༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༡༨ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༨༦ དེ་སྤེལ་ཡོད་པ་དང་། གསལ་བསྒྲགས་གནང་མཁན་སྨན་རྩིས་ཁང་གི་གསོ་རིག་སྨན་པ་ཚེ་རིང་མཚམས་གཅོད་ལགས་དང་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་རྣམ་གཉིས་ཡིན།
དེ་ཡང་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་གཅིག་ནང་རྒྱ་གར་དང་བལ་ཡུན་ནང་ཁྱོན་བསྡོམས་མི་གྲངས་༡༩༢ འགོག་དབྱེ་ཟུར་བཀག་ཐོག་བཞུགས་ཡོད་པ་དང་། རྒྱ་གར་དང་བལ་ཡུལ་ནང་གི་དབུས་དང་ས་གནས་ཁག་གི་བོད་མི་གྲངས་༧༠༦ ལ་ཏོག་དབྱིབས་གཉན་རིམས་ཡོད་མེད་བརྟག་དཔྱད་གནང་ཐུབ་ཡོད། ད་བར་རྒྱ་གར་ནང་གི་བོད་མི་གྲངས་༤༥༨༠༡ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་བརྒྱབ་ཡོད་པ་དང་། རྒྱ་གར་ནང་བོད་མི་གྲངས་༤༥༨༢ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཡོད། བལ་ཡུལ་ནང་བོད་མི་གྲངས་༦༩༨༠ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་བརྒྱབ་ཡོད་པ་དང་། བོད་མི་གྲངས་༤༨ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཡོད།
འདས་པའི་བདུན་ཕྲག་གཅིག་ནང་རྒྱ་བལ་གཉིས་ནང་སྐྱེས་པ་གྲངས་༡༧ དང་བུད་མེད་གྲངས་༢༧ ལ་ཏོག་དབྱིབས་གཉན་རིམས་ཕོག་ཡོད་པ་དང་། ཁྱོན་བསྡོམས་ཏོག་དབྱིབས་གཉན་རིམས་ཕོག་པ་མི་གྲངས་༤༤ བྱུང་ཡོད།འདས་པའི་བདུན་ཕྲག་གཅིག་ནང་ཏོག་དབྱིབས་གཉན་རིམས་ལ་བརྟེན་ནས་ལོ་ན་༧༨ ལ་སོན་པའི་བུད་མེད་བགྲེས་སོང་གཅིག་འདས་གྲོངས་སུ་གྱུར་ཡོད། ད་བར་རྒྱ་བལ་གཉིས་ནང་ཏོག་དབྱིབས་གཉན་རིམས་ཕོག་པ་ཁྱོན་བསྡོམས་མི་གྲངས་༦༨༥༩ བྱུང་ཡོད་པའི་ཁྲོད་ནས་མི་གྲངས་༦༦༢༣ དྲག་སྐྱེད་བྱུང་ཡོད་པ་དང་། མི་༡༥༨ འདས་གྲོངས་སུ་གྱུར་ཡོད།
ད་ལྟ་རྒྱ་བལ་གཉིས་ཀྱི་ནང་ཏོག་དབྱིབས་གཉན་རིམས་ཀྱིས་མནར་བཞིན་པ་མི་གྲངས་༧༨ ཡོད།ཅེས་སོགས་གསུངས་གྲུབ་མཚམས་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་ཀྱིས་གསུང་དོན། སྤྱིར་ཡུ་རོབ་ཁུལ་དུ་ཏོག་དབྱིབས་གཉན་རིམས་ཉུང་དུ་འགྲོ་བཞིན་ཡོད་ཀྱང་ཨུ་རུ་སུ་དང་་ལྷོ་ཀོ་རི་ཡ་ནང་ཏོག་དབྱིབས་གཉན་རིམས་འཕེལ་བཞིན་འདུག རྒྱ་གར་ནང་སློབ་གྲྭ་ཁག་འགོ་བཙུགས་ཡོད་སྟབས་དགེ་རྒན་ལས་སློབ་ཕྲུག་དང་ཕ་མ་ཡོངས་ནས་གང་ཐུབ་གཟབ་གཟབ་གནང་རོགས། མི་མང་འདུ་འཛོམས་ཡོད་སར་མ་ཕེབས་རོགས་ཞེས་ལམ་སྟོན་གནང་ཡོད་པ་བཅས།།
