་ནས་རིམ་པས་མཇལ་དར་མགྲོན་འབུལ་ཞུས། དེ་བཞིན་ཚོགས་ཁང་ནང་ཚང་མ་སྐུ་བཞེངས་ཐོག་བལ་བོད་གཉིས་དང་ནོ་སྦེལ་ཞི་བདེའི་བསྟོད་དབྱངས་ཕུལ་རྗེས་རྟེན་འབྲེལ་མཚོན་བྱེད་དུ་གསོལ་ཇ་འབྲས་བསིལ་འདེགས་འབུལ་ཞུས་ཡོད།
དེ་རྗེས་ཕྱོགས་བཞུགས་སྤྱི་འཐུས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་དང་བལ་ཡུལ་དོན་གཅོད་ཀྱིས་དཔལ་ལྡན་བཀའ་ཤག་གི་གསུང་འཕྲིན་སྒྲོགས་སྦྱང་གནང་། མཐར་འཕགས་ཤིང་བྲག་དཀར་དགོན་པའི་ཚོགས་ཁང་ནང་ཀི་བསོའི་ལྷ་རྒྱལ་འཐེན་ནས་མཛད་སྒོ་མཇུག་སྒྲིལ་ཡོད་པ་བཅས། །
