༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་རྒྱ་བརྒྱུད་ཕྱི་ལོ་ ༢༠༢༡ ཟླ་ ༡༡ ཚེས་ ༤ ནས་ ༥ བར་ཉིན་གྲངས་གཉིས་རིང་ཨུ་རུ་སུའི་དད་ལྡན་པ་རྣམས་ལ་རྗེ་བཙུན་བྱམས་པ་མགོན་པོས་མཛད་པའི་མདོ་སྡེ་རྒྱན་གྱི་བཀའ་ཁྲིད་མཛད་དེ་ཕྱི་ཚེས་ ༥ ཉིན་མདོ་སྡེ་རྒྱན་གྱི་བཀའ་ཁྲིད་རེ་ཞིག་ལེགས་པར་མཇུག་སྒྲིལ་མཛད་ཡོད།
དེ་ཡང་ཕྱི་ཚེས་ ༥ སྟེ་ཆོས་འབྲེལ་ཉིན་མཐའ་མའི་སྔ་དྲོ་ཆུ་ཚོད་ ༨།༤༠ ཙམ་ལ་མགོན་པོ་གང་ཉིད་མཆོག་བཞུགས་སྒར་༸རྒྱལ་བའི་གཟིམ་ཆུང་ཕོ་བྲང་ནས་གསུང་ཆོས་གནང་ཡུལ་དུ་ཆིབས་སྒྱུར་གྱིས་བཀའ་སློབ་སྩལ་དོན། ཐུགས་རྗེ་ཆེ་ཞུ་རྒྱུ་ཡིན། ཨུ་རུ་སུའི་ཁྱབ་ཁོངས་ཀྱི་ས་ཁུལ་ཁག་གི་ཆོས་གྲོགས་ཚོར་དེ་རིང་ཆོས་འབྲེལ་བྱེད་རྒྱུ་ཉིན་གཉིས་པ་རེད། ཁ་སང་ང་ཚོས་མདོ་སྡེ་རྒྱན་གྱི་བཤད་ལུང་ཞེས་པ་དེ་རེད། ངོས་རང་ལ་བཤད་ལུང་ཐོབ་ཡོད། འོན་ཀྱང་བཤད་ལུང་དེ་ཉིད་རིང་པོ་ཡོད་པར་བརྟེན་མི་དགོས་པ་བྱེད་རྒྱུ་ཡིན།
ཁ་སང་ངོས་ཀྱིས་བཤད་པ་ལྟར་ནང་ཆོས་ངོ་སྤྲོད་དང་། དེ་རྗེས་ཁ་སང་ནང་བཞིན་ཐམས་ཅད་རྣལ་འབྱོར་གྱི་སེམས་བསྐྱེད། དྲི་བ་དྲིས་ལན་ག་ཚོད་ཡོང་ཡོང་བྱེད་རྒྱུ་ཡིན། སངས་རྒྱས་བཅོམ་ལྡན་འདས་ཀྱིས་ཐོག་མར་ཆོས་འཁོར་བསྐོར་བའི་སྐབས་བདེན་པ་བཞི་སྐོར་གསུངས་ཡོད། བདེན་བཞིའི་ངོ་བོ་ལ་བཟླས་པ་དང༌། བདེན་བཞིའི་བྱ་བ་ལ་བཟླས་པ། བདེན་བཞིའི་བྱ་བ་འབྲས་བུ་དང་བཅས་པ་ལ་བཟླས་པ་ཞེས་གསུང་གི་ཡོད། དེ་འདུས་ཆེན་པོ་ཞེ་དྲག་རེད། སྡུག་བསྔལ་བདེན་པ་དང་ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་ཞེས་བདེན་བཞི་སྡོམ་ཞིག་བསྐྱོན་ནས་མར་གསུངས་ཡོད།
བདེན་པ་བཞི་སྡུག་བསྔལ་ཤེས་པར་བྱ་ཞེས་སྡུག་བསྔལ་ལ་བསམ་བློ་བཏང་ནས་སྡུག་བསྔལ་ཕྲ་རགས་མང་པོ་ཡོད་པ་རེད། ནམ་རྒྱུན་ང་ཚོས་སྡུག་བསྔལ་ལ་བརྩིས་སྡོད་པ་དེ་ཙམ་མ་ཡིན་པར་གཙོ་བོ་འདུ་བྱེད་ཀྱི་སྡུག་བསྔལ་གྱི་ཐོག་ནས་བསམ་བློ་གཏོང་དགོས། སྡུག་བསྔལ་དེ་ཉིད་རྒྱུ་མེད་རྐྱེན་མེད་ལས་བྱུང་བ་མ་ཡིན་པར་སྡུག་བསྔལ་གྱི་རྒྱུ་གང་ཡིན་པ་རྩད་གཅོད་བྱེད་དགོས། སྡུག་བསྔལ་གྱི་རྒྱུ་འདི་འབྲས་བུ་སྡུག་བསྔལ་མི་འདོད་པ་ཡིན་པར་བརྟེན་དེ་སྒྲུབ་བྱེད་ཀྱི་རྒྱུ་ཀུན་འབྱུང་སྤང་བར་བྱ། ཀུན་འབྱུང་སྤོང་ཐུབ་རྒྱུ་ཡོད་རེད་ཅེས་ན་ཡོད་པ་རེད།
དཔེར་ན་ང་རང་ཚོའི་མི་ཚེ་གཅིག་ལ་ཆ་བཞག་ན། ཚེ་སྟོད་ལ་ཆགས་སྡང་གི་ཉོན་མོངས་ཤུགས་ཆེན་པོ་ཡོང་བསྡད་པ་འདིར་བསམ་བློ་གཏོང་དུས་ཤུགས་ཆུང་དུ་འགྲོ་གི་ཡོད་པ་ང་ཚོའི་ཉམས་མྱོང་གི་ཐོག་ནས་ཤེས་ཀྱི་ཡོད། དེར་བརྟེན་སྡུག་བསྔལ་གྱི་རྒྱུ་ཀུན་འབྱུང་ལས་ཉོན་གཉིས་ཞེས་སྔོན་ལ་ལས་ཀྱི་ཀུན་འབྱུང་མི་དགེ་བཅུ་སྤོང་གི་ཚུལ་ཁྲིམས་རྨང་གཞི་དང་། དེ་ནས་ཏོག་ཙམ་གཏིང་ཟབ་ཏུ་བཏང་ནས་ཆགས་སྡང་ཡོང་གི་ཡོད་པ་དེ་དག་ཉོན་མོངས་དུག་གསུམ་གྱིས་རྩད་གཅོད་བྱེད་དགོས།
ཉོན་མོངས་དུག་གསུམ་ཞེས་པ་ནི། ང་རང་ཚོའི་སེམས་གསལ་རིག་གི་ཤེས་པ་དེར་རང་ཆས་སུ་ཡོད་པ་རེད་ཅེས་ན་མ་རེད། དཔེར་ན། ང་ཚོའི་དུག་གསུམ་གྱི་འགལ་ཟླའི་བློ་ཐོག་བསམ་བློ་བཏང་སྟེ་བློ་ལ་ཉམས་མྱོང་སྐྱེ་རྒྱུ་ཡོད། བློ་ཁག་གཉིས་པོ་འདི་གཅིག་གཅིག་ལ་འགལ་བ་ཡོད་སྟབས་གང་ལྟར་སྡུག་བསྔལ་གྱི་རྒྱུ་ཀུན་འབྱུང་ལ་ལྡོག་ཕྱོགས་ཀྱི་བློ་ཡོད་པ་དེར་བསམ་བློ་བཏང་ཚེ་ཉོན་མོངས་ལ་རྒྱུ་མཚན་མེད། གང་ལྟར་གློ་བུར་དུ་ཆགས་སྡང་གི་བློ་སྐྱེས་པ་མ་གཏོགས་ཉོན་མོངས་ཀྱི་ཆགས་སྡང་སྐྱེས་པར་རྒྱུ་མཚན་ཁྱོན་ནས་མེད།
ཉོན་མོངས་ཞེས་བསམ་བློ་བཏང་ན་ཁུངས་ཁྱོན་ནས་མེད་པ་གཅིག་དང་། གློ་བུར་དུ་ཚེ་རབས་ནས་ཚེ་རབས་གོམས་པའི་དབང་གིས་ཉོན་མོངས་སླེབས་པ་མ་གཏོགས། གཉེན་པོ་ཞིག་ཡོད་པ་དང་གཉེན་པོ་བསྟན་པ་ཡིན་ན་ཤུགས་ཆུང་དུ་འགྲོ་རྒྱུ་ཡིན་པ་ང་ཚོས་གང་འཚམ་བཤད་ཐུབ། དེར་བརྟེན་ལས་ཉོན་གྱི་ཀུན་འབྱུང་གཉིས་ལས་གཙོ་བོ་ཉོན་མོངས་པའི་ཀུན་འབྱུང་ལ་གཉེན་པོ་སྟོབས་ལྡན་ཡོད། གཉེན་པོའི་ཕྱོགས་སུ་གོམས་ན་ག་ལེར་ཤུགས་ཆུང་དུ་འགྲོ་གི་ཡོད། འགོག་པ་མངོན་དུ་བྱ་ཞེས་བསམ་བློ་གཏིང་རིང་པོ་གཏོང་དགོས་ཀྱི་ཡོད ཉོན་མོངས་ནི་རྣམ་པར་ཤེས་པའི་རང་བཞིན་ལ་མེད་པ་ཞིག་དང་། དྲི་མ་གློ་བུར་བ་ཉིད་དང་། །གསུངས་པ་བཞིན། དེ་འཕྲལ་གྱི་སྐད་ཆ་གཅིག་པུ་མ་ཡིན་པར་ང་ཚོ་ཚེ་རབས་མང་པོར་ཉོན་མོངས་ཀྱི་བློར་ཤུགས་ཆེན་པོ་གོམས་འདྲིས་ཡོད་པ་ཞིག་དང་། རྩ་བའི་སེམས་གསལ་རིག་ཡོད་ཕྱིན་ཆད་ཉོན་མོངས་ཡོང་དགོས་པ་མེད་པ་རེད། དེ་ང་ཚོས་སེམས་གསལ་རིག་གི་ཉམས་མྱོང་སྟེང་ནས་རེད། གང་ལྟར་སྔགས་ཀྱི་གཞུང་དུ་རང་བཞིན་བརྒྱད་ཅུའི་ཀུན་རྟོག་ཅེས་གསུང་གི་ཡོད། དཔེར་ན། འཆི་བ་འོད་གསལ་ཟེར་དུས་རགས་པ་གློ་བུར་བའི་སེམས་དག་འགགས་ནས་སྣང་མཆེད་ཐོབ་གསུམ་གྱི་རྗེས་ལ་ཤར་བ་ཞིག་ཆགས་ཡོད། དེར་བརྟེན། གཉིད་ཁུགས་པའི་སྐབས་སུའང་གོམས་འདྲིས་ཡོད་པ་བྱས་ནས་བསམ་བློ་གཏོང་ཐུབ་པ་ཡིན་ན། གཉིད་ཀྱི་འོད་གསལ་ཐིམ་རིམ་གང་ལ་གང་འཚམ་ཡོང་བ་ཞིག་རེད། གང་ལྟར་སེམས་ཀྱི་རང་བཞིན་ལ་ཞུགས་མེད་པ་ཞིག་དང་། སེམས་ཕྲ་རགས་མང་པོ་ཡོད་པ་ཞིག་དཔེ་ཆའི་ནང་དུ་བཤད་ཡོད་པ་རེད་ལ། སོ་སོས་ཚོད་ལྟ་བྱས་པ་ཡིན་ནའང་གང་ལ་གང་འཚམ་བཤད་ཐུབ་པ་འདུག
ཉོན་མོངས་ཅི་ཙམ་གྱིས་རགས་པ་ཞིག་ཡོད་ནའང་སེམས་ཀྱི་རང་བཞིན་ལ་ཞུགས་མེད། ཉོན་མོངས་ཕྱིན་ཅི་ལོག་གི་བློ་ཡིན་པ་དང་དེ་ལ་གཉེན་པོ་སྟོབས་ལྡན་ཡོད་པ་དངོས་ཡོད་གནས་ཚུལ་ཆགས་ཡོད། དེ་ལྟ་བུའི་ཐོག་ནས་ཉོན་མོངས་ག་ཚོད་ཤུགས་ཆེ་ནའང་སེམས་ཀྱི་རང་བཞིན་ལ་ཞུགས་མེད་པས། དྲི་མ་གློ་བུར་བ་ཉིད་དང་།། ཞེས་གསུངས་པ་དེ་རེད། ཡོན་ཏན་རང་བཞིན་གཉིས་ལྡན་ཕྱིར།། ཞེས་བསམ་བློ་གཏོང་དགོས་པ་ཆགས་ཡོད། དབུ་ཕར་གྱི་གཞུང་དེ་དག་གི་སྟེང་ནས་བསམ་བློ་བཏང་ཡོང་སྐབས་དྲི་མ་གློ་བུར་བ་ཡིན་པ་དང་། ཡོན་ཏན་རང་བཞིན་གཉིས་ལྡན་ཕྱིར་ཞེས་གསུངས་པ་ལ་དངོས་གནས་བྲོ་བ་ཁ་རྒྱུ་ཡོད་པ་ཞིག་དང་། སེམས་ལ་ཚོན་མདངས་ཡོང་བ་ཞིག་རེད། དེའི་ཐོག་ནས་དབུ་མ་འཇུག་པའི་ནང་དུ་གསུངས་པ་འདི་ལ་ངོས་ཀྱིས་ནམ་རྒྱུན་བསམ་བློ་གཏོང་བཞིན་ཡོད། དེ་ལྟར་བློ་གྲོས་ཟེར་གྱིས་སྣང་བ་གསལ་བྱས་ནས།། རང་གི་ལག་ན་གནས་པའི་སྐྱུ་རུ་ར་བཞིན་དུ།། སྲིད་གསུམ་འདི་དག་མ་ལུས་གདོད་ནས་སྐྱེ་མེད་པར།། རྟོགས་ཏེ་ཐ་སྙད་བདེན་པའི་སྟོབས་ཀྱིས་འགོག་པར་འགྲོ། །ཞེས་འགོག་བདེན་ཏན་ཏན་ཡོང་རྒྱུ་ཡོད་པ་ཞིག་རེད། ལས་སླ་བོ་མ་རེད། གོམས་དགོས་པ་རེད། གོམས་ན་དྲི་མ་གློ་བུར་བ་ཡིན་པ་དང་དེའི་གཉེན་པོ་སྟོབས་ལྡན་ཡོད་པ། སེམས་རང་བཞིན་གྱིས་འོད་གསལ་བ་ཡིན་པ་སོགས་ཀྱི་ཐོག་ནས་བསམ་བློ་བཏང་ན་ཉོན་མོངས་སྤངས་པའི་བྲལ་བ་འགོག་བདེན་སྤྱིར་ཤེས་བྱ་ལ་ཡོད་པ། འགོག་བདེན་མངོན་དུ་བྱས་པ་མང་པོ་ཞིག་མིག་དཔེར་བལྟ་ས་ཡོད་པ། རང་གི་ཉམས་མྱོང་ལ་ཆ་བཞག་ནའང་ག་ལེར་བསམ་བློ་བཏང་ན་དྲི་མ་གློ་བུར་བ་ཡིན་པ་དང་། དེ་བྲལ་བའི་སྤངས་པ་ཞིག་ཐོབ་ཐུབ་པ་རེད་བསམ་པའི་ཚོད་ཐིག་པ་ཞིག་འདུག དེར་བརྟེན། སྡུག་བསྔལ་ཤེས་བར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ་ཞེས་གསུངས་པ་དེ་ལྟར་རེད།
དེ་ལྟ་བུའི་མ་སྐྱིད་པ་བཟོ་མཁན་གྱི་ཉོན་མོངས་སྤངས་པའི་བྲལ་བ་ཞིག་ཡོད་པ་ཡིན་ན། དེ་ནི་ང་ཚོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། སྡུག་བསྔལ་གྱི་རྒྱུ་ཀུན་འབྱུང་། དེའི་རྩ་བ་ཉོན་མོངས་པའི་ཀུན་འབྱུང་དང་མ་རིག་པར་ཐུག་ཡོང་དུས་དེ་ལ་གཉེན་པོ་བསྟེན་ནས་སྤོང་བ་བློ་ལ་ཤར་ཡོང་སྐབས་ལམ་སྒོམ་པར་བྱ་ཞེས་ལམ་བསླབ་པ་གསུམ་དང་། གཙོ་བོ་ཤེས་རབ་ཀྱི་བསླབ་པ་རེད། དེ་སྒོམ་རྒྱུ་ནི་བདེན་པ་བཞིའི་ཐོག་ནས་སྡོམ་ཧ་ཅང་ཡག་པོ་ཞིག་སྐྱོན་འདུག ཞེས་སོགས་ཀྱི་བཀའ་སློབ་སྩལ་ཏེ་དྲི་བར་བཀའ་ལན་སྩལ་ཡོད་པ་བཅས། །
