༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡ ཉིན་འཛམ་གླིང་འཕྲོད་བསྟེན་ལྷན་ཚོགས་ཀྱི་ལམ་སྟོན་འོག་འཛམ་གླིང་ཡུལ་གྲུ་གང་ས་ནས་འཛམ་གླིང་གཉན་ནད་རེག་དུག་གི་ཉིན་མོ་ཞེས་སྲུང་བརྩི་ཞུ་བཞིན་པ་དང་བསྟུན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གཉན་ནད་རེག་དུག་ཚན་པ་དང་། བོད་ཀྱི་སྨན་རྩིས་ཁང་། བདེ་ལེགས་སྨན་ཁང་། རྡ་ས་ས་གནས་བུད་མེད་ལྷན་ཚོགས། ཀུན་ཕན་ནད་གསོ་ཁང་བཅས་ཀྱིས་མཉམ་རུབ་ཐོག་འཛམ་གླིང་གཉན་ནད་རེག་དུག་གི་ཉིན་མོ་སྲུང་བརྩི་ཞུས་པ་དང་འབྲེལ་བཞུགས་སྒར་རྡ་ས་ཁུལ་དུ་གཉན་ནད་རེག་དུག་དང་འབྲེལ་བའི་གོ་རྟོགས་དང་རིན་མེད་བརྟག་དཔྱད་ཀྱི་ལས་གཞི་སོགས་སྤེལ་ཡོད།
དེ་ཡང་གོང་ཚེས་ཉིན་གྱི་སྔ་དྲོར་གཉན་ནད་རེག་དུག་གི་གོ་རྟོགས་ལས་རིམ་དེ་བཞིན་ཐོག་མར་ཡོངས་གླིང་སྔོན་འགྲོའི་སློབ་གྲྭ་ནས་དབུ་འཛུགས་ཀྱིས་མེ་གྷན་གསུམ་མདོ་བར་གོ་རྟོགས་ལས་འགུལ་སྤེལ་གྲུབ་མཚམས་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བསྟན་འཛིན་བསོད་ནམས་ལགས་དང་བོད་ཀྱི་སྨན་རྩིས་ཁང་གི་ལས་བྱེད་སྐལ་ལྡན་ལགས་རྣམ་གཉིས་ཀྱིས་མང་ཚོགས་དང་གསར་འགོད་པ་རྣམས་ལ་གཉན་ནད་རེག་དུག་གི་སྐོར་ངོ་སྤྲོད་གསུང་བཤད་དང་གོ་རྟོགས་སྤེལ་ཡོད་པ་དང་། ཀུན་ཕན་ནད་གསོ་ཁང་གི་སྐུ་ཚབ་རྣམས་ཀྱིས་གཏམ་བརྗོད་ཀྱི་ལམ་ནས་གཉན་ནད་རེག་དུག་གི་སྐོར་གོ་རྟོགས་སྤེལ་ཡོད།
གཞན་ཡང་ཉིན་མོ་དེར་རིན་མེད་ཐོག་མང་ཚོགས་ལ་གཉན་ནད་རེག་དུག་དང་གཅིན་སྙི་ཟ་ཁུ། ཁྲག་ཤེད་སོགས་ཀྱི་བརྟག་དཔྱད་གནང་ཡོད། དེ་བཞིན་ཉིན་རྒྱབ་ནས་བོད་ཀྱི་སྨན་རྩིས་ཁང་དང་། དགོང་དྲོ་བོད་མིའི་སྒྲིག་འཛུགས་ཀྱི་བསྟི་གནས་གངས་སྐྱིད་ཁུལ་དུ་གཉན་ནད་རེག་དུག་དང་འབྲེལ་བའི་གོ་རྟོགས་སྤེལ་ཡོད།
ཕྱོགས་མཚུངས་རྒྱ་གར་ནང་ཡོད་པའི་བཙན་བྱོལ་བོད་མིའི་གཞིས་ཆགས་ཁག་གི་ས་གནས་འཕྲོད་བསྟེན་སྨན་ཁང་དང་སློབ་གྲྭ་སོགས་ཀྱི་ནང་དུའང་གཉན་ནད་རེག་དུག་དང་འབྲེལ་བའི་གོ་རྟོགས་སྤེལ་ཡོད་པ་བཅས།།
སྦན་ད་ར་ནོར་རྒྱས་གླིང་།
སྦེལ་ཀོབ་བོད་ཁྱིམ།
ཨོ་རི་ས་དབུས་སློབ།
ལ་དྭགས་བསོད་ནམས་གླིང་།
མན་སྤར་སམ་བྷོ་ཊ།
