༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༦ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་ཞུས་པའི་ཉིན་བཞིའི་རྒྱ་གར་ན་གཞོན་ཉམས་ཞིབ་པའི་བོད་རིག་པའི་ཚོགས་འདུ་ཐེངས་གཉིས་པ་དབུ་འབྱེད་གནང་ཡོད་པ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཕེབས་བསུའི་གསུང་བཤད་དང་། སློབ་དཔོན་རཱ་མུ་མ་ནི་ཝན་ནན་ (Ramu Manivannan) ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་ཕྱི་དྲིལ་བཀའ་བློན་མཆོག་གིས་དབུ་འབྱེད་གསུང་བཤད་གནང་ཡོད།

དེ་ཡང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གསུང་བཤད་གནང་བའི་ནང་། རྒྱ་གར་གྱི་ཡུལ་བབས་སྲིད་བྱུས་ནང་ཧི་མ་ལ་ཡའི་ས་ཁུལ་རྣམས་གནད་དགག་ཆགས་ཡོད་པས། བོད་ཐེ་བའི་ཧི་མ་ལ་ཡའི་ས་ཁུལ་ལ་དོ་སྣང་ཆེ་བ་བྱེད་དགོས་སྐོར་དང་། གཞན་ཡང་ཧི་མ་ལ་ཡའི་རི་རྒྱུད་ཁུལ་ལ་རྒྱལ་ཁབ་དང་བདེ་སྲུང་ཁོ་ནའི་ལྟ་སྟངས་ཐོག་ནས་མ་ཡིན་པར་ཕྱོགས་མང་པོའི་ཐད་ནས་ཞིབ་འཇུག་བྱེད་དགོས་སྐོར་དང་། དེ་བཞིན་ཆོས་དང་རིག་གཞུང་། སྐད་ཡིག་བཅས་ཀྱི་འབྲེལ་ལམ་སྐོར་གསལ་སྟོན་གནང་སྟེ་ཧི་མ་ལ་ཡ་ཞེས་པ་ས་མཚམས་རྩོད་རྙོག་དང་བདེ་འཇགས་ཁོ་ནའི་གནད་དོན་མ་ཡིན་པར། འདས་པའི་དུས་སུ་དེ་ཉིད་ནི་རིག་གཞུང་འབྲེལ་ལམ་མཚོན། ལྟ་གྲུབ་དང་། ཚོང་འབྲེལ། དེ་བཞིན་བོད་དང་ཧི་མ་ལ་ཡའི་ཚུ་རོལ་གྱི་མི་དང་མི་བར་གྱི་འབྲེལ་བ་གྲུབ་ས་ཡིན་སྐོར་གསུངས།ཕྱོགས་མཚུངས་ཕྱི་དྲིལ་བཀའ་བློན་མཆོག་གིས་ཨ་རུ་ན་ཅལ་མངའ་སྡེའི་མོན་རྟ་དབང་རྒྱལ་དབང་སྐུ་ཕྲེང་དྲུག་པ་ཚངས་དབྱངས་རྒྱ་མཚོའི་འཁྲུངས་ཡུལ་ཡིན་པའི་ཆ་ནས་གནད་དགག་ཆགས་ཚུལ་དང་། ཧི་མ་ལ་ཡའི་ས་ཁུལ་གཞན་དང་བོད་བར་རིག་གཞུང་གི་འབྲེལ་བ་ཇི་ཡོད་སྐོར་འགྲེལ་བརྗོད་གནང་ཡོད་པ་མ་ཟད། བོད་མཐོ་སྒང་དེ་ཉིད་ཁོར་ཡུག་དང་ཨེ་ཤི་ཡར་ཆུའི་དཀའ་སེལ་སླད་གལ་ཆེན་པོ་ཆགས་ཚུལ་དང་། བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཧི་མ་ལ་ཡའི་མི་རིགས་ཀྱིས་གཞོགས་འདེགས་གནང་གལ་ཆེ་བའི་སྐོར་གསུངས། 

མཐར་ཚོགས་འདུ་གོ་སྒྲིག་པར་བསྔགས་བརྗོད་དང་སྦྲགས་གསུང་དོན། བོད་ཅེས་པ་ཆབ་སྲིད་ཀྱི་ལྟ་ཕྱོགས་ཁོ་ནའི་ཐོག་ནས་མ་ཡིན་པར་རིག་གཞུང་དང་འབྲེལ་ནས་ཞིབ་འཇུག་བྱེད་རྒྱུའང་གལ་ཆེན་པོ་ཡིན་པར་གསུངས་པ་བཞིན། མི་ལ་རས་པ་དང་མར་པ་ལོ་ཙཱ་བ་དང་འབྲེལ་བའི་བརྗོད་གཞིར་དགའ་བསུ་ཞུས་པའི་ཐོག་བོད་ཀྱི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་རྣམས་ཀྱི་རྣམ་ཐར་དང་། དེ་བཞིན་བོད་བརྒྱུད་ནང་བསྟན་གྱི་དཔེ་ཆ་སོགས་ལ་ཉམས་ཞིབ་གནང་དགོས་པའི་སྐུལ་མ་གནང་ཡོད། 

ཚོགས་འདུ་ཉིན་དང་པོའི་གསུང་བཤད་པ་རྣམས་ནི། རྒྱ་གར་གྱི་ནུབ་བངྒཱལ་མངའ་སྡེ་ནང་ཡོད་པའི་པྲེ་སི་ཊེན་སི་གཙུག་ལག་སློབ་གཉེར་ཁང་ (Presidency University) གི་སྤྱི་ཚོགས་རིག་པ་སྡེ་ཁག་གི་ཉེ་བའི་སློབ་དཔོན་ཆེན་མོ་དོན་གྲུབ་རྒྱ་ཚ་བོ་ཊི་ཡ་ལགས་དང་། གོ་ཝཱ་གཙུག་ལག་སློབ་གཉེར་ཁང་ (Goa University) གི་སྤྱི་ཚོགས་རིག་པ་སྡེ་ཁག་གི་ཉེ་བའི་སློབ་དཔོན་ཆེན་མོ་འབུམ་རམས་པ་ཇོ་ཧ་ན་ཀོ་ལི་ཧོ་ལགས།   ཀལ་ཀཏྟཱ་གཙུག་ལག་སློབ་གཉེར་ཁང་གི་ཁོངས་གཏོགས་དེཤ་བནྡུ་བུ་མོའི་མཐོ་སློབ་ (Deshbandu College) ཀྱི་ཨིན་ཡིག་སྡེ་ཁག་གི་ཉེ་བའི་སློབ་དཔོན་ཆེན་མོ་ལ་ལྡན་ཤར་པ་ལགས་སོགས་ཡིན་པ་དང་། འབུམ་རམས་པ་ཚེ་དབང་རྡོ་རྗེ་ལགས་ཀྱིས་ཚོགས་འདུ་གཙོ་སྐྱོང་གནང་ཡོད་པ་བཅས།།