༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགུང་གྲངས་ ༡༠༠ ལ་ཕེབས་པའི་ཨ་རིའི་དངོས་ཁམས་རིག་པའི་ཚན་རིག་པ་གྲགས་ཅན་དང་མགོན་པོ་གང་ཉིད་ཀྱི་གྲོགས་པོ་དམ་པ་སྐུ་ཞབས་ཨེ་རོན་བྷེག་ (Aaron Beck)  མཆོག་འདས་གྲོངས་སུ་གྱུར་བར་དམ་པ་ཁོང་གི་བུ་མོར་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན། སྐུ་ཉིད་ཀྱི་ཡབ་དམ་པ་མཆོག་གིས་མི་ཚེ་དོན་ཕན་ལྡན་པ་ཞིག་བསྐྱལ་ཡོད། སྐུ་ཉིད་ཀྱིས་མཁྱེན་གསལ་ལྟར་སྐུ་ཉིད་ཀྱི་ཡབ་དམ་པ་མཆོག་དང་ངེད་གཉིས་ལོ་མང་རིང་ཐུག་འཕྲད་ཀྱི་གོ་སྐབས་བྱུང་བ་མ་ཟད། ངོས་རང་ཨ་རིའི་ཕི་ལ་ཌེལ་ཕིར་ཡོད་པའི་དམ་པ་ཁོང་གི་ཁྱིམ་དུའང་བསྐྱོད་མྱོང་ཡོད།

ངེད་གཉིས་ཀྱིས་ཐུན་མོང་གི་ཁེ་ཕན་དོན་དུ་གོ་བསྡུར་དང་། ལྷག་པར་སེམས་ཀྱི་བྱེད་ལས་ཐོག་གོ་བསྡུར་སྦྱངས་བཤད་དང་། དེ་ལ་བརྟེན་ནས་འགྲོ་བ་མིའི་མི་ཚེ་བདེ་སྐྱིད་ལྡན་པ་ཞིག་བསྐྲུན་པར་རམ་འདེགས་ཇི་ལྟར་ཞུ་དགོས་པའི་སྐོར་གོ་བསྡུར་བྱས་ཡོད། ངོས་ཀྱིས་དམ་པ་ཁོང་གིས་སེམས་ཁམས་འཕྲོད་བསྟེན་གྱི་ཐོག་ཞབས་འདེགས་རླབས་ཆེན་བསྒྲུབས་པར་རྗེས་སུ་ཡི་རང་ཞུ་གི་ཡོད།

ཡབ་དམ་པ་མཆོག་དང་སྐུ་ཉིད་ཀྱིས་གསར་འཛུགས་གནང་བའི་ (The Beck Institute)  ཞེས་པའི་སློབ་གཉེར་ཁང་གིས་མུ་མཐུད་ཡབ་དམ་པ་མཆོག་གི་རིན་ཐང་ལྡན་པའི་ལས་དོན་ཁག་རྒྱུན་སྐྱོང་གནང་ཐུབ་པའི་ངོས་ལ་གདེང་ཚོད་ཡོད། དམ་པ་ཁོང་གི་བཀའ་དྲིན་རྗེས་དྲན་ཞུ་རྒྱུ་ཡག་ཤོས་ནི་ཁོང་གི་ལས་དོན་ཁག་རྒྱུན་སྐྱོང་གནང་རྒྱུ་དེ་ཡིན། ཞེས་འཁོད། །

                                                                                                         ༼ གསུང་འཕྲིན་ངོ་མ་ཨིན་ཡིག་ནས་བོད་སྒྱུར་ཞུས་པས་ཨིན་ཡིག་ལ་རྩ་འཛིན་ཡོང་བ་ཞུ། ༽