༄༅། །རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ཨུ་རུ་སུའི་རྒྱལ་ས་མོ་སི་ཁོར་རྟེན་གཞི་བྱས་པའི་བོད་ཀྱི་གསོ་བ་རིག་པ་དང་ནང་པའི་ཆོས་ཚོགས་ཁག་གི་འཕེལ་རྒྱས་ཀྱི་གནས་སྟངས་ལ་རྟོག་ཞིབ་དང་། རུ་སོག་སྐུ་ཚབ་དོན་གཅོད་ཁང་ནས་ཚོགས་པ་དེ་དག་ལ་འཕྲད་བཞིན་པའི་དཀའ་ངལ་སེལ་ཐབས་གང་ཡོད་མཁྱེན་རྟོགས་སླད་གཟིགས་སྐོར་དུ་ཕེབས་ཡོད་པ་རེད། མོ་སི་ཁོ་ལ་ཆ་མཚོན་ན་ནང་པའི་ཆོས་ཚོགས་མང་ཤོས་ཡོད་པའི་ས་གནས་ཤིག་ཡིན།
དེ་ཡང་གཟིགས་སྐོར་སྐབས་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ནས་སྨན་པ་འཇིགས་མེད་རྒྱ་མཚོ་ལགས་དང་མཇལ་འཕྲད་གནང་ཞིང་། འཇིགས་མེད་རྒྱ་མཚོ་ལགས་ནི། ལོ་ངོ་ཉི་ཤུ་ཙམ་རིང་ཨུ་རུ་སུར་གནས་བཞུགས་ཀྱིས་ཉེ་ལམ་ཁོང་གིས་བོད་སྨན་དང་། སྐམ་ཁབ། སྲོལ་རྒྱུན་བསྐུ་མཉེ། མེ་བུམ་སོགས་ཀྱི་ལམ་ནས་སྨན་བཅོས་བྱ་ཡུལ་བོད་ཀྱི་གསོ་རིག་སྨན་ཁང་ཆུང་ཆུང་ཞིག་གསར་འཛུགས་གནང་ཡོད། དེ་ནས་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ནས་སྨན་ཁང་དུ་གཟིགས་སྐོར་དང་སྦྲགས་ལས་བྱེད་རྣམས་དང་ལྷན་བཀའ་མོལ་གནང་སྐབས་ལས་བྱེད་རྣམས་རྡ་ས་བོད་ཀྱི་སྨན་རྩིས་ཁང་གིས་སྤྲོད་བཞིན་པའི་གསོ་བ་རིག་པའི་འཛིན་གྲྭར་འཛུལ་ཞུགས་གནང་ཐུབ་ན་དགེ་མཚན་ཡོད་སྐོར་གསུངས། 
དེ་རྗེས་རིན་པོ་ཆེ་མཆོག་ནས་མོ་སི་ཁོ་ནང་པའི་ཆོས་ཚོགས་སུ་ཕེབས་ཡོད་པ་དང་། མོ་སི་ཁོ་ནང་པའི་ཆོས་ཚོགས་ཀྱིས་ལོ་མང་རིང་ནས་ནང་པའི་ལྷ་ཁང་དང་། ཤེས་རིག་སྦྱོང་བརྡར་ཁང་གསར་འཛུགས་གནང་བར་ཧ་ཅང་སྐུ་ལས་བསྐྱོན་ཡོད། ཕྱི་ལོ་༢༠༠༤ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ནང་པའི་ལྷ་ཁང་བཞེངས་ཆེད་ཞལ་འདེབས་གསོལ་སྩལ་གནང་ཡོད་པ་ལྟར། ད་ལྟའི་ཆར་ནང་པའི་མཆོད་རྟེན་ཞིག་གསར་བཞེངས་ཐུབ་པ་བྱུང་ཡོད་པ་དང་། མཆོད་རྟེན་དེ་ནི་མོ་སི་ཁོ་ནང་གི་ནང་པའི་མཆོད་རྟེན་ཆེ་ཤོས་སུ་གྱུར་ཡོད། དེ་བཞིན་རུ་སོག་སྐུ་ཚབ་དོན་གཅོད་མཆོག་ནས་ད་ལྟ་གསར་དུ་བཞེང་བཞིན་པའི་ལྷ་ཁང་ལ་གཟིགས་སྐོར་དང་འབྲེལ། ཤེས་ཡོན་དང་། ནང་པའི་མཆོད་རྫས། ལག་ཤེས་དང་། ནང་ཆོས་སློབ་དེབ་མཁོ་སྒྲུབ་ཐད་ཕྱག་རོགས་ཞུ་རྒྱུའི་ཞལ་བཞེས་གནང་ཡོད། 
རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གཟིགས་སྐོར་ཐ་མ་རོ་རི་ཆ་འགྲེམས་སྟོན་ཁང་(Roerich) ཡོད་སའི་ས་གནས་སུ་ཕེབས་ཤིང་། ས་གནས་དེ་ནི་ཕྱི་ལོ་༡༩༩༠ཙམ་ལ་ནང་པའི་མཆོད་རྟེན་ཐོག་མར་ཕྱག་འདེབས་ཡུལ་དེ་ཆགས་ཡོད། ས་གནས་དེར་བཞེངས་པའི་མཆོད་རྟེན་དེ་གནམ་གཤིས་གྲང་ངར་ཆེ་བའི་རྐྱེན་གྱིས་རིམ་བཞིན་གས་ཐོར་དུ་ཕྱིན་ཡོད་པ་དང་། ད་ལྟ་མོ་སི་ཁོ་ནང་ཡོད་པའི་ནང་པའི་ཚོགས་པ་ཁག་མཉམ་རུབ་ཀྱིས་མཆོད་རྟེན་དེ་ཉིད་ཉམས་གསོའི་ལས་གཞི་དབུ་འཛུགས་གནང་ཡོད། གཟིགས་སྐོར་གྱི་མཇུག་ཏུ་སྐུ་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་ནས་ཨུ་རུ་སུའི་ནང་པ་ཚོར་ཨུ་རུ་སུའི་ནང་དུ་ནང་པའི་ལྟ་གྲུབ་དང་། སྒྱུ་རྩལ། རྩོམ་རིག་སོགས་ཀྱི་ཆེད་ཞབས་འདེགས་དང་སྐུ་ལས་བསྐྱོན་པར་བསྔགས་བརྗོད་གནང་བ་སྦྲགས། ནང་པའི་རིག་གཞུང་དེ་འཇིག་རྟེན་འཚོ་གནས་ཆེད་གལ་ཆེན་པོ་ཆགས་ཡོད་པ་དང་། ལྷག་པར་བོད་ཀྱི་གནའ་བོའི་རིག་གཞུང་བཟང་པོ་དེ་མོ་སི་ཁོ་ལྟ་བུ་རིག་གཞུང་སྣ་ཚོགས་གནས་ཡུལ་ཞིག་ཏུ་མི་ཉམས་རྒྱུན་འཛིན་བྱེད་འོས་པ་ཆགས་ཡོད།ཅེས་གསུངས་ཡོད་པ་བཅས།།
