༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༢༥ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༨༧ པ་སྨན་པ་ཚེ་རིང་མཚམས་གཅོད་ལགས་དང་སྨན་པ་བརྩོན་འགྲུས་ལགས་རྣམ་གཉིས་ཀྱིས་སྤེལ་གནང་སོང་།
དེ་ཡང་གསལ་བསྒྲགས་ནང་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་གི་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༩ དང་། བལ་ཡུལ་ནང་གི་བཙན་བྱོལ་བོད་མིའི་གཞིས་ཆགས་ཁག་ ༡ བཅས་ཁྱོན་བཙན་བྱོལ་བོད་མིའི་གཞིས་ཆགས་ཁག་ ༡༠ ནང་གི་བོད་མི་རང་ཁྱིམ་དུ་མི་གྲངས་ ༤༩ དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༨༦ བཅས་ཁྱོན་བསྡོམས་བོད་མི་གྲངས་ ༡༣༥ འགོག་དབྱེ་ཟུར་བཀག་ནང་བཞུགས་ཡོད་པ་དང་། དེ་བཞིན་འདས་པའི་བདུན་ཕྲག་ནང་ཏོག་དབྱིབས་ནད་གཞི་ཕོག་མཁན་མི་གྲངས་ ༦ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་འདུག
ནད་ཡམས་ཁྱབ་གདལ་སྔོན་འགོག་སླད་འདས་པའི་བདུན་ཕྲག་ནང་རྒྱ་གར་ནང་གི་ས་གནས་གྲངས་ ༡༣ ནང་བོད་མི་གྲངས་ ༦༨༩ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད་ཅིང་། དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་ལོ་ན་ ༡༨ ཡན་གྲངས་ ༤༦༠༥༢ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབ་ཟིན་པ་དང་། མི་གྲངས་ ༤༡༤༧ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་གྲངས་ ༤༨ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན་པ་དང་མི་གྲངས་ ༦༩༨༠ ལ་སྔོན་འགོག་སྨན་ཁབ་ཆ་ཚང་ཐོབ་འདུག
འདས་པའི་བདུན་ཕྲག་གཅིག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་སྤེལ་ཀོབ་དང་། སྦིར། རྡ་ས། ལ་དྭགས། མོན་སྒོ་འདོད་རྒུད་གླིང་། བདེ་སྐྱིད་གླིང་། དོན་གྲུབ་གླིང་བཅས་ཀྱི་བོད་མི་གྲངས་ ༣༧ ལ་ནད་གཞི་ཕོག་པ་ར་འཕྲོད་བྱུང་ཡོད་པ་ལས་སྐྱེས་པ་གྲངས་ ༢༠ དང་། བུད་མེད་གྲངས་ ༡༧ དེའི་ནང་ནས་དགུང་ན་མཐོ་ཤོས་དེ་ལོ་ ༩༡ དང་ཆུང་ཤོས་དེ་ལོ་ ༤ ཡིན། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༦༨༩༦ དང་། དྲག་སྐྱེད་བྱུང་བ་མི་གྲངས་ ༦༦༦༣། འདས་གྲོངས་སུ་གྱུར་བ་མི་གྲངས་ ༡༥༩། ད་ལྟ་གསོ་བཅོས་བྱེད་བཞིན་པ་མི་གྲངས་ ༧༤ ཡོད།
སྨན་པ་ཚེ་རིང་མཚམས་གཅོད་ལགས་ཀྱིས་དེ་དང་འབྲེལ་ནས་ལམ་སྟོན་གནང་དོན། ད་བར་འཛམ་གླིང་ཁྱོན་ཡོངས་སུ་ཏོག་དབྱིབས་ནད་གཞི་ཕོག་མཁན་ས་ཡ་ཉིས་བརྒྱ་ལྔ་བཅུ་ང་བརྒྱད་དང་། རྒྱ་གར་དུ་ས་ཡ་གསུམ་ཅུ་སོ་བཞི་བྱུང་ཡོད་པའི་ཁར། ད་ལྟ་རྒྱ་གར་ནང་ནད་མནར་བཞིན་པ་མི་གྲངས་༡༠༩༩༤༠ ཡོད། འདས་པའི་ཟླ་བ་གཉིས་ཙམ་ནས་རྒྱ་གར་ནང་དུ་ནད་ཡམས་ཀྱི་གནས་སྟངས་ཇེ་བཟང་དུ་འགྲོ་བཞིན་ཡོད་མོད། འོན་ཀྱང་ད་ལྟའི་ཆར་ཨ་རི་དང་ཡུ་རོབ་རྒྱལ་ཁབ་མང་པོའི་ནང་དུ་ནད་པའི་གྲངས་འཕར་བཞིན་འདུག སྤྱིར་ཨ་རི་གཙོས་ཕྱི་རྒྱལ་ཁག་ཏུ་མི་ཕལ་མོ་ཆེས་སྔོན་འགོག་ཁབ་རིམ་པ་གཉིས་པ་བརྒྱབ་ཟིན་པ་མ་ཟད། རིམ་པ་གསུམ་པ་(booster shot) ཡང་རྒྱག་བཞིན་ཡོད་ནའང་སྨན་ཁབ་དེ་དག་ལ་ཕན་ནུས་བརྒྱ་ཆ་ག་ཚོད་ཡོད་མེད་ཤེས་རྟོགས་ཐུབ་ཀྱི་མེད་སྟབས། ཚང་མས་གང་གཟབ་གནང་གལ་ཆེ། དེ་བཞིན་དགུན་དུས་ཆམ་རིམས་འགོ་ཁྱབ་ཆེ་བ་མ་ཟད་ཡོང་འགྱུར་གྱི་ཡེ་ཤུའི་དུས་ཆེན་ཀྲྀས་མ་སི་སོགས་སུ་མི་འདུ་འཛོམས་དང། དགུན་དུས་ཁང་པའི་སྒོ་སྒེའུ་ཁུང་བསྡམས་པ་ལ་བརྟེན་ནས་ནད་གཞི་ཁྱབ་གདལ་མྱུར་དུ་འགྲོ་ཉེན་ཆེ་བས་གཟབ་གཟབ་བྱེད་དགོས་པ་གལ་ཆེན་པོ་ཡིན། གཙོ་ཆེ་ཤོས་ད་བར་ཞུས་པ་ལྟར་ཁ་རས་མུ་མཐུད་གྱོན་རྒྱུ་དང་། དེ་བཞིན་ལག་པ་བཀྲུ་རྒྱུ། རྒྱང་ཐག་འཇོག་རྒྱུ། མི་མང་འདུ་འཛོམས་བྱེད་སར་འགྲོ་རྒྱུར་འཛེམས་རྒྱུ་གལ་ཆེ་ཞེས་ལམ་སྟོན་དང་སྦྲགས་འབོད་སྐུལ་ཞུས་གནང་སོང་།
དེ་རྗེས་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་བཙོན་འགྲུས་ལགས་ཀྱིས་ལམ་སྟོན་གནང་སྐབས་གསུང་དོན། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་གནས་སྟངས་བཟང་དུ་འགྲོ་བཞིན་ཡོད་པ་དང་། བདུན་ཕྲག་འདིའི་ནང་རྒྱ་གར་ནང་ཏོག་དབྱིབས་ནད་གཞི་ཕོག་མཁན་མི་གྲངས་༩༡༡༩ དང། རྒྱ་གར་ཡོངས་སུ་ད་བར་མི་གྲངས་བྱེ་བ་བརྒྱ་དང་ཉི་ཤུ་མ་ཟིན་ཙམ་ལ་སྔོན་འགོག་ཁབ་ཐོབ་ཡོད། ད་ལྟ་ཇར་མ་ནི་ནང་གནས་སྟངས་ཛ་དྲག་ཏུ་འགྲོ་བཞིན་ཡོད་པ་མ་ཟད། ད་བར་མི་འབུམ་གཅིག་ཙམ་འདས་གྲོངས་སུ་གྱུར་འདུག སྤྱིར་དེང་སང་སྒེར་གྱི་རང་དབང་ཐོག་ནས་ཏོག་དབྱིབས་གཉན་རིམས་སྔོན་འགོག་ཁབ་རྒྱག་གི་མིན་ཞེས་སྐད་འབོད་བྱེད་མཁན་འཛམ་གླིང་གང་སར་ཡོད། འོན་ཀྱང་དེ་དག་ལ་ང་ཚོས་གང་ཡང་བྱེད་ཐུབ་ཐབས་མེད།
ང་ཚོས་བྱེད་ཐུབ་པ་ནི་རང་ཉིད་གནས་ཡུལ་ལམ་གཞིས་ཆགས་ཁག་ཏུ་ནད་རྟགས་ཡོད་པ་རྣམས་ཟུར་བཀག་ཏུ་འཇོག་དགོས་པ་དང། དེ་ནས་རྟག་དཔྱད་བྱས་རྗེས་སྨན་བཅོས་བྱེད་ཐུབ་ན་དྲག་སྐྱེད་མྱུར་པོ་ཡོང་གི་ཡོད། དེ་ལྟར་བྱས་ན་མི་རེ་གཉིས་ལ་མ་གཏོགས་ནད་གཞི་འགོས་མེད་སྟབས་སྒོ་རྒྱ་བསྡམས་དགོས་དོན་ཆགས་ཀྱི་མེད། དེ་ལྟ་བས་ན། གཞིས་ཆགས་ཁག་ཏུ་གུང་སེང་ལ་འགྲོ་མཁན་དང་། སུད་ཚོང་ཚར་རྗེས་གཞིས་ཆགས་སུ་ལོག་སྐབས་ཟུར་བཀག་ཏུ་བཞུགས་རྒྱུ་གལ་ཆེན་པོ་ཆགས་ཀྱི་ཡོད་པས་ལམ་སྟོན་བཞིན་དེ་ལྟར་ལག་བསྟར་གནང་དགོས།
ད་ལྟའི་ཆར་ཨ་རི་ནང་གི་བོད་མི་གནས་ས་མངའ་སྡེ་འགའ་ཤས་ནང་དུ་ཏོག་དབྱིབས་ནད་ཡམས་འཕེལ་བཞིན་ཡོད་པ་དང་། དེའི་ཐད་སྨན་པ་རྣམས་ཀྱི་གསུངས་དོན་ལ་ནད་པ་ཕལ་ཆེ་བ་སྔོན་འགོག་ཁབ་མ་རྒྱག་མཁན་ཡིན་པར་གསུང་གི་ཡོད་དུས། སྔོན་འགོག་ཁབ་ཀྱིས་ཕན་ཀྱི་ཡོད་པ་གང་ལ་གང་འཚམ་གསལ་པོ་ཡིན། དེ་འདྲ་ཡིན་དུས། སྔོན་མ་ནས་ཞུས་པ་ལྟར་སྔོན་འགོག་ཁབ་བརྒྱབ་རྒྱུ་ཧ་ཅང་གལ་ཆེན་པོ་ཡིན། ད་ལྟ་ཡིན་ནའང་འཕྲོད་བསྟེན་སྨན་ཁང་ཁག་དང་བདེ་ལེགས་སྨན་ཁང་དུ་སྔོན་འགོག་ཁབ་རྒྱག་གི་ཡོད་པས་བོད་མི་ཁབ་བརྒྱབ་མེད་པ་ལྷག་ཡོད་ན་ཁབ་བརྒྱབ་རོགས་གནང་ཞེས་འབོད་སྐུལ་དང་སྦྲགས་ལམ་སྟོན་གནང་ཡོད་པ་བཅས།།
