༄༅། །ཉེ་ལམ་རྒྱ་གར་གྱི་ལྷོ་ཕྱོགས་ཨནྡྲ་པར་དེ་ཤི་ (Andhra Pradesh) མངའ་སྡེའི་ས་ཁུལ་ཁག་གཅིག་ལ་ཆར་ཞོད་ཆེན་པོ་བབས་པས་རྐྱེན་གྱིས་མི་རྒྱུ་ཕྱུགས་གསུམ་ལ་གོད་ཆག་བྱུང་སྟེ་མང་ཚོགས་ལ་དཀའ་ངལ་འཕྲད་བཞིན་པའི་གནས་ཚུལ་ཐོན་པར། བོད་མའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༡ ཟླ་ ༡༡ ཚེས་ ༢༡ ཉིན་རྒྱ་གར་ལྷོ་ཕྱོགས་ཨནྡྲ་པར་དེ་ཤི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཇཱ་གན་མོ་ཧན་རེ་ཌེ་(Y S Jagan Mohan Reddy) མཆོག་ལ་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན།
ངོས་ཀྱིས་སྐུ་ཉིད་ཀྱིས་གཙོས་ཆར་ཞོད་ཀྱི་རྐྱེན་ངན་གོད་ཆག་འོག་འདས་གྲོངས་སུ་གྱུར་བ་རྣམས་ཀྱི་ནང་མི་སྤུན་མཆེད་དང་། དགའ་ཉེ་བློ་དཀར། དེ་བཞིན་ཆར་ཞོད་ཀྱི་རྐྱེན་ངན་གོད་ཆག་ཐེབས་མཁན་ཡོངས་ལ་ཐུགས་གསོ་དང་ཐུགས་སྨོན་ཞུ་རྒྱུ་ཡིན། ཨནྡྲ་པར་དེ་ཤི་མངའ་སྡེ་གཞུང་དང་རྒྱལ་ཡོངས་རྐྱེན་ངན་རོགས་སྐྱོར་ཚན་པ་ཁག་གིས་རྐྱེན་ངན་གོད་ཆགས་ཐེབས་མཁན་རྣམས་ལ་ནུས་ཤུགས་ཡོད་དགུ་རྩལ་སྤྲུགས་ཀྱིས་རོགས་རམ་དང་ཉེན་སྐྱོབ་གང་ཐུབ་ཅི་ཐུབ་གནང་བཞིན་པར་ངོས་ཀྱིས་ཧ་ཅང་རྗེས་སུ་ཡི་རང་ཞུ་གི་ཡོད།  ཨནྡྲ་པར་དེ་ཤི་མངའ་སྡེའི་མི་མང་ལ་གདུང་སེམས་མཉམ་སྐྱེའི་ཆེད་དུ་ཏཱ་ལའི་བླ་མ་དགེ་རྩ་ཚོགས་པའི་ངོས་ནས་ཉེན་སྐྱོབ་ཀྱི་ལས་དོན་སླད་དུ་ཞལ་འདེབས་འབུལ་རྒྱུ་ཡིན། ཞེས་འཁོད་ཡོད།

གཞན་ཡང་ཐུགས་གསོའི་གསུང་འཕྲིན་ནང་མགོན་པོ་གང་ཉིད་མཆོག་དེ་སྔ་ཨནྡྲ་པར་དེ་ཤི་མངའ་སྡེའི་ནང་ཐེངས་འགའ་ཆིབས་སྒྱུར་བསྐྱངས་མྱོང་ཡོད་པའི་སྐོར་དང་། ཕྱི་ལོ་ ༢༠༠༦ ལོར་མགོན་པོ་གང་ཉིད་མཆོག་གིས་རྒྱ་གར་ལྷོ་ཕྱོགས་ཨ་མཱ་ར་ཝ་ཏི་ནས་དུས་འཁོར་དབང་ཆེན་སྩལ་སྐབས་གནས་མཇལ་བ་སྟོང་ཕྲག་མང་པོ་དུས་ཁོར་དབང་ཆེན་དང་ལྷོ་ཕྱོགས་དཔལ་གྱི་རི་སོགས་ལ་གནས་མཇལ་ཆེད་དུ་ཕེབས་ཡོད་པ་དང་། སྐབས་དེར་ཨནྡྲ་པར་དེ་ཤི་མངའ་སྡེ་གཞུང་གིས་གཏོང་ཕོད་ཆེན་པོའི་སྒོ་ནས་གནས་མཇལ་བ་སྟོང་ཕྲག་མང་པོར་མཐུན་འགྱུར་རོགས་རམ་གནང་ཡོད་པའི་སྐོར་འཁོད་ཡོད། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆར་ཞོད་ཀྱི་རྐྱེན་ངན་གོད་ཆག་ཐེབས་མཁན་ཡོངས་ལ་ཐུགས་སྨོན་མཛད་ཡོད་པ་བཅས།།

ཕྱི་དྲིལ་བོད་ཡིག་ཚན་པས་གསུང་འཕྲིན་ངོ་མ་ཨིན་ཡིག་ནས་ཕབ་བསྒྱུར་ཞུས། ཨིན་ཡིག་ལ་རྩ་འཛིན་ཡོང་བ་ཞུ།