༄༅། །ཉི་ཧོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་སྲུང་བརྩི་སླད་གཏམ་བཤད་དང་། ཞི་བའི་ལས་འགུལ་ནང་མཉམ་ཞུགས་ཀྱིས་ཨེ་ཤི་ཡ་དང་འཛམ་གླིང་ཡོངས་སུ་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པའི་འབོད་སྐུལ་གནང་ཡོད་པ་དང་། གཏམ་བཤད་དང་ཞི་བའི་ལས་འགུལ་གྱི་ལས་རིམ་དེ་ནི་ཨེ་ཤི་ཡ་ནང་གི་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་རོགས་ཞེས་པའི་ཚོགས་ཆུང་གིས་ཉི་ཧོང་གི་རྒྱལ་ས་ཊོག་ཡོ་ (Tokyo) ནང་རྟེན་གཞི་བྱས་པའི་ཊོག་ཡོ་བུད་མེད་ཀྱི་ཚོགས་ཁང་ (Tokyo Women`s Plaza Hall) ཞེས་པའི་ནང་གོ་སྒྲིག་གནང་ཡོད།
ལས་རིམ་དེའི་ནང་ཉི་ཧོང་བོད་རིགས་པ་དང་། བོད་རང་བཙན་སློབ་ཕྲུག་ཚོགས་པ། ཤར་ཏུར་ཀི་སི་ཐན། ལྷོ་སོག་པོ། ཧོང་ཀོང་། ཐའེ་ཝན། རྒྱ་རིགས་མང་གཙོ་ལས་འགུལ་ཚོགས་པ། འབར་མ། ཐའེ་ལེནྜ། ཀམ་བོ་ཌི་ཡཱ་བཅས་ཀྱི་སྐུ་ཚབ་དང་། དེ་བཞིན་ཉི་ཧོང་གི་རྒྱབ་སྐྱོར་བ་བཅས་མཉམ་ཞུགས་ཀྱིས་འགྲོ་བ་མིའི་ཐོབ་ཐང་གི་གལ་གནད་དང་། འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་རྒྱལ་ཁབ་རྣམས་ལ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་མཚམས་འཇོག་བྱེད་དགོས་པའི་འབོད་སྐུལ་ཤུགས་ཆེ་གནང་འདུག
དེ་ཡང་ཉི་ཧོང་སྐུ་ཚབ་དོན་གཅོད་འབུམ་རམས་པ་ཨརྱ་ཚེ་དབང་རྒྱལ་པོ་ལགས་ཀྱིས་ལས་རིམ་གོ་སྒྲིག་གནང་མཁན་རྣམས་དང་། གཏམ་བཤད་ཀྱི་གོ་སྐབས་གནང་བར་ཐུགས་རྗེ་ཆེ་ཞུས་པ་དང་སྦྲགས་ཕྱི་ལོ་ ༡༩༤༧ ལོར་རྒྱ་ནག་ཚུད་པའི་འཛམ་གླིང་གི་རྒྱལ་ཁབ་ཕལ་ཆེ་བས་རྒྱལ་ཚོགས་སུ་འགྲོ་བ་མིའི་ཐོབ་ཐང་ལ་རྒྱབ་སྐྱོར་གྱིས་གྲོས་མཐུན་མཚན་རྟགས་བཀོད་པ་དང་། མཉམ་འབྲེལ་རྒྱལ་ཚོགས་ནས་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་གནང་ནས་ད་བར་མི་ལོ་ ༧༥ ཙམ་འགྲོ་བཞིན་ཡོད་ཀྱང་། རྒྱ་ནག་གཞུང་གིས་མུ་མཐུད་བོད་ཚུད་པའི་རྒྱ་ནག་གི་དབང་བསྒྱུར་འོག་ཡོད་པའི་ལུང་པ་གཞན་སོགས་ཀྱི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད། ཚང་མ་མཉམ་རུབ་ཐོག་སྲིད་དབང་སྒེར་འཛིན་པའི་གཞུང་ཁག་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་རྣམས་ལ་མཐའ་གཅིག་ཏུ་ངོ་རྒོལ་གནང་སྟེ་རྒྱལ་སྤྱིའི་ཚོགས་སྡེ་ཁག་ལ་སྙན་སེང་ཞུ་དགོས། ཞེས་དང་། གཞན་ཡང་ཁོང་གིས་རྒྱ་ནག་དམར་ཤོག་གཞུང་གིས་བོད་ནང་དྲག་སྤྱོད་ཐེངས་བརྒྱ་སྤེལ་བ་ཞེས་པའི་ཉི་ཧོང་སྐད་དུ་ཡོད་པའི་དཔེ་དེབ་ཅིག་པར་སྐྲུན་ཞུས་པའི་སྐོར་གསལ་བསྒྲགས་གནང་ཡོད།
ཧོང་ཀོང་དང་ཐའེ་ཝན་གྱི་སྐུ་ཚབ་ནས་རྒྱ་ནག་གཞུང་གིས་དྲག་པོའི་སྲིད་བྱུས་ལག་བསྟར་བྱེད་བཞིན་པར་མཐའ་གཅིག་ཏུ་ངོ་རྒོལ་གནང་ཡོད། དེ་བཞིན་ལྷོ་སོག་པོའི་སྐུ་ཚབ་ནས་ཕྱི་ལོ་ ༢༠༢༢ ལོའི་པེ་ཅིང་དགུང་དུས་ཨོ་རྩེད་འགྲན་ཚོགས་བཀག་སྡོམ་བྱེད་དགོས་པའི་སྐོར་དང་། འབར་མ་དང་ཐའེ་ལེནྜ། ཀམ་བོ་ཌི་ཡཱ་བཅས་ཀྱི་སྐུ་ཚབ་ནས་སོ་སོའི་རྒྱལ་ཁབ་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེར་རྒྱ་ནག་གཞུང་གིས་རྒྱབ་སྐྱོར་བྱེད་བཞིན་པ་སོགས་ཀྱི་སྐོར་གསུངས། གཏམ་བཤད་དང་ཞི་བདེའི་ལས་རིམ་གྲོལ་རྗེས་མི་གྲངས་ ༢༠༠ ཙམ་མཉམ་འཛོམས་ཀྱིས་རྒྱལ་ས་ཊོག་ཡོའི་ཁྲོམ་ལམ་དུ་ཞི་བའི་གོམ་བགྲོད་གནང་སྟེ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་ངོ་རྒོལ་གནང་ཡོད་པ་བཅས།།
