༄༅། །རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་ (International Olympic Committee) གིས་རྒྱལ་སྤྱིའི་དཔལ་འབྱོར་མཉམ་ལས་དང་འཕེལ་རྒྱས་མཐུན་ཚོགས་ཀྱི་རྩ་འཛིན་ལམ་སྟོན་ཁག་ལ་རྩིས་མེད་རྡོག་རོལ་བཏང་སྟེ་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་དེ་བཞིན་རྒྱ་ནག་གི་རྒྱལ་ས་པེ་ཅིང་དུ་འཚོགས་རྒྱུའི་ཐག་གཅོད་བྱས་པར་སུད་སིའི་ནང་རྟེན་གཞི་བྱས་པའི་སུད་བོད་མཐུན་གྲོགས་ཚོགས་པ་དང་། ཡུ་རོབ་བོད་རིགས་གཞོན་ནུའི་མཐུན་ཚོགས། སུད་སི་བོད་ཀྱི་བུད་མེད་ཚོགས་པ། སུད་སི་དང་ལིག་ཏེན་སིཌཡན་བོད་རིགས་ཚོགས་པ་བཅས་ནས་རྒྱལ་སྤྱིའི་དཔལ་འབྱོར་མཉམ་ལས་དང་འཕེལ་རྒྱས་མཐུན་ཚོགས་ (Organization for Economic Co-operation and Development) ཞེས་པར་ཞུ་གཏུག་ཡི་གེ་ཕུལ་ཡོད་པ་དང་། རྒྱལ་སྤྱིའི་དཔལ་འབྱོར་མཉམ་ལས་དང་འཕེལ་རྒྱས་མཐུན་ཚོགས་ཀྱི་ངོས་ནས་ཞུ་གཏུག་ཡི་གེ་དེ་ངོས་ལེན་གནང་ཡོད་པ་མ་ཟད། ཕྱི་ལོ་ ༢༠༢༡ ཟླ་ ༡༡ ཚེས་ ༢༣ ཉིན་ཞུ་གཏུག་ཡི་གེ་དེ་རྒྱལ་སྤྱིའི་དཔལ་འབྱོར་མཉམ་ལས་དང་འཕེལ་རྒྱས་མཐུན་ཚོགས་ཀྱི་དྲ་ཚིགས་སྟེང་བཞག་སྟེ་བར་འདུམ་བྱ་རྒྱུའི་མོས་མཐུན་གནང་ཡོད་པ་རེད།

དེ་ཡང་གོང་འཁོད་གཞུང་ཁོངས་མིན་པའི་ཚོགས་པ་ཁག་གིས་ཞུ་གཏུག་ཡི་གེ་དེའི་ནང་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་ནས་རྒྱ་ནག་གཞུང་གིས་བོད་དང་། ཤར་ཏུར་ཀི་སི་ཐན། ལྷོ་སོག་པོ། ཧོང་ཀོང་། དེ་བཞིན་རྒྱ་ནག་གི་མི་རིགས་གཞན་བཅས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་གི་ཡོད་པ་རྟོགས་བཞིན་དུ་རྒྱལ་སྤྱིའི་དཔལ་འབྱོར་མཉམ་ལས་དང་འཕེལ་རྒྱས་མཐུན་ཚོགས་ཀྱི་རྩ་འཛིན་ལམ་སྟོན་ཁག་ལ་རྩིས་མེད་རྡོག་རོལ་བཏང་སྟེ་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་འགྲན་ཚོགས་དེ་བཞིན་རྒྱ་ནག་གི་རྒྱལ་ས་པེ་ཅིང་དུ་འཚོགས་རྒྱུའི་ཐག་གཅོད་བྱས་པར་སྐྱོན་བརྗོད་དང་འབྲེལ་ཞུ་གཏུག་གནང་ཡོད་པ་འཁོད་ཡོད།


གཞན་ཡང་ཞུ་གཏུག་ཡི་གེ་ནང་རྒྱ་ནག་གཞུང་གིས་བོད་ནང་མུ་མཐུད་དྲག་གནོན་ཅན་གྱི་སྲིད་བྱུས་ལག་བསྟར་བྱས་དང་བྱེད་བཞིན་པར་བརྟེན་ད་བར་བོད་མི་གྲངས་ ༡༥༥ ཙམ་གྱིས་རང་ལུས་མེར་སྲེག་བཏང་ཡོད་པའི་སྐོར་དང་།  དེ་བཞིན་རྒྱ་ནག་གཞུང་གིས་ཡུ་གུར་མི་རིགས་ལ་བཙན་དབང་གིས་ངལ་རྩོལ་བྱེད་དུ་བཅུག་ནས་ཅ་དངོས་ཚོང་བཀྲམ་བྱེད་བཞིན་པ། ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ཀྱི་སྦྱིན་བདག་དང་། མཉམ་འབྲེལ་ཁག དེ་བཞིན་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་དང་འབྲེལ་བའི་ཚོང་རྫས་མཁོ་སྤྲོད་བྱེད་མཁན་རྣམས་ཤར་ཏུར་ཀི་སི་ཐན་གྱི་ངལ་རྩོལ་བསྒྱུར་བཀོད་ཁང་དང་ཐད་ཀར་རམ་སྐོར་ནས་འབྲེལ་བ་ཡོད་པ་སོགས་ཀྱི་སྐོར་འཁོད་ཡོད་པ་བཅས། །