༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་ཕྱི་ལོ་ ༢༠༢༡ ཟླ་ ༡༡ ཚེས་ ༡༢ ཉིན་ལྷོ་ཨ་ཕི་རི་ཀའི་སྲིད་འཛིན་ཟུར་པ་སྐུ་ཞབས་ཌེ་ཀི་ལག་(FW de Klerk) མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་གསན་པར་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ཨེ་ལི་ཊ་ཌེ་ཀི་ལག་(Mrs. Elita de Klerk) ལགས་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན།

དམ་པ་དེ་ཉིད་ཀྱིས་ལྷོ་ཨ་ཕི་རི་ཁ་དང་ལུང་པ་གཞན་གྱི་ནང་ཞི་བདེ་དང་འཆམ་མཐུན་ཡོང་སླད་མི་རེ་ངོ་རེའི་ཐོབ་ཐང་ཆེད་དུ་དྲང་པོ་དྲང་གཞག་གིས་ཕྱག་ལས་ཧུར་ཐག་གནང་ཡོད་པ་མ་ཟད། ལྷོ་ཨ་ཕི་རི་ཀའི་རྡུལ་ཕྲན་མཚོན་ཆ་ཁག་གི་ལས་གཞི་མཚམས་འཇོག་ཆེད་དུ་འགན་འཁུར་གཙོ་བོ་གནང་ཡོད་པས་ངོས་ཀྱིས་རྗེས་སུ་ཡི་རང་ཞུ་རྒྱུ་ཡིན།

འདས་པའི་ལོ་མང་རིང་ངེད་གཉིས་རྒྱལ་སྤྱིའི་གླེང་སྟེགས་འདྲ་མིན་ཐོག་ནས་ཐུག་འཕྲད་ཀྱི་གོ་སྐབས་བྱུང་ལ། ངེད་གཉིས་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ཡིན་པའི་ཆ་ནས་ངེད་གཉིས་ཀྱིས་ཐུན་མོང་ཐོག་འཛམ་གླིང་ཧྲིལ་པོ་སྔར་ལས་ལྷག་བདེ་འཇགས་དང་ཞི་བདེ་ལྡན་པ་ཞིག་བསྐྲུན་རྒྱུའི་ཀུང་སློང་བཟུང་ནས་རྒྱལ་ཁབ་དང་མི་དམངས་དབར་བསམ་ཤེས་ཀྱི་གོ་རྟོགས་གོང་མཐོར་སྤེལ་རྒྱུའི་འབད་བརྩོན་ཞུས་ཡོད།

ད་ལྟ་དམ་པ་ཁོང་ང་ཚོ་དང་ལྷན་དུ་སྐུ་འཚོ་བཞུགས་སུ་མེད་ཀྱང་། སྐུ་ཉིད་ཀྱི་སྐུ་ཟླ་མཆོག་གིས་སྐུ་འཚོ་བཞུགས་རིང་མི་ཚེ་དོན་དང་ལྡན་པ་ཞིག་བསྐྱལ་ཡོད་སྟབས་ང་ཚོས་དངོས་གནས་དྲང་གནས་དགའ་བ་སྒོམ་དགོས། ཞེས་ཐུགས་གསོ་བསྩལ།།