༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༣༢ འཁོར་བའི་དུས་དྲན་དང་བསྟུན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བོད་ཀྱི་འགྲེམས་སྟོན་ཁང་དང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་༧གོང་ས་༧སྐྱབས་མགོན་ཏཱ་ལའི་བླ་མ་མཆོག་གི་ཀུན་ཕན་བདེ་རྩ་གཉིས་ཟུང་འབྲེལ་གྱིས་རྒྱལ་ས་ལྡི་ལིར་ཡོད་པའི་རྒྱ་གར་རིག་གཞུང་བསྟི་གནས་ཁང་ (India Habitat Centre) དུ་ཕྱི་ལོ་ ༢༠༢༡ ཟླ་ ༡༢ ཚེས་ ༩ ནས་འགོ་འཛུགས་ཀྱིས་ཕྱི་ཚེས་ ༡༥ བར་སྔ་དྲོ་ཆུ་ཚོད་ ༡༠ ནས་དགོང་དྲོ་ཆུ་ཚོད་ ༧ བར་སྤྱི་ནོར་༧གོང་ས་༧སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་རྣམ་སྙིང་བསྡུས་ཞེས་པའི་བརྗོད་གཞི་དང་འབྲེལ་ནས་མགོན་པོ་གང་ཉིད་མཆོག་སྐུ་ན་ཕྲ་བའི་སྐབས་ནས་ཆོས་སྲིད་གཉིས་ཀྱི་ཐུགས་འགན་བཞེས་གནང་མཛད་དེ་རྒྱ་གར་དང་རྒྱལ་སྤྱིའི་དབུ་ཁྲིད་རྣམ་པར་མཇལ་འཕྲད་མཛད་པ་དང་། གཟེངས་རྟགས་འབུལ་བཞེས་མཛད་པ། མགོན་པོ་གང་ཉིད་མཆོག་སྐུ་སྒེར་དང་གཞན་རྣམས་དང་ལྷན་དུ་མཉམ་འབྲེལ་གྱིས་དཔེ་དེབ་ལྗགས་རྩོམ་མཛད་པ། དེ་བཞིན་༧སྐུའི་རླབས་ཆེན་གྱི་ཐུགས་བསྐྱེད་དམ་བཅའ་བཞི་སོགས་ཀྱི་སྐོར་འགྲེམས་སྟོན་གནང་རྒྱུ་ཡིན་ཞིང་།

འགྲེམས་སྟོན་དབུ་འབྱེད་ཀྱི་མཛད་སྒོར་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་དང་། ༧གོང་ས་༧སྐྱབས་མགོན་ཏཱ་ལའི་བླ་མ་མཆོག་གི་ཀུན་ཕན་བདེ་རྩའི་དྲུང་ཆེ་སྐུ་ཞབས་ར་ཇིབ་མེ་རོ་ཏྲ་ (Rajiv Mehrotra) ལགས། ལྡི་ལི་ཤེས་རིག་པར་ཁང་གི་འགན་འཛིན་ལས་ཚབ་བསྟན་འཛིན་ལྷ་རྒོད་ལགས། ལྡི་ལི་མཐོ་སློབ་ཁག་གི་སློབ་ཕྲུག རྒྱ་གར་རིག་གཞུང་བསྟི་གནས་ཁང་གི་ལས་བྱེད། གཟིགས་མོ་བ་གཞན་སོགས་ཕེབས་ཡོད།

སྐབས་དེར་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་ཕྱི་དྲིལ་ལས་ཁུངས་ཀྱི་འགྲེམས་སྟོན་ཁང་དང་༧གོང་ས་༧སྐྱབས་མགོན་ཏཱ་ལའི་བླ་མ་མཆོག་གི་ཀུན་ཕན་བདེ་རྩ་ཟུང་འབྲེལ་གྱིས་འདི་ལྟ་བུའི་འགྲེམས་སྟོན་གོ་སྒྲིག་གནང་བར་རྗེས་སུ་ཡི་རང་ཞུས་གནང་བ་དང་འབྲེལ་ཧ་ཅང་དཀོན་པའི་པར་རིས་རྣམས་ཕྱོགས་བསྡུས་ཀྱིས་དྲ་ལམ་བརྒྱུད་རྒྱ་ཆེ་མང་ཚོགས་ལ་འགྲེམས་སྟོན་གནང་དགོས་པའི་གལ་གནད་སོགས་ཀྱི་སྐོར་གསུངས་ཡོད་པ་བཅས།།