༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༢༠ ནས་ ༢༣ བར་སིམ་སྤྱི་མི་འགྱུར་གཡུ་སྒྲོན་ལགས་དང་ཚབ་གསར་དབང་རྒྱལ་བླ་མ་ལགས་རྣམ་གཉིས་དབར་རྩིས་སྤྲོད་རྩིས་ལེན་གནང་ཡོད། དེ་ཡང་ཕྱི་ཚེས་ ༢༠ ཉིན་མི་འགྱུར་གཡུ་སྒྲོན་ལགས་ཀྱིས་སིམ་ལ་སྤྱི་ཁྱབ་ལས་ཁུངས་ཀྱི་ཁྱབ་ཁོངས་ཁག་ངོ་སྤྲོད་གནང་གྲུབ་རྗེས་དབང་རྒྱལ་བླ་མ་ལགས་ཀྱིས་སིམ་ལའི་རྫོང་དཔོན་ཨ་དྷི་ཏི་ཡ་ནེ་གི་ (Shri. Aditya Negi Ji) ལགས་དང་མཇལ་འཕྲད་དང་།ཕྱི་ཚེས་ ༢༡ ཉིན་སིམ་སྤྱིའི་བདག་དབང་དུ་ཡོད་པའི་ཡིག་ཆ་དང་། འཛིན་ཆས་སོགས་རྩིས་སྤྲོད་རྩིས་ལེན་གནང་ཡོད། དེ་རྗེས་མི་འགྱུར་གཡུ་སྒྲོན་ལགས་དང་སིམ་སྤྱི་དབང་རྒྱལ་བླ་མ་ལགས་རྣམ་གཉིས་ཀྱིས་ཧི་མཱ་ཅལ་མངའ་སྡེའི་ནང་སྲིད་དང་མེལ་ཚེ་ལས་ཁུངས་ (Home & Vigilance) ཀྱི་དམིགས་བསལ་དྲུང་ཆེ་སྐུ་ཞབས་རཱ་ཀེཤ་ཤཱར་མ་ (Rakesh Sharma) ལགས་དང་། ཁྲལ་འབབ་ལས་ཁུངས་ཀྱི་ཟུང་དྲུང་སྐུ་ཞབས་སུ་ནིལ་ཝར་མཱ་ (Sunil Verma) ལགས། ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ལས་ཁུངས་ཀྱི་དྲུང་ཆེ་(Ravindeer Nath Batta)ལགས་བཅས་ལ་མཇལ་འཕྲད་གནང་ཡོད། ཕྱི་ཚེས་ ༢༢ ཉིན་དབང་རྒྱལ་བླ་མ་ལགས་ཀྱིས་སིམ་སྤྱིའི་ཐུགས་འགན་བཞེས་གནང་ཡོད་པ་དང་ཕྱི་ཚེས་ ༢༣ ཉིན་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་རཱ་ཇེནྡྲ་ཝིཤྭ་ནཐ་ཨར་ལེ་ཀར་ (Shri. Rajendra Vishwanath Arlekar) མཆོག མངའ་སྡེའི་སྤྱི་ཁྱབ་དྲུང་ཆེ་སྐུ་ཞབས་རམ་སུ་སྦག་སིངྒ་ (Ram Subhag Singh) ལགས་དང་ར་ཇི་ནིཤ་ (Rajneesh) ལགས། སྤྱི་ཁྱབ་སྨན་བཅོས་འགན་འཛིན་སུ་རེ་ཁ་ཅོབ་རཱ་ (Surekha Chopra) ལགས་དང་མཇལ་འཕྲད་གནང་སྟེ་ཧི་མཱ་ཅལ་མངའ་སྡེའི་ནང་གནས་སྡོད་བཙན་བྱོལ་བོད་མིའི་གནད་དོན་གཙོ་ཆེ་ཁག་སྙན་སེང་ཞུས་ཡོད་པ་བཅས།།