༄༅། །ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་(Patrick Leahy)  མཆོག་གིས་སྣེ་ཁྲིད་དེ་ཨ་རིའི་གྲོས་ཚོགས་གོང་མའི་སྔོན་རྩིས་བཀའ་འཁྲོལ་རྒྱུན་ལས་ཚོགས་ཆུང་ནས་ལས་བསྡོམས་འདོན་སྤེལ་ཞུས་པའི་ནང་བོད་དོན་དང་འབྲེལ་བའི་འགྲོ་གྲོན་བཀའ་འཁྲོལ་འཆར་འབུལ་ཞུས་ཡོད་པ་དང་། ཨ་རིའི་གྲོས་ཚོགས་གོང་མའི་རྒྱུན་ལས་ཚོགས་ཆུང་གི་བཀའ་འཁྲོལ་འཆར་འབུལ་དེ་ནི་ཨ་རིའི་ཕྱི་སྲིད་ལས་ཁུངས་ཀྱི་འགྲོ་གྲོན་གལ་ཆེ་ཞིག་ཆགས་ཀྱི་ཡོད་པ་རེད།

ཨ་རིའི་གྲོས་ཚོགས་གོང་མའི་རྒྱུན་ལས་ཚོགས་ཆུང་གི་ལས་བསྡོམས་ནང་ཨ་རིའི་ཕྱི་སྲིད་དྲུང་ཆེ་ངོས་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་སྲིད་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གམ་མགོན་པོ་གང་ཉིད་མཆོག་གི་སྐུ་ཚབ། ཡང་ན་མང་གཙོའི་ལམ་ནས་མི་མང་གིས་འོས་འདེམས་བྱས་པའི་བོད་མིའི་འགོ་ཁྲིད་དང་ལྷན་དུ་བོད་རྒྱའི་དཀའ་རྙོག་མ་སེལ་བར་དུ། གྲོས་ཚོགས་ཀྱིས་གཏན་འབེབས་གནང་བའི་རོགས་དངུལ་དེ་དག་བོད་རང་སྐྱོང་ལྗོངས་དང་། བོད་རིགས་རང་སྐྱོང་རྫོང། རང་སྐྱོང་ཁུལ་བཅས་ཚུད་པའི་བོད་དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་སུ་ངོས་འཛིན་བྱས་པའི་ཡིག་ཆ་བཟོ་སྒྲིག་དང་། ཡིག་ཆ་འགྲེམས་སྤེལ། ས་ཁྲའི་རིགས། དེ་བཞིན་རྒྱུ་དངོས་གཞན་བཅས་ཀྱི་ཆེད་དུ་འགྲོ་གྲོན་བེད་སྤྱོད་བྱེད་མི་ཆོག་པ་གསལ་པོ་བཀོད་ཡོད།  ཨ་རིའི་གྲོས་ཚོགས་གོང་མའི་ནང་འབྲེལ་ཡོད་ཚོགས་ཆུང་ནས་བོད་དོན་ཐོག་རྒྱབ་སྐྱོར་གྱི་རྣམ་པ་ཤུགས་ཆེ་བཏོན་པར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་མཆོག་དང་། གྲོས་ཚོགས་གོང་མའི་འཐུས་མི་སྐུ་ཞབས་རི་ཅར་ཌི་ཞེལ་བྷེ་(Richard Shelby) མཆོག གཞན་ཡང་ཚོགས་ཆུང་གི་ཚོགས་གཙོ་བགྲེས་གཞོན་སོགས་ལ་ཐུགས་རྗེ་ཞུས་ཡོད་པ་བཅས།།