༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་ས་གནས་འཕྲོད་བསྟེན་སྨན་ཁང་ཁག་ཏུ་སྨན་བཅོས་ཞབས་ཞུའི་གནས་ཚད་ཚད་ལྡན་བཟོ་ཆེད་འཕྲོད་བསྟེན་ལས་ཁུངས་ནས་སྨན་ཁང་ཞབས་ཞུའི་གནས་ཚད་འགན་ལེན་དང་འབྲེལ་བའི་ལམ་སྟོན་ཕྱི་ལོ་ ༢༠༢༡ ཟླ་ ༡༠ པའི་ནང་གཏན་འབེབས་གནང་དོན་ལྟར། ཕྱི་ལོ་ ༢༠༢༡ ཟླ་ ༡༢ ཚེས་ ༩ ནས་ཀརནཱ་ཊཀ་མངའ་སྡེའི་ནང་ཡོད་པའི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་ས་གནས་འཕྲོད་བསྟེན་སྨན་ཁང་ཁག་ཏུ་སྨན་ཁང་ཞབས་ཞུའི་གནས་ཚད་འགན་ལེན་ལས་གཞི་དང་འབྲེལ་བའི་ཟབ་སྦྱོང་དབུ་འཛུགས་ཀྱིས་ཕྱི་ལོ་ ༢༠༢༡ ཟླ་ ༡༢ ཚེས་ ༡༥ ཉིན་མཇུག་སྒྲིལ་གྱི་ཡོད་པ་རེད། ཧུན་སུར་བོད་མིའི་གཞིས་ཆགས་ཀྱི་ཕན་བདེ་སྨན་ཁང་དང་། སྦེལ་ཀོབ་འཚོ་བྱེད་སྨན་ཁང་གཉིས་ཀྱི་ལས་བྱེད་རྣམས་ལ་ཟབ་སྦྱོང་འདི་ཐོབ་ཟིན་ཞིང་། ཟབ་སྦྱོང་དེ་ཉིད་ཕྱི་ལོ་ ༢༠༢༡ ཟླ་ ༡༢ ཚེས་ ༡༤ ཉིན་ཀོ་ལི་གྷལ་ནང་ཡོད་པའི་སྨན་ཁང་གི་ལས་བྱེད་ཚོར་གནང་གི་ཡོད་པ་རེད། 

ཟབ་སྦྱོང་དེ་ཉིད་ཨ་རིའི་རོགས་ཚོགས་ཀྱི་མཐུན་རྒྱུར་འོག་འཕྲོད་བསྟེན་ལས་ཁུངས་ཀྱི་ (Optimal Service Model) ཞེས་པའི་ལས་གཞིའི་ཆ་ཤས་ཤིག་ཡིན་པ་དང་། སྤྱི་ཡོངས་ཀྱི་དགོས་དམིགས་ནི་བཙན་བྱོལ་བོད་མི་རྣམས་ལ་འཕྲོད་བསྟེན་ཞབས་ཞུ་སྤུས་ཚད་ལྡན་པ་ཡོང་སླད་སྨན་ཁང་གི་ལས་བྱེད་རྣམས་ཀྱི་སྨན་བཅོས་ཞབས་ཞུའི་གནས་ཚད་གོང་ཐོར་གཏོང་རྒྱུ་ཡིན། 

ཕྱི་ལོ་ ༢༠༢༡ ཟླ་ ༡༡ ནང་དེ་ལྟ་བུའི་ཟབ་སྦྱོང་མན་པཊ་དང་། སྦིར། བདེ་སྐྱིད་གླིང་། ལྡི་ལི། བན་དྷ་རའི་ས་གནས་འཕྲོད་བསྟེན་སྨན་ཁང་གི་ལས་བྱེད་རྣམས་ལ་གནང་ཡོད་ཅིང། མོན་གྷོ་འདོད་རྒུ་གླིང་དང་། མེའོ་ཆོས་འཕེལ་གླིང་། ལ་དྭགས་བསོད་ནམས་གླིང་བཅས་ཀྱི་སྨན་ཁང་གི་ལས་བྱེད་ཚོར་ཕྱི་ལོ་ ༢༠༢༢ ཟླ་  ༡ ནང་གནང་འཆར་ཡོད་པ་བཅས།།