༄༅། །འདི་གར་བྱང་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༡ ཚེས ༡༣ རེས་གཟའ་སྤེན་པའི་ཉིན་ཨ་རིའི་གྲོང་ཁྱེར་ནིའུ་ཡོག་ནང་རྒྱ་རིགས་གནས་སྡོད་མང་ཤོས་ཀྱི་ས་གནས་ཧྥ་ལ་ཤིང་དུ་རྒྱ་རིགས་མཁས་དབང་ཧུ་ཕིང་ལགས་ཀྱིས་རྒྱ་ནག་ནང་གི་མི་རིགས་ཀྱི་གནད་དོན་དང་རྒྱ་ནག་གི་མང་གཙོའི་འགྱུར་བ་སྐོར་བརྩམས་པའི་དཔེ་དེབ་གསར་པ། ༼དྲང་བདེན་རྟོགས་ཐུབ་པར་གཞན་གྱི་ལངས་ཕྱོགས་ནས་ལྟ་བ་༽ ཞེས་པའི་རྒྱ་ནག་གི་གཏམ་དཔེ་དེབ་མིང་དུ་འཁོད་པ་ཞིག་དབུ་འབྱེད་དང་འགྲོ་གླེང་ཚོགས་གནང་སོང་།
དཔེ་དེབ་དབུ་འབྱེད་ཀྱི་ཚོགས་འདུ་དེ་བཞིན་རྒྱ་རིགས་མང་གཙོ་དོན་གཉེར་བ་གྲགས་ཅན་ཝང་ཏན་ལགས་ཀྱིས་འགོ་ཁྲིད་འོག་རྒྱ་ནག་གླེང་སྟེགས་ཞེས་པའི་ཚོགས་པས་གོ་སྒྲིག་གནང་ཞིང་། ཚོགས་འདུའི་ཐོག་རྒྱ་ནག་མང་གཙོ་དོན་གཉེར་བ་དང་ཤེས་ཡོན་པ་གྲགས་ཅན་ཝང་ཅུན་ཐོའོ་ལགས་དང་། ཆབ་སྲིད་དཔྱད་བརྗོད་པ་ཁྲེན་ཕོའོ་ཁུང་ལགས། རྒྱ་བོད་མཛའ་འབྲེལ་ཚོགས་པའི་ཚོགས་གཙོ་ཤོའི་ཝིའི་ལགས། དེ་བཞིན་མགྲོན་འབོད་ལྟར་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲ་ཤིས་ལགས་དང་། ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་སོགས་མཉམ་ཞུགས་གནང་ཡོད།
དེ་ཡང་དཔེ་དེབ་དབུ་འབྱེད་ཀྱི་ཚོགས་འདུའི་ཐོག་ཝང་ཏན་ལགས་ཀྱིས་གསུང་དོན། ད་ཐེངས་སྐུ་ཞབས་ཧུ་ཕིང་ལགས་ཀྱི་དཔེ་དེབ་དེ་བཞིན་རྒྱ་ནག་གླེང་སྟེགས་ཚོགས་པའི་ངོས་ནས་རྒྱབ་སྐྱོར་དང་པར་སྐྲུན་ཞུས་པའི་དཔེ་དེབ་དྲུག་པ་དེ་ཡིན། ཧུ་ཕིང་ལགས་ཀྱིས་མི་རིགས་འདྲ་མིན་གྱི་གནད་དོན་ཐོག་ལོ་མང་རིང་ཉམས་ཞིབ་གནང་བ་དང་། རྒྱ་ནག་གི་མང་གཙོའི་འགྱུར་བའི་ཐོག་དབྱེ་ཞིབ་ཀྱི་བསམ་ཚུལ་སྤེལ་བ་དེ་དག་རྒྱ་རིགས་ཀློག་པ་པོ་ཚོར་འབུལ་དགོས་པའི་གལ་གནད་སོགས་ཀྱི་སྐོར་གསུངས་ཡོད།
རྩོམ་པ་པོ་སྐུ་ཞབས་ཧུ་ཕིང་ལགས་ཀྱིས་དེ་སྔ་རྒྱ་ནག་ནང་མང་གཙོའི་ལས་འགུལ་སྤེལ་སྐབས་རྒྱ་ནག་གཞུང་གིས་མང་གཙོ་དོན་གཉེར་བ་དང་དྲུག་བཞིའི་དོན་རྐྱེན་སྐབས་སློབ་ཕྲུག་རྣམས་ལ་དྲག་གནོན་བྱས་རྐྱེན་ཕྱི་རྒྱལ་དུ་ཡོང་དགོས་བྱུང་ཡོད། ཁོང་གིས་བོད་དོན་སྐོར་རྒྱ་རིགས་མཁས་དབང་ཝང་ལིས་ཞུང་སོགས་བརྒྱུད་ནས་དང་པོ་ཤེས་རྟོགས་བྱུང་ཡོད་པ་དང་། ཕྱི་རྒྱལ་དུ་སླེབས་རྗེས་བཞུགས་སྒར་རྡ་སར་ཕེབས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་དངོས་སུ་མཇལ་ཁ་ཞུས་པ་མ་ཟད། བོད་དང་། ཤར་ཏུར་ཀི་སི་ཐན། སོག་པོ་སོགས་ཀྱི་དཀའ་རྙོག་ནི་རྒྱ་ནག་གིས་ངེས་པར་སེལ་དགོས་པའི་གནད་དོན་ཡིན་པའི་སྐོར་འགྲེལ་བརྗོད་གནང་ཡོད། 
རྒྱ་རིགས་མང་གཙོའི་འགོ་ཁྲིད་གྲགས་ཅན་སྐུ་ཞབས་ཝང་ཅུན་ཐོའོ་ལགས་དང་ཆབ་སྲིད་དཔྱད་བརྗོད་པ་ཁྲེན་ཕོ་ཁུང་ལགས་སོགས་ཀྱིས་གཙོས་རྒྱ་རིགས་ཤེས་ཡོན་ཅན་ཚོས་སྐུ་ཞབས་ཧུ་ཕིང་ལགས་ཀྱི་དཔེ་དེབ་དེར་ཧ་ཅང་བསྔགས་བརྗོད་དང་གདེང་འཇོག་གནང་ཡོད། སྐུ་ཞབས་ཁྲིན་ཕོ་ཁུང་ལགས་ཀྱིས་ལོ་རྒྱུས་སྟེང་བོད་ཀྱི་བདག་དབང་དང་འབྲེལ་བའི་གནད་དོན་གལ་ཆེན་དང་། ད་སྐབས་འཕྲད་བཞིན་པའི་དཀའ་ངལ་སོགས་ཀྱི་སྐོར་སྐུ་ཞབས་ཧུ་ཕིང་ལགས་ཀྱིས་དེབ་དེའི་ནང་འགྲེལ་བཤད་གནད་དུ་འཁེལ་བ་གསུང་ཡོད་པ། གནད་དོན་དབྱེ་ཞིབ་པ་མང་པོས་དེབ་དེ་ལྟ་དགོས་པའི་དཔེ་དེབ་ཡིན་པ་འགྲེལ་བརྗོད་གནང་ཡོད། འགྲོན་འབོད་ལྟར་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུར་པ་ཀུན་དགའ་བཀྲ་ཤིས་ལགས་དཔེ་དེབ་དབུ་འབྱེད་ཀྱི་ཚོགས་འདུར་ཆེད་ཕེབས་ཀྱིས་ཧུ་ཕིང་ནི་བོད་ཀྱི་གྲོགས་པོ་རྙིང་པ་ཡིན་པ་དང་། དེ་བཞིན་བོད་ཀྱི་སྐོར་དཔེ་དེབ་དང་རྩོམ་ཡིག་སྤེལ་མཁན་རྒྱ་རིགས་གྲོགས་པོ་མང་པོ་ཡོད་པ་དེ་དག་ནི། གཙོ་བོ་༧ གོང་ས་མཆོག་གིས་བོད་མི་ཚོས་རྒྱ་རིགས་དང་ལྷན་དུ་འབྲེལ་བ་གནང་དགོས་པའི་བཀའ་སློབ་ཡང་ཡང་སྩལ་བ་ལས་བྱུང་བ་ཡིན་པ་སོགས་ཀྱི་སྐོར་གསུངས་ཡོད།
གཞན་ཡང་མགྲོན་འབོད་ལྟར་བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཚོགས་འདུར་མཉམ་ཞུགས་གནང་སྟེ་སྐུ་ཞབས་ཧུ་ཕིང་ལགས་བོད་རྒྱ་འབྲེལ་མོལ་གྱི་ཚོགས་འདུ་རབ་དང་རིམ་པར་མཉམ་ཞུགས་གནང་མཁན་བོད་ཀྱི་གྲོགས་པོ་རྙིང་པ་ཡིན་པ་དང་། ཁོང་གིས་བོད་ཀྱི་དཀའ་རྙོག་དང་འབྲེལ་བའི་དོན་གནད་དོན་ཁག་དེབ་དེའི་ནང་འགྲེལ་བརྗོད་གནང་ཡོད་པ་དང་། དམིགས་གསལ་དབུ་མའི་ལམ་གྱི་སྲིད་བྱུས་སྐོར་འགྲེལ་བརྗོད་ཁ་གསལ་འཁོད་ཡོད་པ། རྒྱ་ནག་གཞུང་གིས་བཟང་ཕྱོགས་ཀྱི་ལན་འདེབས་བྱེད་ཀྱི་མེད་པ་མ་ཟད། འཁྱོག་བཤད་ཀྱི་གནས་ཚུལ་སྤེལ་བཞིན་ཡོད་པ་སོགས་ཀྱི་སྐོར་གསུངས་རྗེས་སྐུ་ཞབས་ཧུ་ཕིང་ལགས་ལ་མཇལ་དར་གནང་ནས་༧གོང་ས་མཆོག་གི་དགོངས་གཞི་དང་མཐུན་པའི་དཔེ་དེབ་དེ་འདྲ་ཞིག་པར་སྐྲུན་གནང་བར་ཐུགས་རྗེ་ཆེ་ཞུས་གནང་ཡོད།།
