༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྲོང་བཙན་དཔེ་མཛོད་ཁང་དང་། དགེ་འཕེལ་གླིང་གཞིས་ཆགས། བདེ་སྐྱིད་གླིང་གཞིས་ཆགས་བཅས་སུ་འཚམས་གཟིགས་གནང་གྲུབ་མཚམས་བདེ་སྐྱིད་གླིང་དང་དགེ་འཕེལ་གླིང་གཞིས་མི་རྣམས་ལ་གསུང་བཤད་གནང་ཡོད།
དེ་ཡང་ལྡེ་ར་ལྡུན་ས་གནས་འགོ་འཛིན་དོན་གྲུབ་རྒྱལ་པོ་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། ཕྱི་ལོ་ ༢༠༢༡ ཟླ་ ༥ ཚེས་ ༢༧ ཉིན་སྲིད་སྐྱོང་གིས་དམ་བཅའ་ཕུལ་བ་ནས་བཟུང་ད་བར་ཟླ་བ་དྲུག་ལྷག་ཙམ་འགྲོ་བཞིན་ཡོད། དུས་ཡུན་དེའི་ནང་གྲོས་ཚོགས་ཚོགས་མ་ཐུབ་པའི་རྐྱེན་གྱིས་ཟླ་བ་བཞི་ལྷག་ཙམ་རིང་བཀའ་བློན་རྣམ་པ་ཕེབས་མ་ཐུབ་པའི་གནས་སྟངས་བྱུང་བ་རེད། འོན་ཀྱང་འཛིན་སྐྱོང་གི་ངོས་ནས་མང་གཙོ་ཀ་བ་གསུམ་གྱི་དབང་ཆ་ཆ་བགོས་གནང་ཡོད་པ་བཞིན་འཛིན་སྐྱོང་གི་ལས་དོན་དེ་དག་མུ་མཐུད་རྒྱུན་སྐྱོང་ནས་འགྲོ་བཞིན་ཡོད། ཅེས་ཞུ་རྒྱུ་དང་།
དེ་དང་མཉམ་དུ་ཐོག་མ་ཉིད་ནས་ས་གནས་སོ་སོར་གང་མང་དང་གང་ཐུབ་བཅར་ཐུབ་ན་སྙམ་པའི་རེ་བ་འདི་ལྟར་བཅངས་པ་རེད། ཡིན་ནའང་ཏོག་དབྱིབས་གཉན་རིམས་ཀྱིས་རྐྱེན་པས་ཕྱི་ཟླ་ ༦་་་༧ བཅས་ཟླ་གྲངས་གཉིས་དང་ཕྱེད་ཀ་ལྷག་ཙམ་རིང་རྡ་ས་རང་ལ་ལྷག་སོང་། ངས་འོས་བསྡུའི་སྔོན་ནས་གལ་ཏེ་བཙན་བྱོལ་བོད་མིའི་གཞིས་ཆགས་ཁག་ཏུ་ཕྱིན་པ་ཡིན་ན་དང་ཐོག་ལ་དྭགས་ནས་འགོ་འཛུགས་རྒྱུ་ཡིན། ཞེས་ཞུས་པ་ལྟར་ཕྱི་ཟླ་ ༨ པའི་ནང་ལ་དྭགས་སུ་ཉིན་གྲངས་བརྒྱད་དང་ཕྱེད་ཀའི་རིང་ལ་དྭགས་ཀྱི་གྲོང་སྡེ་དང་། དགོན་པ། འབྲོག་ས་རེ་རེ་བཞིན་དང་། མི་མང་གི་གནས་སྟངས་དང་དཀའ་ངལ་སོགས་རྒྱུས་ལོན་བྱེད་རྒྱུའི་འབད་བརྩོན་བྱས་པ་རེད། ཟླ་བ་སྔོན་མར་ཨ་རུ་ཎཱ་ཅལ་ཁུལ་ལ་བཅར་རྒྱུ་བང་སྒྲིག་པ་རེད་དེ་སྟབས་མ་ལེགས་པ་ཞིག་ལ་ས་མཚམས་སོགས་ཀྱི་གནས་སྟངས་རྐྱེན་པས་ཨ་རུ་ཎཱ་ཅལ་ཁུལ་ལ་འགྲོ་རྒྱུར་ཕྲན་བུ་འགྱངས་ཏེ་ཀ་རྡོར་སྒང་གསུམ་དུ་ཕྱིན་པ་ཡིན།
དེ་རིང་ནས་བཟུང་ལྡེ་ར་ལྡུན་ས་གནས་འགོ་འཛིན་གྱི་ཁྱབ་ཁོངས་དང་། དེ་མིན་ཧི་མཱ་ཅལ་མངའ་སྡེའི་སིར་མོར་རྫོང་ནང་ཡོད་པའི་བཙན་བྱོལ་བོད་མིའི་གཞིས་ཆགས་ཁག་གི་མང་ཚོགས་དང་མཇལ་རྒྱུ་དང་། དེ་བཞིན་མི་མང་ལ་དཀའ་ངལ་དང་བདེ་སྡུག་གང་ཡོད་པ་ཡིན་ནའང་དེ་དག་ཉན་རྒྱུའི་གོ་སྐབས་ཤིག་བྱུང་བ་རེད། དེ་རིང་སྔ་དྲོ་རཱཇ་པུར་ནས་འགོ་བཙུགས་ཏེ་གཙོ་བོ་ས་སྐྱ་མ་དགོན་ལ་མཆོད་མཇལ་དང་། དེ་ནས་བཟོ་གྲྭ་དང་སློབ་གྲྭ་བཅས་རཱཇ་པུར་ཁུལ་གྱི་ལས་རིམ་ཚར་བ་རེད། དེ་རིང་བདེ་སྐྱིད་གླིང་ཁུལ་དང་དེ་ནས་བཙན་བྱོལ་བོད་མིའི་གཞིས་ཆགས་ཁག་གཞན་ལ་འགྲོ་རྒྱུ་ཡིན། ས་གནས་སུ་ཡོང་བའི་ཞོར་ལ་ང་ཚོས་ཞུ་དགོས་པ་ཁག་ཞུ་གི་རེད། རྣམ་པ་ཚོའི་སེམས་ནང་དོགས་པ་དེ་འདྲ་ཡོད་ན། ང་ཚོ་ས་གནས་སུ་དངོས་སུ་སླེབས་ཡོད་སྟབས། བསམ་ཚུལ་དང་དྲི་བ་སོགས་གང་གསུང་རྒྱུ་ཡོད་ན་དེ་རིང་གསུང་རྒྱུའི་གོ་སྐབས་རེད། དྲི་བ་གང་ཡོད་ནའང་ཐད་ཀར་གསུང་རོགས། རྒྱབ་ལ་གསུང་ན་ཕན་ཐོགས་གང་ཡང་མེད། དེར་བརྟེན་དེ་རིང་གི་གོ་སྐབས་འདི་ལེན་རོགས།
ཁྱེད་ཚོས་ང་ལ་བློ་འགེལ་ནས་འོས་བླུགས་ཏེ་སྲིད་སྐྱོང་གི་ཞབས་སྟེགས་སྟེང་བསྐྱལ་བ་རེད། ཁྱེད་རང་ཚོས་རེ་བ་བརྒྱབ་པ་ནང་བཞིན་ང་རང་ངོས་ནས་བོད་རྒྱའི་དཀའ་རྙོག་སེལ་རྒྱུ་གཙོ་བོར་གྱུར་པའི་བཙན་བྱོལ་བོད་མིའི་སྤྱི་ཚོགས་ནང་བོད་མིའི་བདེ་དོན་བསྒྲུབ་རྒྱུའི་སླད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་གཙོ་བོར་བཞག་སྟེ་དཀའ་ལས་རྒྱག་རྒྱུར་ཐེ་ཚོམ་རྩ་བ་ཉིད་ནས་མེད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་གཞི་ལ་བཞག་ནས་ལས་ཀ་བྱེད་རྒྱུར་ཆོད་སེམས་བརྟན་པོ་ཡོད། ཉེ་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་པའི་སྐབས་སྙན་གསེང་ཞུས་པ་ཡིན།
དེ་བཞིན་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་སྐབས་སུའང་ཞུས་པ་ཡིན། བླ་མའི་ངོས་ནས་ཐུགས་རྗེའི་བྱིན་རླབས་དང་གཟིགས་པ་ཡོད་པ་བརྩི་དགོས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་འཕགས་པ་སྤྱན་རས་གཟིགས་ཀྱི་རྣམ་སྤྲུལ་རེད། བྱམས་སྙིང་རྗེའི་རང་གཟུགས་ཡིན་སྟབས། ཚང་མར་བརྩེ་བ་ཡོད་པ་རེད། འོན་ཀྱང་ང་ཚོས་ཕྱོགས་གཅིག་ནས་༸རྒྱལ་བ་རིན་པོ་ཆེའི་བཀའ་ལ་རྩི་ཡི་ཡོད། ཅེས་བརྗོད་ཀྱི་ཡོད་ནའང་རྨོངས་པའི་དབང་གིས་ལས་ཀ་ལྡོག་ཕྱོགས་བྱེད་རྒྱུ་དེ་འདྲ་བྱེད་རྒྱུ་ཡོང་གི་ཡོད་པ་རེད། འགའ་ཤས་ཆེད་མངགས་བྱེད་མཁན་དེ་འདྲ་ཡོང་གི་ཡོད། ༸རྒྱལ་བ་རིན་པོའི་དགོངས་པ་གང་ཡིན་ཤེས་བཞིན་དུ་ལྡོག་ཕྱོགས་བྱེད་མཁན་དེ་འདྲ་ཡོང་བཞིན་ཡོད། དེར་བརྟེན་ངས་ཚོགས་འདུ་འགའ་ཤས་ནང་བརྗོད་རྒྱུ་བྱུང་། གལ་ཆེ་ཤོས་དེ་གང་རེད་ཅེ་ན། ང་ཚོར་༸རྒྱལ་བ་རིན་པོ་ཆེ་ལས་ལྷག་བཀའ་དྲིན་ཆེ་བ་སུ་གང་ཡང་མེད། ད་ལྟ་གང་ཡོད་པ་དེ་དག་ཚང་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བྱུང་བ་རེད། ༸རྒྱལ་བ་རིན་པོ་ཆེའི་དགོངས་པ་གང་ཡིན་པ་དེ་རྟོགས་དགོས་རྒྱུ་གལ་ཆེན་པོ་རེད། ༸རྒྱལ་བ་རིན་པོ་ཆེ་བཀའ་དྲིན་ཆེན་པོ་ཡིན་ཞེས་ཁ་ནས་བགྲངས་པ་ཙམ་གྱིས་ཕན་གྱི་ཡོད་པ་མ་རེད། གཙོ་བོ་བསམ་བློ་གཏོང་སྟངས་ཀྱི་ཐོག་ནས་འགྱུར་བ་ཐེབས་དགོས། ཞེས་སོགས་ཀྱི་གསུང་བཤད་གནང་རྗེས་མང་ཚོགས་ཀྱི་དྲི་བར་ལན་འདེབས་ཞིབ་རྒྱས་གནང་ཡོད་པ་བཅས། །
