༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༥ ཉིན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་ (Robert Dole) མཆོག་དགུང་གྲངས་ ༩༨ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར། དེ་རིང་སྟེ་ཕྱི་ལོ་ ༢༠༢༡ ཟླ་ ༡༢ ཚེས་ ༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་ (Robert Dole) མཆོག་གི་སྐུ་ཟླ་ལྕམ་སྐུ་ཨེ་ལི་ཛེ་བྷི་ཐི་ཌོལ་ (Elizabeth Dole) ལགས་ལ་ཐུགས་གསོའི་གསུང་འཕྲིན་ཞིག་གནང་བའི་ནང་འཁོད་དོན། སྐུ་ཉིད་ཀྱི་བརྩེ་བའི་བཟའ་ཟླ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་མང་གི་གྲོགས་པོ་རྙིང་པ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་ཧ་ཅང་བློ་ཕམ་བྱུང་། ངས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྐུ་ཉིད་ལ་ཐུགས་གསོ་ཞུ་རྒྱུ་ཡིན། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་མཆོག་གིས་འདས་པའི་ལོ་ངོ་ ༣༦ རིང་ཨ་རིའི་མི་མང་ལ་བྱམས་བརྩེ་དང་། ཞི་དུལ། དྲང་ཚུགས་བརྟན་པོ་བཅས་ཀྱི་སྒོ་ནས་ཞབས་འདེགས་བསྒྲུབས་ཡོད་པ་དང་། དམ་པ་ཁོང་སྐུ་འཚོ་བཞུགས་རིང་དཀའ་ངལ་ཁྱད་བསད་ཀྱིས་གདོང་ལེན་གནང་བ་དེས་ཨ་རིའི་གཞོན་སྐྱེས་ཚོ་དང་ལྷན་དམིགས་བསལ་གྱི་འབྲེལ་བ་གཏིང་ཟབ་བསྐྲུན་ཡོད།
ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་མཆོག་ནི། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མི་མང་གི་གྲོགས་པོ་རྙིང་པ་ཞིག་ཡིན་ཞིང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དམ་པ་ཁོང་དང་ལྷན་ཕྱི་ལོ་ ༡༩༩༢ ཕྱི་ཟླ་ ༩ དང་། ཕྱི་ལོ་ ༡༩༩༥ ཕྱི་ཟླ་ ༩། ཕྱི་ལོ་ ༡༩༩༧ བཅས་ཚུད་པའི་ཐེངས་མང་རིང་མཇལ་འཕྲད་མཛད་ཡོད་པ་མ་ཟད། ཕྱི་ལོ་ ༡༩༩༥ ལོར་དམ་པ་ཁོང་ཨ་རིའི་གྲོས་ཚོགས་གོང་མའི་མང་མོས་དབུ་ཁྲིད་ཐེངས་གཉིས་པ་གནང་བའི་སྐབས་སུའང་མགོན་པོ་གང་ཉིད་ཀྱིས་དམ་པ་ཁོང་ལ་ཕྱག་བྲིས་བསྩལ་ཏེ་ཨ་རིའི་གྲོས་ཚོགས་ཀྱི་ངོས་ནས་བོད་ནང་མནར་སྤྱོད་མྱོང་བཞིན་པའི་བོད་མི་རྣམས་ལ་ཐུགས་སྣང་གནང་དགོས་པའི་རེ་སྐུལ་མཛད་ཡོད།
ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་རོ་བྷར་ཊི་ཌོལ་མཆོག་གིས་དམག་འཁྲུག་སྐབས་ཁོང་སྒེར་ལ་འཕྲད་པའི་དཀའ་སྡུག་གི་མྱོང་བ་རྣམས་རྒྱ་ནག་གི་དབང་བསྒྱུར་འོག་དཀའ་སྡུག་མྱོང་བཞིན་པའི་བོད་མི་རྣམས་ལ་གདུང་སེམས་མཉམ་སྐྱེའི་ཚུལ་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་སྙན་སེང་ཞུས་སྟབས། བོད་མི་མང་གིས་དམ་པ་དེ་ཉིད་ལ་ཧ་ཅང་དགའ་མོས་ཞུ་གི་ཡོད། དམ་པ་དེ་ཉིད་སྐུ་ཚེའི་འཕེན་པ་རྫོགས་པ་ནི་བོད་མི་ཚོར་མཚོན་ན་དྲང་བདེན་ལ་རྒྱབ་སྐྱོར་གནང་མཁན་དང་བོད་ཀྱི་བློ་ཐུབ་ཀྱི་གྲོགས་པོ་ཞིག་སྐུ་ཚེའི་འཕེན་པ་རྫོགས་པ་མཚོན་གྱི་ཡོད། དམ་པ་དེ་ཉིད་སྐུ་ཚེའི་འཕེན་པ་རྫོགས་པར་ཧ་ཅང་བློ་ཕམ་དང་སྦྲགས་དམ་པ་ཁོང་གི་མཛད་རྗེས་རྣམས་དུས་རྟག་ཏུ་བོད་མི་རྣམས་ཀྱི་ཐུགས་སུ་ཉར་ནས་སེམས་ཤུགས་བསྐྱེད་དེ་མདུན་དུ་འཕྲད་བཞིན་པའི་དཀའ་ངལ་རྣམས་ལ་མུ་མཐུད་གདོང་ལེན་བྱ་རྒྱུ་ཡིན། ཞེས་འཁོད་ཡོད་པ་བཅས།།
