༄༅། །རྫ་ཆུ་ཁ་བ་རོང་ནས་ཡིན་པའི་དགེ་འདུན་པ་བསྟན་འཛིན་དར་རྒྱས་ལགས་ལོ་གཅིག་སྔོན་རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ཡོད་ཅིང་། ཁོང་འཛིན་བཟུང་བྱ་དགོས་པའི་གཞུང་འབྲེལ་རྒྱུ་མཚན་དང་ཁོང་གི་གཟུགས་གཞིའི་གནས་བབ་སོགས་ད་བར་གང་ཡང་ཤེས་རྟོགས་བྱུང་མེད། 

འདི་གར་གནས་ཚུལ་འབྱོར་བ་ལྟར་ན། ཕྱི་ལོ་ ༢༠༢༠ ཟླ་ ༩ ནང་བོད་ཁམས་དཀར་མཛེས་ཁུལ་གྱི་བ་རོང་དགོན་པའི་དགེ་འདུན་པ་བསྟན་འཛིན་དར་རྒྱས་ལགས་དང་དགེ་འདུན་པ་གཞན་ཞིག་ནས་བོད་ཞི་བས་བཅིངས་བཀྲོལ་བཏང་ནས་ལོ་ངོ་བདུན་ཅུ་འཁོར་བ་ཟེར་བའི་དུས་སྟོན་ལ་ངོས་ལེན་མ་བྱས་པར་རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ཡོད་པ་དང་། ད་ལྟའི་ཆར་ཁོང་གཉིས་སེར་ཤུལ་རྫོང་དུ་དོ་དམ་བཙོན་ཁང་ནང་གཞན་དང་འབྲེལ་ལམ་བྱ་རྒྱུའི་གོ་སྐབས་མེད་པའི་དོ་དམ་བཙོན་འཇུག་བྱས་འདུག། 

དེ་ཡང་གནས་ཚུལ་མཁོ་སྤྲོད་གནང་མཁན་གྱིས་གསུངས་པར་གཞིགས་ན། བསྟན་འཛིན་དར་རྒྱས་ལགས་ཀྱིས་བོད་ཞི་བས་བཅིངས་བཀྲོལ་བཏང་ནས་ལོ་ངོ་བདུན་ཅུ་འཁོར་བའི་དུས་སྟོན་ཟེར་བ་ཡོང་རྒྱུ་མེད་ཅེས་ཡང་ཡང་བཤད་དེ་དུས་སྟོན་དེར་དགག་པ་ཤུགས་ཆེ་བརྒྱབ་ཡོད་པ་དང་།  ཁོང་གིས་རྒྱ་ནག་གཞུང་གིས་ཆབ་སྲིད་ཐོག་ནས་ཚོར་བ་སྐྱེན་པོར་ངོས་འཛིན་བྱེད་པའི་གནས་ཚུལ་དང་རྩོམ་ཡིག་སྤྱི་ཚོགས་དྲ་རྒྱ་ཐོག་ཏུ་འགྲེམས་སྤེལ་བྱས་པ་ལ་བརྟེན་ནས་ཀྱང་འཛིན་བཟུང་བྱས་ཡོད་སྲིད་པར་ངོས་འཛིན་བྱེད་མཁན་མང་པོ་ཡོད་པར་གསུངས། 

བསྟན་འཛིན་དར་རྒྱས་ལགས་དང་ལྷན་དུ་འཛིན་བཟུང་བྱས་པའི་དགེ་འདུན་པ་གཞན་དེ་ཡང་སེར་ཤུལ་རྫོང་དབོན་པོ་གྲོང་ཁྱེར་ནང་ཡོད་པའི་བ་རོང་དགོན་པའི་དགེ་འདུན་པ་རེད་འདུག 

གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། བསྟན་འཛིན་དར་རྒྱས་ལགས་ཀྱི་ཁ་པར་ནང་དུ་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་། ཆབ་སྲིད་ཐོག་ནས་ཚོར་བ་སྐྱེན་པོར་ངོས་འཛིན་བྱས་པའི་གནས་ཚུལ་ཉར་ཚགས་བྱས་ཡོད་པ་ཤེས་རྟོགས་བྱུང་ཕྲལ་ཁོང་འཛིན་བཟུང་བཀག་ཉར་བྱས་འདུག་ཅིང་། ཁོང་དང་མཉམ་དུ་དགེ་འདུན་པ་གཞན་འགའ་ཤས་ཀྱང་འཛིན་བཟུང་བྱས་ཡོད་ཚོད་འདུག ཁོང་འཛིན་བཟུང་བྱས་ནས་ད་བར་ལོ་གཅིག་ལྷག་འགྲོ་བཞིན་ཡོད་ཀྱང་། ད་དུང་ཁོང་གི་ནང་མི་དང་གཉེན་འབྲེལ་སུས་ཀྱང་ཁོང་ལ་བཙོན་འཇུག་ཁྲིམས་ཐག་གང་བཅད་ཡོད་མེད་དང་། ད་ལྟ་གང་དུ་ཡོད་མེད་སོགས་ཤེས་རྟོགས་གང་ཡང་མེད་པར་ལྷག་ཡོད་པས་སེམས་ཁྲལ་བྱེད་བཞིན་པ་བཙན་བྱོལ་ནང་ཡོད་པའི་བོད་མི་གཉིས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གནས་ཚུལ་འགྲེལ་བརྗོད་གནང་འདུག 

བསྟན་འཛིན་དར་རྒྱས་ལགས་ཀྱི་སྐོར་གནས་ཚུལ་དང་ཁོང་གང་དུ་ཡོད་མེད་སོགས་ཤེས་རྟོགས་མེད་སྟབས། དོ་དམ་བཙོན་ཁང་ནང་དུ་ཁོང་གི་གནས་སྟངས་གང་འདྲ་ཡོད་མེད་ཐད་མི་མང་པོས་སེམས་འཚབ་བྱེད་ཀྱི་ཡོད། 

རྒྱ་ནག་གཞུང་གིས་ཉེ་བའི་ཆར་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་ལ་དམིགས་པའི་ངོ་རྒོལ་ལས་འགུལ་དང་། བོད་མིར་དྲག་གནོན་བྱས་པའི་ཁྲོད་ནས་བསྟན་འཛིན་དར་རྒྱས་ལགས་ཀྱི་གནས་ཚུལ་དེ་རྒྱ་ནག་གཞུང་གིས་གཞན་དང་འབྲེལ་ལམ་བྱ་རྒྱུའི་གོ་སྐབས་མེད་པའི་དོ་དམ་བཙོན་འཇུག་བྱས་པ་དང་། བཙན་ཤེད་ཀྱིས་གར་སོང་ཆ་མེད་བཏང་བའི་ཐོ་གཞུང་ནང་ནས་གསར་ཤོས་ཆགས་ཡོད་པ་བཅས།།