༄༅། །རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་མོ་སི་ཁོར་རྟེན་གཞི་བྱས་པའི་ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་ (FPMT) གི་ཁོངས་གཏོགས་ཚ་ཚ་བཟོ་སྐྲུན་ཁང་ཞིག་ཏུ་གཟིགས་སྐོར་ལ་ཕེབས་ཡོད། སྐབས་དེར་ཁོང་གིས་གསུང་བཤད་མདོར་ཙམ་དང་ཚ་ཚ་བཟོ་མཁན་དང་བླངས་པ་རྣམས་དང་ལྷན་སྨོན་ལམ་གསུང་འདོན་གནང་ཡོད་པ་རེད། ཚ་ཚ་དེ་དག་ཨུ་རུ་སུ་ནང་གི་ནང་པའི་ཡུལ་ལུང་ཁག་ཏུ་བགོ་འགྲེམས་གནང་རྒྱུ་ཡིན་འདུག 

ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་ནི། ནང་པའི་ཆོས་དང་། སྒོམ་ཉམས་ལེན། འགྲོ་བ་མིའི་བདེ་རྩའི་སླད་ལས་འགུལ་སྤེལ་མཁན་རྒྱལ་སྤྱིའི་ནང་པའི་ཆོས་ཚོགས་ཤིག་ཡིན་ཞིང་། ཚ་ཚ་བཟོ་སྐྲུན་ལས་གཞི་དེ་བླ་མ་བཟོད་པ་རིན་པོ་ཆེ་མཆོག་ཨུ་རུ་སུར་ཕེབས་ཐེངས་སྔོན་མའི་སྐབས་སུ་དབུ་འཛུགས་གནང་བ་ཞིག་རེད་འདུག དང་བླངས་ཞབས་ཞུ་བའི་འགོ་ཁྲིད་ཉི་མ་ལགས་ཀྱིས་སྐུ་ཚབ་དོན་གཅོད་མཆོག་ལ་ཚ་ཚ་བཟོ་སྐྲུན་གྱི་ལས་གཞི་སྐོར་ངོ་སྤྲོད་དང་། ཚ་ཚ་བཟོ་བར་དངོས་རྫས་གང་བེད་སྤྱོད་བྱེད་ཀྱི་ཡོད་པ་དང་བཟོ་སྟངས་ཇི་ལྟར་ཡིན་སྐོར་འགྲེལ་བརྗོད་གནང་ཡོད། ཚ་ཚ་བཟོ་སྐྲུན་གྱི་ལམ་སྲོལ་ནི་དུས་རབས་མང་པོའི་སྔོན་ནས་རྒྱ་གར་དུ་དར་བའི་ནང་པའི་སྲོལ་རྒྱུན་གྱི་སྒྱུ་རྩལ་ཞིག་ཡིན་ཞིང་། དེང་སྐབས་ལམ་སྲོལ་དེ་ཉིད་གཙོ་བོ་བོད་དང་ཧི་མ་ལ་ཡའི་ས་ཁུལ། སོག་པོ་དང་ཨུ་རུ་སུ་བཅས་སུ་ཧ་ཅང་དར་ཁྱབ་ཆེན་པོ་བྱུང་ཡོད།  སོ་ཝི་ཊའི་ (Soviet) དུས་ཀྱི་རིག་གནས་གསར་བརྗེའི་སྐབས་སྲོལ་རྒྱུན་དེ་ཉམ་དམས་སུ་གྱུར་ཡོད་མོད། འོན་ཀྱང་ད་ཆ་ཐེག་ཆེན་སྲོལ་རྒྱུན་མི་ཉམས་རྒྱུན་འཛིན་ཐེབས་རྩ་ཁང་གི་རོགས་མགོན་འོག་ནང་པའི་སྒྱུ་རྩལ་དེ་སླར་གསོ་ཞུ་བཞིན་ཡོད་པ་རེད། གཟིགས་སྐོར་སྐབས་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས། ཁྱེད་རྣམ་པ་ནང་པའི་ས་ཁུལ་གཞན་དུ་ཕེབས་ནས་ན་གཞོན་རྣམས་ལ་སྒྱུ་རྩལ་འདི་ཉིད་སློབ་སྟོན་དང་། ས་གནས་ནང་གི་ནང་པའི་མི་མང་ཡང་མཉམ་ཞུགས་བྱ་རྒྱུ་ཡོད་པ་བཟོས་ན་ཡག་པོ་ཡོད། གང་ཡིན་ཟེར་ན་དེང་སང་ས་གནས་མང་པོར་མཆོད་རྟེན་གསར་བཞེངས་དང་ཉམས་གསོ་བྱེད་ཀྱི་འདུག་ཅེས་གསུངས། 

སྐུ་ཚབ་དོན་གཅོད་ཀྱིས་དང་བླངས་པ་རྣམས་དང་ལྷན་ཚ་ཚར་རབ་གནས་གནང་ཞིང་། ཚ་ཚ་དེ་དག་ནི་ད་ལྟ་ཀལ་མ་ཨི་ཀི་ཡ་ (Kalmykia) རུ་བཞེངས་བཞིན་ཡོད་པའི་ཀིཊ་ཆེ་ནིར་ (Kitchenir) ལྷ་ཁང་ལ་ཞལ་འདེབས་གནང་རྒྱུ་རེད་འདུག  ལྷ་ཁང་གསར་བཞེངས་ཀྱི་ལས་གཞི་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོའི་ཆ་ཤས་ཙམ་མ་ཟད། གྲོང་གསེབ་ཏུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཞབས་ཀྱིས་བཅགས་ནས་ལོ་ངོ་ཉི་ཤུ་འཁོར་བའི་དུས་དྲན་དུ་དབུ་འཛུགས་གནང་བ་ཞིག་ཡིན་པ་དང་། ལྷ་ཁང་དེ་ཉིད་ས་གནས་མི་མང་ནས་ནཱ་ལེནྡྲའི་ཆོས་བརྒྱུད་མི་ཉམས་རྒྱུན་འཛིན་ཆེད་བཞེངས་རྒྱུར་དམ་བཅས་པ་ཞིག་ཡིན་འདུག་བཅས།།