༄༅། །ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཟུར་པ་སྐུ་ཞབས་ཧར་རེ་རེ་ཌི་ (Harry Reid) མཆོག་ཕྱི་ལོ་ ༢༠༢༡ ཟླ་ ༡༢ ཚེས་ ༢༨ ཉིན་དགུང་གྲངས་ ༨༢  ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཕྱི་ལོ་ ༢༠༢༡ ཟླ་ ༡༢ ཚེས་ ༣༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་དེ་ཉིད་ཀྱི་སྐུ་ཟླ་ལནྡྲ་རེ་ཌི་ (Landra Reid) ལགས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན།  སྐུ་ཉིད་ཀྱི་བརྩེ་བའི་སྐུ་ཟླ་དང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཧར་རེ་རེ་ཌི་(Harry Reid) མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཤེས་རྟོགས་བྱུང་བས་ཕྲན་རང་ཉིད་ཧ་ཅང་བློ་ཕམ་བྱུང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། དེ་བཞིན་སྐུ་ཉིད་ཀྱིས་གཙོས་ནང་མི་སྤུན་མཆེད་ཡོངས་ལ་ཐུགས་གསོ་ཞུ་རྒྱུ་ཡིན། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཧར་རེ་རེ་ཌི་མཆོག་གིས་བོད་ནང་གི་ཛ་དྲག་ཆེ་བའི་གནས་སྟངས་སྐོར་འཛེམ་ཟོན་མེད་པར་གསུངས་པ་དང་། དེ་བཞིན་བདེན་པའི་གནས་ལུགས་གཞི་རྩ་བཟུང་སྟེ་བོད་དོན་སླད་རྒྱབ་སྐྱོར་གནང་བར་བོད་མི་རྣམས་ཀྱིས་དྲན་གསོ་དང་སྦྲགས་བཀའ་དྲིན་ཤིན་ཏུ་ཆེ་ཞེས་ཞུ་ཡི་ཡོད།

དམ་པ་ཁོང་དེ་སྔ་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཡིན་པའི་སྐབས་ཁོང་གིས་ཕྱི་ལོ་ ༢༠༡༤ ལོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོས་ཚོགས་གོང་མའི་ནང་སྨོན་ལམ་འདུ་ཚོགས་ཀྱི་དབུ་འབྱེད་མཛད་སྒོའི་ཚོགས་མགོན་དུ་མགྲོན་འབོད་ཞུས་ཡོད། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཧར་རེ་རེ་ཌི་མཆོག་གིས་ལོ་ངོ་བཅུ་ཕྲག་མང་པོའི་རིང་མི་མང་དང་། རྒྱལ་ཁབ། མི་གཞན་བཅས་ཡར་རྒྱས་གོང་འཕེལ་གྱི་ཆེད་བློས་བཏང་གིས་ཞབས་འདེགས་རླབས་ཆེན་བསྒྲུབས་ཏེ་མི་ཚེ་དོན་དང་ལྡན་པ་བསྐྱལ་ཡོད།
དེར་བརྟེན་དམ་པ་ཁོང་ནི་ཁྱད་དུ་འཕགས་པའི་དབུ་ཁྲིད་དང་མི་མང་གི་སྲི་ཞུ་བ་ཞིག་ཡིན་པའི་ཆ་ནས་ཁོང་གི་མཛད་རྗེས་རྣམས་དུས་རྟག་ཏུ་དྲན་ངེས་ཡིན། སླར་ཡང་ངས་འདས་པོ་དམ་པ་དེ་ཉིད་ཀྱི་ཆེད་དུ་སྨོན་ལམ་གསོལ་འདེབས་དང་། སྐུ་ཉིད་ཀྱིས་གཙོས་ནང་མི་སྤུན་མཆེད་ཡོངས་ལ་ཐུགས་གསོ་ཞུ་རྒྱུ་ཡིན། ཞེས་འཁོད་ཡོད།།