༄༅། །བཀའ་བློན་ནོར་འཛིན་སྒྲོལ་མ་མཆོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བཀའ་བློན་དུ་བསྐོ་བཞག་བྱུང་བར་ཨོསྟྲེ་ལི་ཡཱའི་ཆབ་སྲིད་ཚོགས་པ་ཡོངས་ཀྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་(Australian All-Party Parliamentary Group for Tibet) ཟུང་འབྲེལ་ཚོགས་གཙོ་སྐུ་ཞབས་ཝ་རན་(Hon. Warren Enstch) མཆོག་གིས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ལ་འཚམས་འདྲིའི་གསུང་འཕྲིན་ཞིག་ཕུལ་བའི་ནང་འཁོད་དོན།

ཕྲན་སྒེར་གྱི་ངོས་ནས་སྐུ་ཉིད་ཉེ་ལམ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་བཀའ་བློན་དུ་བསྐོ་བཞག་བྱུང་བར་འཚམས་འདྲི་ཞུ་རྒྱུ་ཡིན། འདི་ནི་སྐུ་ཉིད་ཀྱི་རྨད་དུ་བྱུང་བའི་གྲུབ་འབྲས་ཤིག་ཡིན་པ་མ་ཟད། སྐུ་ཉིད་ཀྱི་ཧུར་བརྩོན་དང་། ཐུགས་འདོད། འགྱུར་བ་མེད་པའི་དམ་བཅའ་བཅས་ལ་ངོས་འཛིན་ཐོབ་པ་ཞིག་ཀྱང་ཡིན། ཕྲན་རང་ཉིད་ལ་ཨོསྟྲེ་ལི་ཡཱའི་ཆབ་སྲིད་ཚོགས་པ་ཡོངས་ཀྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཟུང་འབྲེལ་ཚོགས་གཙོའི་གོ་གནས་ཡོད་པའི་ཆ་ནས་ངས་གོ་སྐབས་འདི་བརྒྱུད་སྐུ་ཉིད་ཀྱི་མ་འོངས་བྱ་གཞག་གསར་པ་ཐམས་ཅད་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན།

ཨོསྟྲེ་ལི་ཡཱའི་ཆབ་སྲིད་ཚོགས་པ་ཡོངས་ཀྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ངོས་ནས་བོད་མི་རྣམས་ཀྱིས་འཚེ་མེད་ཞི་བའི་ལམ་ནས་བོད་ཀྱི་རང་དབང་སླར་གསོའི་སླད་འཐབ་རྩོད་གནང་བཞིན་པར་མཐའ་གཅིག་ཏུ་རྒྱབ་སྐྱོར་ཞུ་རྒྱུའི་ཆོད་སེམས་བརྟན་པོ་ཡོད། ཕྲན་རང་ཉིད་ནས་མ་འོངས་པར་གོ་སྐབས་བྱུང་དུས་སྐུ་ཉིད་དང་མཇལ་འཕྲད་ཞུ་རྒྱུའི་རེ་ལྟོས་བྱེད་བཞིན་ཡོད། ཅེས་འཁོད་འདུག་པ་བཅས། །