༄༅། །འདི་གར་བྱང་ཨ་རིའི་དོན་ཁང་གིས་བཏང་གནས་ནང་འཁོད་དོན། རྒྱ་རིགས་མང་གཙོ་དོན་གཉེར་བ་གྲགས་ཅན་ཝེ་ཅིང་ཧྲེང་གི་སྣེ་ཁྲིད་འོག་ཕྱི་སྡོད་རྒྱ་རིགས་ཀྱི་མང་གཙོ་ལས་འགུལ་གྱི་ཚོགས་ཆེན་ཐེངས་༡༧ པ་དེ་བཞིན་ཕྱི་ལོ་ ༢༠༢༡ ཟླ་བ་ ༡༡ ཚེས་ ༥ ནས་ ༧ བར་དྲ་ལམ་བརྒྱུད་བསྐོང་ཚོགས་གནང་བའི་ཐོག་ཕྱོགས་མཐའ་ཁག་གི་རྒྱ་རིགས་མང་གཙོ་དོན་གཉེར་བ་དང་ལས་འགུལ་བ་མང་པོ་མཉམ་ཞུགས་གནང་ཡོད་པ་དང་། བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མགྲོན་འབོད་ལྟར་ཚོགས་ཆེན་དེར་མཉམ་ཞུགས་ཀྱིས་བོད་དོན་སྐོར་གསུང་བཤད་གནང་ཡོད།
དེ་ཡང་ཉིན་གྲངས་གསུམ་རིང་གི་ཚོགས་ཆེན་ཐོག་དྲུག་བཞིའི་དོན་རྐྱེན་སྐབས་སློབ་ཕྲུག་གི་འགོ་ཁྲིད་གྲགས་ཅན་ཝང་ཏན་ལགས་དང་། རྒྱ་ནག་གི་འགོ་ཁྲིད་གུ་ཡངས་ཅན་ཀྲོའོ་ཙི་ཡང་ལགས་ཀྱི་དྲུང་ཡིག་གམ་ཆབ་སྲིད་ལམ་སྟོན་པ་རྒྱ་རིགས་མཁས་དབང་ཡན་ཅ་ཆི་ལགས། དེ་བཞིན་རྒྱ་རིགས་མང་གཙོ་དོན་གཉེར་བ་གྲགས་ཅན་མང་དག་མཉམ་ཞུགས་གནང་ནས་རྒྱ་རིགས་མང་གཙོའི་ལས་འགུལ་ཇི་ལྟར་ཡར་རྒྱས་གཏོང་དགོས་པའི་སྐོར་དང་། རྒྱ་ནག་ནང་གི་ཆབ་སྲིད་ཀྱི་འགྱུར་བ་སོགས་ཀྱི་སྐོར་ལ་འགྲོ་གླེང་གཏམ་བཤད་ལྷུག་པོ་གནང་ཡོད་པ་མ་ཟད། རྒྱ་ནག་གི་ཆབ་སྲིད་ཀྱི་འགྱུར་ལྡོག་གནས་བབ་དང་། རྒྱ་ནག་མང་གཙོ་ཅན་དུ་བསྒྱུར་བར་རྒྱ་ནག་དང་ཕྱི་རྒྱལ་ཡུལ་གྲུ་ཁག་གི་ནང་ལས་འགུལ་དང་ལས་འཆར་སྤེལ་ཐབས། རྒྱ་ནག་གི་མང་གཙོ་དང་འབྲེལ་བའི་དཔྱད་བརྗོད་ཀྱི་བརྗོད་གཞི་འདྲ་མིན་སྟེང་ཞིབ་འཇུག་བྱས་པའི་འབྲུ་དོན་སོགས་ཀྱི་སྐོར་གོ་བསྡུར་སྦྱངས་བཤད་དང་འགྲོ་གླེང་ལྷུག་པོ་གནང་ཡོད།
ཚོགས་འདུའི་ཐོག་བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས། རྒྱ་ནག་གཞུང་གིས་བོད་ནང་བུ་བཅོལ་ཁང་དང་གཞི་རིམ་སློབ་གྲྭ་ནས་རྒྱ་ཡིག་སློབ་ཁྲིད་ཀྱི་སྲིད་བྱུས་གཙོ་བོ་བཟུང་སྟེ་ལག་བསྟར་བྱེད་བཞིན་ཡོད་པ་མ་ཟད། བོད་ཀྱི་དགོན་སྡེ་ཁག་ཏུ་རྒྱ་ནག་དམར་ཤོག་གི་སློབ་གསོ་སྤེལ་ནས་ནང་ཆོས་ཀྱི་བསླབ་པ་སློབ་གཉེར་ལ་དཀའ་ངལ་ཧ་ཅང་ཆེན་པོ་སྤྲོད་བཞིན་པ་དང་། དགོན་སྡེ་ཁག་གི་གྲྭ་རྒྱུན་ཚད་བཀག་དང་། གྲྭ་བཙུན་དགོན་པར་ཞུགས་སྐབས་ལོའི་ཚད་བཀག་སོགས་བཟོས་ཡོད་པ། དེ་བཞིན་རྒྱ་ནག་གཞུང་གིས་བོད་ཀྱི་ཡར་ཀླུངས་གཙང་པོའི་ཐོག་འཛམ་གླིང་སྟེང་གི་ཆུ་མཛོད་ཆེ་ཤོས་འཛུགས་སྐྲུན་བྱེད་བཞིན་ཡོད་སྟབས་བོད་ཀྱི་ཁྱིམ་མཚེས་རྒྱལ་ཁབ་ཁག་ལ་ཁོར་ཡུག་གི་གནོད་སྐྱོན་འབྱུང་རྒྱུའི་ཉེན་ཁ་སོགས་ཀྱི་སྐོར་གསུངས།
གཞན་ཡང་ཁོང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་དང་། བོད་རྒྱའི་དཀའ་རྙོག་སེལ་ཐབས་སུ་བོད་མིའི་སྒྲིག་འཛུགས་ཀྱིས་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་གཉིས་སྨན་དབུ་མའི་ལམ་གྱི་སྲིད་བྱུས་ལག་བསྟར་གནང་མུས་ཡིན་ཡང་རྒྱ་ནག་གཞུང་གིས་གཉིས་སྨན་དབུ་མའི་ལམ་གྱི་སྲིད་བྱུས་ལ་འཁྱོག་བཤད་ཀྱི་གནས་ཚུལ་སྤེལ་བཞིན་པ། བོད་དོན་རྒྱབ་སྐྱོར་བ་རྒྱ་རིགས་གྲོགས་པོ་ཚོས་བོད་ཀྱི་མངོན་འདོད་དངོས་དེ་རྒྱ་རིགས་མི་མང་ལ་གང་ཐུབ་ཁྱབ་སྤེལ་གནང་དགོས་པའི་རེ་སྐུལ་གནང་ཡོད་པ་བཅས།།
