༄༅། །དེ་རིང་། ལྷར་བཅས་སྲིད་ཞིའི་གཙུག་རྒྱན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་སུམ་ཅུ་སོ་གཉིས་འཁོར་བའི་དུས་ཚེས་ཁྱད་པར་ཅན་འདིར། བཀའ་ཤག་གིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་མགོན་པོ་མཆོག་གི་བཀའ་དྲིན་རྗེས་སུ་དྲན་པའི་སྒོ་ནས། གསང་གསུམ་གྱི་མཛད་འཕྲིན་མཐའ་དག་བསྐལ་པའི་བར་དུ་གེགས་མེད་སྐྱོང་བཞེས་མཛད་གནང་གི་གསོལ་འདེབས་དང་སྦྲགས། གཞིས་བྱེས་བོད་མི་ཡོངས་ལ་དུས་དྲན་གྱི་འཚམས་འདྲི་བཀྲ་ཤིས་བདེ་ལེགས་ཞུ་ཡི་ཡོད།

ནོ་སྦེལ་གཟེངས་རྟགས་ཚོགས་ཆུང་གིས་ཕྱི་ལོ་ ༡༩༨༩ ཟླ་ ༡༠ ཚེས་ ༥ ཉིན་ཨོ་སི་ལོར་གསལ་བསྒྲགས་སྤེལ་བའི་ནང་། “ནོ་སྦེལ་གཟེངས་རྟགས་ཚོགས་ཆུང་ནས་ཕྱི་ལོ་ ༡༩༨༩ ལོའི་ནོ་སྦེལ་ཞི་བདེའི་གཟེངས་རྟགས་དེ་བོད་མིའི་ཆོས་སྲིད་གཉིས་ཀྱི་དབུ་འཁྲིད་ཏཱ་ལའི་བླ་མ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོ་མཆོག་ལ་འབུལ་གཏན་འཁེལ་བ་ཡིན།

གཟེངས་རྟགས་ཚོགས་ཆུང་ནས་ནན་བརྗོད་ཞུ་རྒྱུར། ༸གོང་ས་༸ཏཱ་ལའི་བླ་མ་མཆོག་གིས་བོད་ཀྱི་རང་དབང་རྩོད་ལེན་ཁྲོད་འཚེ་བའི་ལས་རྩོམ་རྒྱུར་མཐའ་གཅིག་ཏུ་དགག་ཆ་གནང་བ་ཙམ་དུ་མ་ཟད། ཁོང་གིས་དེ་ལས་ལྡོག་སྟེ་བཟོད་བསྲན་དང་ཕན་ཚུན་བརྩི་བཀུར་གཞི་རྩར་བཟུང་བའི་ཞི་མཐུན་འགྲིག་འཇགས་ཀྱི་ཐབས་ཚུལ་ལ་བརྟེན་ནས། བོད་མིའི་ལོ་རྒྱུས་དང་རིག་གཞུང་གི་ཤུལ་བཞག་སྲུང་སྐྱོབ་ཀྱི་བཞེད་དགོངས་འདོན་གནང་མཛད་ཡོད།

༸གོང་ས་༸ཏཱ་ལའི་བླ་མ་མཆོག་གི་ཞི་བདེའི་ལྟ་གྲུབ་ནི་འགྲོ་བ་མི་རྣམས་ཚུད་པའི་སེམས་ཅན་ཐམས་ཅད་དང་། རང་བྱུང་སྣོད་ཀྱི་བཀོད་པ་བཅས་པར་བརྩི་མཐོང་གནང་བའི་འཇིག་རྟེན་སྤྱི་སྨན་གྱི་འགན་ཁུར་ལས་བྱུང་བ་ཞིག་ཡིན།  ནོ་སྦེལ་ཚོགས་ཆུང་གི་ངོས་ནས། ༸གོང་ས་༸ཏཱ་ལའི་བླ་མ་མཆོག་གིས་རྒྱལ་སྤྱིའི་རྩོད་རྙོག་དང་། འགྲོ་བ་མིའི་ཐོབ་ཐང་གི་གནད་དོན། གོ་ལའི་ཁོར་ཡུག་གི་དཀའ་ངལ་རྣམས་སེལ་ཆེད་དུ་བཟང་ཕྱོགས་དང་མདུན་བསྐྱོད་ཀྱི་ཐབས་ལམ་ཞིག་འདོན་གནང་མཛད་ཡོད་པའི་ངོས་འཛིན་ཞུ་ཡི་ཡོད་” ཅེས་འཁོད་ཡོད་ཅིང་།

༸གོང་ས་༸སྐྱབས་མགོན་ཆེན་པོ་མཆོག་ནས་གཟེངས་བསྟོད་མཛད་སྒོའི་སྟེང་། “ཁྱེད་རྣམ་པས་བོད་ནས་ཡོང་བའི་གྲྭ་པ་སྙོམ་ཆུང་ཞིག་ལ་གལ་ཆེའི་གཟེངས་བསྟོད་འདི་འདྲ་ཞིག་གནང་བ་དེས་ངོས་རང་ལ་ཆེ་མཐོང་གི་ཚོར་བ་དང༌། སེམས་འགུལ་གཏིང་ཟབ་ཐེབས་བྱུང༌། ངོས་རང་དམིགས་བསལ་ཅན་གྱི་མི་ཞིག་མིན་ནའང་གཟེངས་བསྟོད་འདིས་ངོས་ནས་སངས་རྒྱས་བཅོམ་ལྡན་འདས་དང༌། འཕགས་བོད་སྐྱེས་ཆེན་དམ་པ་རྣམས་ཀྱི་བསླབ་བྱ། གཞན་ཕན་དང༌། བྱམས་པ། སྙིང་རྗེ། འཚེ་བ་མེད་པ་བཅས་ཀྱི་སྙིང་པོ་ཉམས་ལེན་ཅི་ཐུབ་བྱས་པ་དེར་ངོས་འཛིན་གནང་བ་ཞིག་ཡིན་པར་ཡིད་ཆེས་ཡོད། ངོས་ནས་འཛམ་གླིང་གི་ས་ཕྱོགས་གང་སར་མནར་གཅོད་འོག་ཚུད་པའི་སྐྱེ་བོ་སྤྱི་དང༌། འཛམ་གླིང་ཞི་བདེ་དང་རང་དབང་གི་དོན་དུ་འབད་བརྩོན་བྱེད་བཞིན་པའི་སྐྱེ་བོ་ཡོངས། ངོས་རང་ལ་བསླབ་བྱ་དང་སེམས་འགུལ་ཐེབས་སའི་འཚེ་མེད་ཞི་བའི་ལག་ལེན་བརྒྱུད་འགྱུར་བ་གཏོང་རྒྱུའི་ལམ་སྲོལ་དེང་དུས་ཡོད་པ་འདི་ཉིད་གསར་གཏོད་གནང་མཁན་བདག་ཉིད་ཆེན་པོ་གཱན་དྷི་མཆོག ཁྱད་པར་དཀའ་སྡུག་ཚད་མེད་མྱངས་དང་མྱོང་བཞིན་པའི་སྙིང་སྟོབས་ཅན་གྱི་ངོས་ཀྱི་ཡུལ་མི་བོད་མི་ཕོ་མོ་ས་ཡ་དྲུག་གི་ཚབ་ཞུས་ཏེ་གཟེངས་བསྟོད་ངོས་བཞེས་ཞུ་ཡི་ཡོད།”ཅེས་བཀའ་གནང་ཡོད།

༸གོང་ས་༸སྐྱབས་མགོན་ཆེན་པོ་མཆོག་གི་བྱམས་བརྩེའི་ལྟ་གྲུབ་འདི་སྟེས་དབང་གིས་བྱུང་བ་ཞིག་མིན་པའི་སྒྲུབ་བྱེད་ནི། ༸གོང་ས་མཆོག་དང་གང་གི་ཕེབས་རྗེས་སྙེགས་པའི་བོད་མི་ཁྲི་བརྒྱད་ཙམ་བཙན་བྱོལ་དུ་ཕེབས་འབྱོར་བྱུང་ནས་ལོ་གཅིག་དང་ཕྱེད་མ་འགོར་གོང་གི་ཕྱི་ལོ་ ༡༩༦༠ ཟླ་ ༩ ཚེས་ ༢༩ ཉིན་ལྗགས་རྩོམ་མཛད་པའི་ཚད་མེད་ཡོན་ཏན་མར། ཉོན་མོངས་གདོན་གྱིས་སྨྱོས་པའི་བརླང་སྤྱོད་ཀྱིས། །རང་གཞན་གཉིས་ཕུང་བགྱིད་པའི་སྙིང་རྗེའི་ཡུལ། །མི་བསྲུན་སྐྱེ་བོའི་ཚོགས་རྣམས་བླང་དོར་མིག །ཡོངས་ཐོབ་བྱམས་བརྩེས་མཛའ་བའི་དཔལ་ལ་སྦྱོར། །ཞེས་ཐུགས་སྨོན་གནང་ཡོད་པ་ལས། སྐབས་དེ་དུས་ནས་རང་ཡུལ་འཕྲོག་མཁན་གྱི་བཙན་འཛུལ་བར་འཁོན་སྡང་གི་རྣམ་འགྱུར་ཕྲ་མོ་ཙམ་ཡང་བསྟན་གནང་མེད་ལ། 

ཕྱི་ལོ་ ༡༩༧༡ ལོའི་གསུམ་བཅུ་དུས་དྲན་གྱི་གསུང་འཕྲིན་དུ། “དངོས་དོན་དུ་བོད་མི་ཚོས་རྒྱ་མི་གུང་བྲན་ལ་ངོ་རྒོལ་བྱེད་དགོས་པ་ཡིན་ནའང༌། ངས་ནི་རྒྱ་མི་རིགས་ལ་ཞེ་སྡང་ནམ་ཡང་བྱེད་མི་ཐུབ། ངའི་ཡིད་ཆེས་ལ་བོད་ཀྱི་རང་དབང་ནི་བོད་མི་རྣམས་སྟོབས་ཤུགས་ཆེན་པོར་གྱུར་པའི་མཚམས་ཡོང་ངེས་ཤིང༌། ཞེ་སྡང་ནི་ནུས་ཤུགས་མིན་ལ། ནུས་ཤུགས་ཀྱི་ལྡོག་ཕྱོགས་སུ་གནས་པའི་སྐྱོན་ཆ་ཞིག་རེད། སངས་རྒྱས་བཅོམ་ལྡན་འདས་ཀྱིས་ཞེ་སྡང་གིས་ཞེ་སྡང་འགོག་མི་ཐུབ་པར་གསུངས་པ་དེ་ཡང་སྤྱིར་བཏང་ཆོས་བཤད་ཙམ་དུ་གསུངས་པ་མ་ཡིན་པར་དངོས་ཡོད་ཀྱི་གནས་ཚུལ་དང་བསྟུན་ནས་གསུངས་པ་ཡིན། ཞེ་སྡང་གི་ལམ་ནས་གྲུབ་འབྲས་ཇི་འདྲ་ཞིག་བྱུང་ཡང་དེ་ནི་སོར་གནས་མི་ཐུབ་ལ་ཡུན་རིང་འཚོ་གནས་མི་ཐུབ། དེར་མ་ཟད། དེ་ནི་སྔ་ཕྱི་ཙམ་མ་གཏོགས་སླར་ཡང་དཀའ་རྙོག་འབོད་པའི་གཡབ་མོ་ཡིན།

ད་ལྟའི་ཆར་ངའི་མི་མང་གི་གནས་སྟངས་ཧ་ཅང་ཛ་དྲག་འདི་འདྲའི་སྐབས་སུ་ཞེ་སྡང་བྱས་ན་ཡིད་ལ་སྡུག་བསྔལ་སྣོན་མ་ཞིག་མ་གཏོགས་གང་ཡང་ཡོང་མི་ཐུབ། ལར་ནས་ང་ཚོས་རང་ཉིད་ཅི་བྱེད་ནམ་ཡང་མི་ཤེས་པའི་མི་རིགས་ཤིག་ལ་ཞེ་སྡང་ཅི་ཕྱིར་བྱེད། འགོ་འཁྲིད་པས་དབང་མེད་དུ་གཅུན་འཁྲིད་བྱས་པའི་རྒྱ་མི་ས་ཡ་མང་པོ་ལ་ཞེ་སྡང་ཅི་ཕྱིར་བྱེད། ང་ཚོས་དེ་འདྲའི་འགོ་འཁྲིད་པ་རྣམས་ལའང་ཞེ་སྡང་ཅི་ཕྱིར་བྱེད། གང་ལགས་ཟེར་ན། ཁོང་ཚོས་ཀྱང་རང་གི་བདེན་དོན་དང་རྒྱལ་ཁབ་ཀྱི་ཆེད་དུ་དཀའ་སྡུག་མང་པོ་མྱངས་ཡོད། ངེད་རང་ལ་ཞེ་སྡང་གི་དོན་འགྲུབ་པར་ཡིད་ཆེས་མེད་ཀྱང༌། དུས་རྟག་ཏུ་ཡིད་ཆེས་གཅིག་ཡོད་པ་ནི་ཉིན་གཅིག་དྲང་བདེན་ལ་རྒྱལ་ཁ་ཐོབ་རྒྱུ་དེ་ཡིན་”ཞེས་ཞིབ་རྒྱས་སུ་གསུངས་ཡོད་ཅིང་། སྐབས་དེ་ནི་བོད་ཚུད་པའི་རྒྱ་ནག་ཁྱོན་ཡོངས་སུ་རིག་གནས་གསར་བརྗེ་ཆེན་པོ་ཚ་ཚ་འུར་འུར་ངང་སྤེལ་བཞིན་པའི་དུས་ཡིན།

འགྲོ་བའི་༸མགོན་པོ་མཆོག་ཕྱི་རྒྱལ་ཡུལ་གྲུ་ཁག་ཏུ་ཆིབས་བསྒྱུར་ཐོག་མ་ཕྱི་ལོ་ ༡༩༦༧ ལོ་ནས་ལྷོ་ཤར་ཨེ་ཤ་ཡ་དང་། ཕྱི་ལོ་ ༡༩༧༣ ལོ་ནས་ཡུ་རོབ་དང་། ཕྱི་ལོ་ ༡༩༧༩ ལོ་ནས་བྱང་ཨ་རིར་འགོ་འཛུགས་གནང་སྟེ། ཕྱི་ལོ་ ༡༩༨༠ ལོ་ནས་བཟུང་འཛམ་གླིང་འདིའི་རང་དབང་ཡུལ་གྲུ་ཁག་ཏུ་ཡང་ཡང་ཞབས་ཀྱིས་བཅགས་ཤིང་། སྐབས་དེར་མཛད་རིམ་གཙོ་ཆེ་ཤོས་ཆབ་སྲིད་དང་མ་འབྲེལ་བའི་ཆོས་དང་རིག་གཞུང་གི་ཐོག་ལ་ཡིན་ནའང་། བོད་ནང་གི་དཀའ་སྡུག་རྣམས་གྲོས་མོལ་བརྒྱུད་བདེན་པ་བདར་ཏེ་སེལ་ཐུབ་པ་དང་། བོད་བརྒྱུད་ནང་བསྟན་དང་། དེས་བསྐྱེད་པའི་བོད་ཀྱི་རིག་གཞུང་གིས་འགྲོ་བ་མིའི་རིགས་ལ་ཕན་བདེའི་མཐུན་རྐྱེན་སྒྲུབ་ཐུབ་པའི་བཟང་ཕྱོགས་ཀྱི་རེ་བ་ལྷོད་མེད་རྒྱུན་འཁྱོངས་གནང་བ་དང་། ཆོས་དད་ཡོད་མེད་དང་། ཆོས་ལུགས་གང་ཡིན་དབྱེ་བ་མེད་པར། གཞན་ཕན་དང༌། བྱམས་པ། སྙིང་རྗེ། འཚེ་བ་མེད་པ་བཅས་ཆོས་ལུགས་ཐུན་མོང་གི་བསླབ་བྱ་འདི་དག་གིས་མི་ཚེ་བདེ་སྐྱིད་དང་། སྤྱི་ཚོགས་མཛའ་མཐུན། རྒྱལ་ཁབ་ཞི་བདེ་ཡོང་རྒྱུར་དགེ་ཕན་འབྱུང་བའི་གནས་ལུགས་ངོ་སྤྲོད་དང་། སྐུ་ཚེའི་ཐུགས་བསྐྱེད་དམ་བཅར་བཟུང་སྟེ་ཕྱག་བསྟར་གནང་སྟངས་དེས། རང་དབང་ལུང་པའི་ཤེས་ལྡན་སྐྱེ་བོ་མང་པོའི་ཡིད་ཀྱི་བརྟན་པ་ཅིག་ཅར་དུ་འཕྲོག་ཅིང་། གྲོགས་འཁོར་བུང་བའི་སྤྲིན་ཚོགས་བཞིན་འདུ་རུབ་བྱེད་འགོ་ཚུགས་ཡོད།

སྐབས་དེར་བཙན་བྱོལ་དུ་བོད་མིའི་ཆོས་རིག་དང་ཤེས་ཡོན། འཚོ་གནས་བཅས་ཀྱི་བདེ་དོན་ལས་གཞི་རྨང་འཛུགས་ཡར་རྒྱས་དང་དུས་མཚུངས་སུ། བཙན་བྱོལ་བོད་གཞུང་མང་གཙོའི་ལམ་ལུགས་སུ་སྣེ་ཁྲིད་མཛད་བཞིན། བོད་ཀྱི་རང་དབང་སླར་གསོའི་ཆེད་དུ་འབྲེལ་ཡོད་རྒྱལ་ཁབ་ཁག་དང་། མཉམ་འབྲེལ་རྒྱལ་ཚོགས་བཅས་པར་བོད་དོན་དཀའ་སེལ་གྱི་ཞུ་སྐུལ་རིམ་བསྟུད་དུ་གནང་ཞིང་། ཕྱི་ལོ་ ༡༩༧༣ ནས་བཟུང་རྒྱ་ནག་གཞུང་ལ་འཚེ་བ་མེད་པ་དང་གཉིས་སྨན་གྱི་རྨང་གཞིའི་སྟེང་གྲོས་བསྡུར་བརྒྱུད་ནས་བོད་དོན་འགྲིག་འཇགས་ཡོང་བའི་བཞེངས་ཕྱོགས་བརྟན་བཟུང་གནང་བས། ཕྱི་ལོ་ ༡༩༧༩ ལོར་བོད་རྒྱའི་འབྲེལ་ལམ་མཐུད་དེ། བོད་ཕྱི་ནང་དབར་གཉེན་འཕྲད་དང་། བོད་ནང་གཟིགས་སྐོར་དང་སྐུ་ཚབ་ཚོགས་པ་སྔ་རྗེས་མངགས་གཏོང་གནང་ཐུབ་པ་བྱུང་བས། དོན་ཕན་ལྡན་པའི་བོད་རྒྱའི་རྩོད་རྙོག་ཞི་འདུམ་གྱི་འབྲས་བུ་མ་སྨིན་ཡང་། བོད་ནང་བོད་ཀྱི་ཆོས་དང་རིག་གཞུང་། བོད་ཀྱི་སྐད་ཡིག་སློབ་གསོ་བསྐྱར་གསོ་དང་། འཚོ་གནས་ཡར་རྒྱས་ཀྱིས་མཚོན་པའི་གུ་ཡངས་ཀྱི་སྲིད་ཇུས་འཛིན་རྒྱུར་རྒྱ་གཞུང་ལ་ཤུགས་རྐྱེན་མངོན་གསལ་དུ་ཐེབས་ཐུབ་ཡོད།

དེ་ཡང་། ཕྱི་ལོ་ ༡༩༨༡ ཟླ་ ༣ ཚེས་ ༢༣ ཉིན་རྒྱ་ནག་གི་འགོ་འཁྲིད་ཏེང་ཞའོ་ཕིང་ལ་བསྩལ་བའི་བཀའ་ཡིག་ཏུ། “ད་ཆ་དངོས་ཡོད་གནས་ཚུལ་དང་མཐུན་ཞིང་། རྒྱུ་མཚན་ལྡན་པའི་ཐབས་ལམ་ལ་བརྟེན་ནས་དཀའ་ངལ་སེལ་ཐབས་བྱེད་དགོས་པས། བོད་རྒྱ་དབར་དང་། བོད་ཕྱི་ནང་དབར་མཛའ་འབྲེལ་ཇེ་ཆེར་བཏང་ཐོག འདྲ་མཉམ་དྲང་བདེན་གཞི་རྩར་བཟུང་། ཕན་ཚུན་གོ་རྟོགས་གསལ་པོ་ཡོང་བ་བྱས་ཏེ། མ་འོངས་པར་བོད་རྒྱ་མཛའ་མཐུན་དམ་ཟབ་ཡོང་བ་དང་། བོད་མི་མང་ལ་བདེ་སྐྱིད་ཁ་ཡོད་ལག་ཡོད་ཅིག་ཡོང་བའི་དོན་དུ་ཕན་ཚུན་གཉིས་ཕྱོགས་ནས་བཟོད་སྲན་ཁོག་ཡངས་དང་འབྲེལ་བློ་གྲོས་གཏིང་ཟབ་ཀྱི་སྒོ་ནས་འབད་བརྩོན་ཛ་དྲག་གིས་བྱེད་དགོས་པའི་དུས་ལ་བབས་པ་ལྟ་བུ་མཐོང་གི་འདུག་”ཅེས་གཞེན་སྐུལ་མཛད་ཅིང་། 

༡༩༨༥ ལོ་བར་ལྟ་སྐོར་ཚོགས་པ་ཁག་ ༤ དང་། སྐུ་ཚབ་ཚོགས་ཆུང་ཐེངས་ ༢ ཆེད་གཏོང་གནང་བའི་ཉམས་མྱོང་གཞིར་བཞག་ཐོག །ཕྱི་ལོ་ ༡༩༨༧ ཟླ་ ༩ ཚེས་ ༢༡ ཉིན་ཨ་རི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སུ། བོད་ས་ཡོངས་རྫོགས་ཞི་བའི་བསྟི་གནས་ཤིག་ཏུ་བསྒྱུར་རྒྱུའི་ཐུགས་འདུན་མཚོན་པའི་ཞི་བདེའི་སྔོན་འགྲོའི་གྲོས་འཆར་དོན་ཚན་ལྔ་འདོན་གནང་མཛད་དེ། “ངས་བཅོས་མིན་ཡིད་ཆེས་བྱ་རྒྱུར། ཕན་ཚུན་འབྲེལ་ཡོད་ཕྱོགས་གཉིས་ཀ་ངོ་འཛོམས་ཀྱི་ཐོག་ནས་འབྱུང་འགྱུར་གྱི་གནད་དོན་ཁག་གི་སྐོར་ལ་བློ་ཁ་ཡངས་ཤིང་། དོན་དམ་གྱི་དྲང་བདེན་དང་། འདོད་བློ་ཁེངས་པའི་ཐབས་ལམ་ཞིག་འཚོལ་རྒྱུར་འདུན་པ་ཡོད་ཚེ་ཐབས་ལམ་ཞིག་ངེས་པར་དུ་རྙེད་ཐུབ་པ་ཡིན། ང་ཚོས་རྒྱུ་མཚན་ལྡན་ལ། མཁས་མཛངས་བློ་གྲོས་དང་། ཁ་ཞེ་གཉིས་མེད། གོ་རྟོགས་དང་ལྡན་པ་བཅས་ཀྱི་ཐོག་ནས་ངོ་འཛོམས་བྱ་རྒྱུའི་ཐབས་ལ་འབད་དགོས་པ་ཡིན་”ཞེས་འབོད་སྐུལ་གནང་ཡོད་པ་དང་།

ཕྱི་ལོ་ ༡༩༨༨ ཟླ་ ༦ ཚེས་ ༡༥ ཉིན་སི་ཊྲ་སི་སྦོག་ཡུ་རོབ་གྲོས་ཚོགས་སུ་བསྩལ་བའི་གྲོས་འཆར་དུ། “རྒྱ་ནག་གཞུང་དང་འགོ་ཁྲིད་ཚན་ཁག་གིས་ང་ཚོས་བཏོན་པའི་གཙོ་གནད་རེ་རེར་ནན་ཏན་གྱིས་བསམ་ཞིབ་གཏིང་ཟབ་བྱ་དགོས་པའི་རེ་སྐུལ་ནན་པོ་བྱ་རྒྱུ་ཡིན། ལག་ལེན་དུ་འགེལ་ཐུབ་ངེས་ཀྱི་རྩོད་རྙོག་སེལ་བའི་ཐབས་ལམ་འབའ་ཞིག་ནི་གྲོས་མོལ་བྱ་རྒྱུ་དང་། ལྷག་བསམ་རྣམ་པར་དག་ཅིང་ཁོག་ཡངས་དཀྱེལ་ཆེའི་ཐོག་ནས་བོད་ཀྱི་དངོས་ཡོད་གནས་ཚུལ་མཐོང་བ་བྱ་རྒྱུ་དེ་ཡིན། ང་ཚོས་མི་ཡི་རིགས་ཀྱི་ཁེ་ཕན་ཆེ་ས་ཞིག་ལ་བསམ་གཞིགས་ཀྱིས་རྒྱ་ནག་གཞུང་དང་གྲོས་བསྡུར་བྱ་རྒྱུའི་འདོད་པ་ཡོད། ང་ཚོའི་གྲོས་འཆར་གྱི་ནང་འགྲིགས་འཇགས་ཡོང་ཐབས་ཀྱི་སེམས་འཁུར་བྱས་པ་ལྟར་དུ་རྒྱ་ཕྱོགས་ནས་ཀྱང་དེ་དང་མཚུངས་པའི་སེམས་འཁུར་བྱ་རྒྱུར་ང་ཚོས་རེ་བ་བྱེད་བཞིན་ཡོད་”ཅེས་བསྐྱར་ནན་དུ་འབོད་སྐུལ་མཛད་ཡོད།

གྲོས་འཆར་འདི་གཉིས་འདོན་གནང་མཛད་སྐབས་ཀྱི་དགོངས་པ་གཏད་ས་ནི། བོད་རང་བཙན་གྱི་ལོ་རྒྱུས་གནས་བབ་བསྐྱར་གསོའི་དགོས་འདུན་མིན་པར། བོད་འདི་ཞི་བའི་བསྟི་གནས་ཤིག་ཏུ་བསྒྱུར་རྒྱུའི་ཐུགས་བཞེད་དེ་ནི་གཙོ་ཆེར་འགྲོ་བ་མིའི་རིགས་སྤྱིའི་ཁེ་ཕན་ལ་དམིགས་ཡོད་པ་དང་། མཛད་ཕྱོགས་དེས་“རྒྱལ་སྤྱིའི་རྩོད་རྙོག་དང་། འགྲོ་བ་མིའི་ཐོབ་ཐང་གི་གནད་དོན། གོ་ལའི་ཁོར་ཡུག་གི་དཀའ་ངལ་རྣམས་སེལ་ཆེད་དུ་བཟང་ཕྱོགས་དང་མདུན་བསྐྱོད་ཀྱི་ཐབས་ལམ་ཞིག་འདོན་གནང་མཛད་ཡོད་”ཅེས་ནོ་སྦེལ་ཚོགས་ཆུང་གིས་ངོས་འཛིན་གནང་བ་ནི་དོན་དང་ལྡན་པ་ཞིག་ཡིན།

གྲོས་འཆར་འདི་གཉིས་ནི་རྒྱ་ནག་ཏུ་སྲིད་ཇུས་ཕྲན་བུ་གུ་ཡངས་ཡོད་པ་དང་། ཕྱི་རྒྱལ་ཡུལ་སྐོར་བ་བོད་དང་རྒྱ་ནག་ནང་འགྲུལ་སྐྱོད་ཀྱི་སྒོ་གང་ཙམ་ཕྱེ་སྐབས་སུ་འཁེལ་ཞིང་། བར་དེར་བཙན་བྱོལ་ནས་བོད་ནང་བོད་རིགས་དགེ་རྒན་རོགས་རམ་དུ་གཏོང་རྒྱུ་དང་། ལྷ་སར་དོན་གཅོད་ལས་ཁུངས་འཛུགས་རྒྱུ། གཟིགས་སྐོར་དང་སྐུ་ཚབ་མུ་མཐུད་གཏོང་རྒྱུ་སོགས་བཙན་བྱོལ་བོད་གཞུང་གི་རེ་འདུན་ཁག་ལ་རྒྱ་གཞུང་གིས་ནེམ་ནུར་རིམ་པར་བྱས་ཐོག སྐབས་དེར་གྲོས་འཆར་ལ་བརྡ་ལན་གྱི་ཚུལ་དུ། རྒྱ་གཞུང་གིས་གྲོས་མོལ་བྱ་རྒྱུའི་རྣམ་འགྱུར་བསྟན་ཏེ། ཚོགས་ཡུལ་ས་གནས་དང༌། དུས་ཚོད་༸གོང་ས་མཆོག་གི་ཐུགས་འདུན་ལྟར་བྱ་རྒྱུ་ཡིན་ལུགས་བཤད་པ་ལྟར། འཇི་ནི་ཝར་ཕྱི་ལོ་ ༡༩༨༩ ལོའི་ཟླ་ ༡ ནང་གྲོས་མོལ་བྱ་རྒྱུའི་དགོངས་འཆར་གནང་བར། རྒྱ་ཕྱོགས་ནས་རྒྱུ་མཚན་སྣ་ཚོགས་བཤད་དེ་གྲོས་མོལ་ལམ་ལྷོང་བྱུང་ཐུབ་མེད།

གྲོས་འཆར་སྔ་རྗེས་དབར་ཕྱི་ལོ་ ༡༩༨༧ ཟླ་ ༩ ཚེས་ ༢༧ ཉིན་དང་། ཕྱི་ལོ་ ༡༩༨༧ ཟླ་ ༡༠ ཚེས་ ༡ ཉིན། ཕྱི་ལོ་ ༡༩༨༨ ཟླ་ ༣ ཚེས་ ༥ ཉིན་བཅས་སོ་སོར་ལྷ་སར་གཞི་རྒྱ་ཆེ་བའི་ཞི་བའི་ངོ་རྒོལ་གྱེན་ལངས་བྱུང་བར་རྒྱ་གཞུང་གིས་ཁྲག་དྲི་བྲོ་བའི་དྲག་གནོན་བྱས་པ་མ་ཟད། ཕྱི་ལོ་ ༡༩༨༩ ཟླ་ ༣ ཚེས་ ༧ ཉིན་རྒྱ་ནག་མི་དམངས་སྤྱི་མཐུན་རྒྱལ་ཁབ་བཙུགས་ཚུན་གྱི་དྲག་པོའི་ཁྲིམས་གཞི་དང་པོ་དེ་ལྷ་སར་བསྡམས་ཡོད།

ཕྱི་ལོ་ ༡༩༨༩ ལོར། ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གཞིས་ཀ་རྩེར་གློ་བུར་དུ་སྐུ་གཤེགས་པ་དང་། པེ་ཅིང་གི་གནམ་བདེ་སྒོ་མོ་ཆེར་ ༦་༤ སློབ་ཕྲུག་གི་མང་གཙོའི་ལས་འགུལ་ལ་དྲག་གནོན་བྱས་ཏེ། ལོ་རབས་ ༨༠ ནང་གི་ཡུད་ཙམ་གྱི་གུ་ཡངས་སྲིད་ཇུས་རྣམས་ཡལ་བར་དོར་ཟིན་ནའང་། ༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པ་དེས། གཞིས་བཞུགས་བོད་རིགས་སྤུན་ཟླར་སེམས་ཤུགས་དང་སྙིང་སྟོབས་འཕར་མ་ཞིག་སྤར་ཐུབ་ཡོད་པ་དང་། བཙན་བྱོལ་བོད་མིའི་སྤྱི་ཚོགས་སུའང་རྒྱལ་སྤྱིའི་ནང་གོམ་པ་སྤོ་སྟངས་ཀྱི་ཁ་ཕྱོགས་གསར་པ་ཞིག་རྙེད་ཐུབ་ཡོད་ལ། རྒྱ་རིགས་ཤེས་ཡོན་ཅན་དང་། རྒྱལ་སྤྱིའི་སྤྱི་ཚོགས་སུ་བོད་དོན་བདེན་པའི་གནས་ལུགས་གོ་རྟོགས་དང་། རྒྱབ་སྐྱོར་གྱི་ནུས་ཤུགས་མཚམས་མ་ཆད་པར་འཕེལ་རྒྱུར་རྨང་གཞི་བརྟན་པོ་ཞིག་བཙུགས་གནང་ཡོད་ཅིང་། བོད་རྒྱའི་དཀའ་རྙོག་གཉིས་སྨན་དབུ་མའི་ལམ་ནས་སེལ་རྒྱུའི་སྲིད་ཇུས་འགྱུར་མེད་དུ་གནས་རྒྱུར་གཞུང་ལུགས་ཀྱི་རྒྱབ་རྟེན་ཁུངས་བཙན་ཞིག་བཞེངས་བསྐྲུན་ཐུབ་ཡོད།

དེ་མཚུངས་སུ་ ༡༩༨༧ ཟླ་ ༡༠ ནང་། རྒྱ་གར་དྷ་རམ་ས་ལ་བཞུགས་སྒར་ཕོ་བྲང་དུ་གཟའ་འཁོར་གཅིག་རིང་༸གོང་ས་མཆོག་དང་ཚན་རིག་པའི་དབར་བགྲོ་གླེང་ཚུགས་ཏེ། ནང་བསྟན་དང་ཚན་རིག་གིས་སོ་སོར་རང་བྱུང་དང་དངོས་པོའི་གཤིས་ལ་བརྟག་དཔྱད་གནང་བའི་གཞུང་ལུགས་བཀོལ་སྤྱོད་བྱས་ཏེ་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ལ་ཕན་གདགས་པའི་དམིགས་ཡུལ་གཅིག་མཚུངས་ཡིན་པ་དགོངས་མཉམ་བྱུང་བའི་རྨང་གཞིའི་སྟེང་། ཕྱི་ལོ་ ༢༠༡༩ བར་དུ་༸གོང་ས་མཆོག་དང་འཛམ་གླིང་གི་སྙན་གྲགས་ཆེ་བའི་ཚན་རིག་པ་ལྷན་སེམས་དང་སྲོག་གི་བགྲོ་གླེང་ཚོགས་འདུ་ཐེངས་ ༣༣ ཚུགས་ཏེ། རིག་ཚན་ཐོད་བརྒལ་དང་། རིག་གཞུང་ཐོད་བརྒལ་གྱི་བགྲོ་གླེང་བརྒྱུད། འཛམ་གླིང་ཤར་ཕྱོགས་ཀྱི་ནང་པའི་ཚན་རིག་དང་། ནུབ་ཕྱོགས་ཀྱི་དེང་རབས་ཚན་རིག་དབར་འབྲེལ་ཟམ་བཙུགས་པས། ད་ལྟའི་ཆར་ས་ཆེན་འདི་དང་། སྐྱེ་འགྲོ་སྤྱི་ལ་ཕན་བདེའི་རྩ་ལག་གལ་ཆེན་ཞིག་ཏུ་གྱུར་པའི་ངང་ཚུལ་ཀུན་གྱི་མཐོང་ཆོས་སུ་ཡོད་པ་འདི་ལྟར་ལགས།

དེ་རིང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་དྲན་མཛད་སྒོ་འདིར། ང་ཚོས་༸གོང་ས་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་དུས་ཆེན་གྱི་དགའ་སྟོན་ལ་རོལ་ཆོག་ནའང་། ༸མགོན་པོ་མཆོག་ལ་དད་དམ་གཡོ་བ་མེད་པའི་གཞིས་བཞུགས་སྤུན་ཟླ་ཚོར་རྩ་བའི་བླ་མའི་༸སྐུ་པར་ཉར་གཤོམ་གྱི་རང་དབང་ཙམ་ཡང་མེད།

དུས་མཚུངས་སུ་དེ་རིང་ད་དུང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཡུལ་ལུང་གང་སར་དུས་དྲན་སྲུང་བརྩི་ཞུ་བཞིན་ཡོད་ནའང་། བོད་ནང་གི་བོད་མི་ཚོར་མཁར་དབང་དང་། འདོད་དབང་། ཆོས་དད། འགྲོ་འོང་། སྨྲ་བརྗོད། འདུ་འཛོམས། རང་མི་རིགས་ཀྱི་སྐད་ཡིག་སྦྱོང་སྤྱོད་སོགས་གཞི་རྩའི་འགྲོ་བ་མིའི་ཐོབ་ཐང་ལ་ལོངས་སུ་སྤྱོད་པའི་སྐལ་བ་ཙམ་ཡང་མེད་ཁར། རྒྱ་གཞུང་གིས་འཕྲལ་སེལ་དགོས་མཁོའི་ཆེད་དུ་བོད་ཀྱི་རང་བྱུང་ཁོར་ཡུག་ལ་གཏོར་བཤིག་དང་། བོད་མིའི་ངོ་བོ་རྩ་བརླག་གཏོང་བའི་གདུག་རྩུབ་སྲིད་ཇུས་ཀྱི་གནོན་བཙིར་ཉིན་མཚན་དུ་མྱོང་དགོས་ཀྱི་ཡོད།

བོད་རྒྱ་གཉིས་ཀར་གྱོང་ལས་ཁེ་མེད་པའི་རྒྱ་གཞུང་གི་ནོར་འཁྲུལ་སྲིད་ཇུས་དེ་རིགས་ཁུངས་འཁྱོལ་ཐབས་མེད་ངེས་ཡིན་པས། བོད་མིའི་སྒྲིག་འཛུགས་ཀྱི་ངོས་ནས་གཉིས་སྨན་དབུ་མའི་ལམ་གྱི་འཇུག་ངོགས་ནས་རྒྱ་ནག་གཞུང་ལ་འབྲེལ་གཏུག་བརྒྱུད་བོད་རྒྱའི་དཀའ་རྙོག་སེལ་བའི་འབད་བརྩོན་བྱ་རྒྱུའི་ཆོད་སེམས་གཞིར་བཞག་ཐོག །དེ་སྔ་རིམ་པར་ཞུས་ཟིན་པ་ལྟར། བོད་རྒྱའི་དཀའ་རྙོག་འདི་གཙང་སེལ་མ་བྱུང་བར་དུ། རྒྱལ་སྤྱིའི་ནང་བོད་དོན་ལས་འགུལ་རྒྱ་གང་ཆེ་སྤེལ་རྒྱུ་དང་། དེ་མཚུངས་སུ་རྒྱ་གཞུང་གི་ནོར་འཁྲུལ་སྲིད་ཇུས་དེ་རིགས་མཚམས་འཇོག་དང་ཡོ་བསྲང་དགོས་པའི་ཡིག་ཆ་ཞིག་ཀྱང་རྒྱ་ནག་གཞུང་ལ་རིང་མིན་སྤྲོད་འཆར་ཡོད།

ཉེ་ལམ་སྐབས་ ༡༦ པའི་བཀའ་ཤག་གིས་བོད་དོན་དང་བླངས་ཞུ་གཏུག་ལས་འགུལ་དབུ་འཛུགས་ཀྱི་གསལ་བསྒྲགས་སྤེལ་ཟིན་པ་ལྟར། འཛམ་གླིང་ཡུལ་གྲུ་གང་སར་གནས་བཞུགས་གཞོན་སྐྱེས་གཙོས་པའི་བོད་མི་མི་རེ་ངོ་རེ་ལས་འགུལ་འདིའི་ནང་མཉམ་ཞུགས་གནང་སྟེ། བོད་དོན་བདེན་མཐའ་གསལ་ཐབས་སུ་སོ་སོའི་སེམས་ཤུགས་དང་ནུས་རྩལ་འདོན་སྤེལ་ཡོང་བའི་འབོད་སྐུལ་ཞུ་ཡི་ཡོད་ལ། བོད་རྒྱའི་དཀའ་རྙོག་འདི་གཙང་སེལ་མ་བྱུང་བར་དུ། བོད་དོན་བདེན་མཐའ་གསལ་བའི་ཐབས་ཤེས་ཡོད་རྒུ་རྩལ་སྤྲུགས་བྱ་རྒྱུ་ནི་བཅའ་ཁྲིམས་ཀྱིས་བཙན་བྱོལ་བོད་མི་ཚོར་བསྐུར་བའི་ལས་འགན་གལ་ཆེ་ཤོས་དེ་ཡིན་སྟབས། རང་དབང་ལུང་པར་གནས་འཁོད་བོད་མི་གང་མང་ཞིག་ལས་འགུལ་འདིར་མཉམ་ཞུགས་གནང་ཐུབ་པའི་ཡིད་ཆེས་ཡོད་ཅིང་། འདི་ནི་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མི་རྣམས་གཞིས་བཞུགས་སྤུན་ཟླའི་མགྲིན་ཚབ་པ་བྱེད་དགོས་པའི་བཀའ་སློབ་རིམ་པར་བསྩལ་བའི་དགོངས་དོན་ཡང་ཡིན།

དུས་དྲན་མཛད་སྒོ་འདི་དང་བསྟུན། བོད་མིའི་སྒྲིག་འཛུགས་ལ་རྒྱབ་སྐྱོར་རོགས་རམ་གནང་མཁན་རྒྱ་གར་དང་ཨ་རིས་གཙོས་པའི་མཛའ་འབྲེལ་རྒྱལ་ཁབ་ཁག་དང་། བོད་དོན་རྒྱབ་སྐྱོར་བ། བོད་ཀྱི་གྲོགས་པོ་བཅས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་། ཐུགས་རྗེ་ཆེ་ཞུ་རྒྱུ་ཡིན།

མཐའ་དོན། འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པ་དང་། ཐུགས་ཀྱི་བཞེད་དགོངས་མཐའ་དག་གེགས་མེད་ལྷུན་གྱིས་འགྲུབ་ཅིང་། འཛམ་གླིང་ས་ཆེན་ཧྲིལ་པོར་ཞི་བདེའི་སྣང་བས་རྟག་ཏུ་ཁྱབ་པའི་སྨོན་འདུན་ཞུ་རྒྱུ་བཅས། བཀའ་ཤག་གིས་ཕྱི་ལོ་ ༢༠༢༡ ཟླ་ ༡༢ ཚེས་ ༡༠ ལ། །