༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༩ ནས་ ༡༡ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་གངས་སྐྱིད་སྲིད་སྐྱོང་ཚོགས་ཁང་དུ་རྒྱ་བལ་འབྲུག་གསུམ་དུ་གནས་པའི་བཙན་བྱོལ་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་བཞི་པ་དབུ་འཛུགས་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས། ནང་སྲིད་དྲུང་འཕར་ཟླ་བ་ཚུལ་ཁྲིམས་ལགས་དང་ཚེ་བརྟན་སྐལ་བཟང་ལགས།
གཞན་ཡང་ལྷོ་སྤྱི་དང་སིམ་སྤྱི། ལ་སྤྱི་བཅས་ཀྱིས་གཙོས་པའི་རྒྱ་བལ་འབྲུག་གསུམ་དུ་གནས་པའི་བཙན་བྱོལ་བོད་མིའི་ས་གནས་འགོ་འཛིན་རྣམ་པ་དང་། ནང་སྲིད་ལས་ཁུངས་ཀྱི་ལས་བྱེད། དེ་བཞིན་ཕྱི་ནང་གི་གསར་འགོད་པ་བཅས་ཁྱོན་མི་གྲངས་ ༧༠ ཙམ་ཚང་འཛོམས་ཀྱིས་ཐོག་མར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་སྣང་གསལ་མར་མེ་ཞལ་ཕྱེ་གནང་གྲུབ་མཚམས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེ་ལ་རྟེན་འབྱུང་མཇལ་དར་ཕུལ་ཡོད།
དེ་ནས་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་བོད་ཀྱི་བསྟན་སྲིད་མི་རིགས་ཀྱི་དོན་དུ་དུས་མིན་རྐྱེན་ལན་དུ་སོང་བ་དང་། རང་ལུས་མེར་སྲེག་གནང་མཁན་རྒྱལ་གཅེས་པ་རྣམས་ལ་གདུང་སེམས་མཉམ་སྐྱེ་མཚོན་ཆེད་སྐར་མ་གཅིག་རིང་མྱ་ངན་གུས་འདུད་ཞུས་གྲུབ་མཚམས་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་ཚོགས་འདུའི་ངོ་སྤྲོད་གསུང་བཤད་གནང་དོན། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་བཅུ་བཞི་པ་དེ་བཞིན་ཕྱི་ལོ་ ༢༠༢༡ ཟླ་ ༡༡ ཚེས་ ༩ ནས་ཕྱི་ཚེས་ ༡༡ བར་ཉིན་གྲངས་གསུམ་རིང་ཐུགས་གཏན་འཁེལ་བ་ལྟར་དེ་རིང་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་སྐུ་མགྲོན་གཙོ་བོར་ཆེད་ཕེབས་གནང་བར་ངས་ནང་སྲིད་ལས་ཁུངས་དང་འདིར་ཕེབས་པའི་ས་གནས་འགོ་འཛིན་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། དབུ་འབྱེད་མཛད་སྒོར་ཕེབས་མཁན་ཡོངས་ལའང་འཚམས་འདྲི་ཞུ་རྒྱུ་ཡིན།
འཛིན་སྐྱོང་ཚོགས་ཆེན་ཐེངས་བཅུ་བཞི་པ་བསྐོང་ཚོགས་དགོས་པའི་རྒྱུ་མཚན་དང་དམིགས་ཡུལ། རྒྱབ་ལྗོངས་ཀྱི་སྐོར་ཕྲན་བུ་ཞུ་རྒྱུ་ཡིན། རྩ་བའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་དེ་ཉིད་ལོ་རེ་མཚམས་ལ་ཚོགས་ཆེན་ཞིག་འཚོགས་དགོས་པའི་ཐུགས་གཏན་འཁེལ་བ་ལྟར་བསྐོང་ཚོགས་གནང་ཡོད། ས་གནས་འགོ་འཛིན་ནི་བོད་མིའི་སྒྲིག་འཛུགས་ཀྱི་སྲོག་རྩ་ལྟ་བུ་ཡིན་པར་བརྟེན་ཚོགས་ཆེན་དེའི་ཐོག་ནས་གྲུབ་འབྲས་བཟང་པོ་ཞིག་ཡོང་གི་ཡོད་སྟབས་ལོ་རེ་རེར་དུས་དང་སྟབས་བསྟུན་ནས་ཚོགས་ཆེན་འཚོགས་ཀྱི་ཡོད། སྔ་ལོར་ཕྱི་ལོ་ ༢༠༢༠ འདི་བཞིན་ཏོག་དབྱིབས་གཉན་རིམས་ཁྱབ་བརྡལ་ཤུགས་ཆེ་ཕྱིན་པའི་རྐྱེན་གྱིས་དྲ་ལམ་བརྒྱུད་ཉིན་གསུམ་རིང་ཚོགས་པའི་གྲོས་ཆོད་དེ་དག་དབུ་ས་གཉིས་ཐུན་མོང་ནས་ལག་བསྟར་ཞུས་དང་ཞུ་མུས་ཡིན། ནང་སྲིད་ཁྱབ་ཁོངས་ས་གནས་འགོ་འཛིན་ཁག་གྲངས་ ༤༤ ཡོད་པ་དེ་དག་ཁོངས་ནས་སྒང་ཏོག་ས་གནས་འགོ་འཛིན་ཕེབས་ཐུབ་མེད། ལ་སྤྱི་དང་བསུ་ན་མདའ་བཀྲ་ཤིས་གླིང་། འབུམ་ལ་བསྟན་འཛིན་སྒང་། སྦིར་སྡེ་དགེ་བཅས་ས་གནས་བཞིའི་སྐུ་ཚབ་ས་གནས་འགོ་འཛིན་དང་འདྲ་མཉམ་གྱི་ཐོག་ནས་མཉམ་ཞུགས་གནང་ཡོད། ཚོགས་ཆེན་དེ་ཉིད་གལ་ཆེན་པོ་ཆགས་ཀྱི་ཡོད། གང་ཡིན་ཟེར་ན་བཀའ་ཤག་སྐབས་ ༡༦ པ་ཐུགས་གཏན་འཁེལ་ནས་ཟླ་བ་ལྔའི་ནང་ཚུད་ཚོགས་ཆེན་ཚོགས་ཐུབ་པ་བྱུང་ཡོད། ཚོགས་ཆེན་ཐོག་བཀའ་ཤག་སྐབས་ ༡༦ པའི་དགོངས་པ་གཞིར་བཟུང་གྲོས་གཞི་དོན་ཚན་ ༡༢ མ་ལྷག་པའི་ཐོག་ནས་བཀའ་བསྡུར་གནང་དགོས་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། ཚོགས་ཆུང་ཆ་བགོས་བྱས་པའི་ཐོག་ནས་བཀའ་བསྡུར་གནང་རྒྱུ་ཡིན། དོན་ཚན་རེ་རེར་གནད་འགག་གཟིགས་ཏེ་བཀའ་བསྡུར་ལྷུག་པོ་གནང་རོགས་ཞེས་ཞུ་རྒྱུ་ཡིན།
ཐེངས་འདིར་དུས་ཚོད་ཐོག་ཏོག་ཙམ་འགྱུར་བ་ཕྱིན་ཡོད། སྤྱིར་ཉིན་གསུམ་གྱི་ནང་གྲོས་གཞི་དེའི་ཐོག་ལ་གོ་བསྡུར་དང་བཀའ་བསྡུར་གནང་གཏན་འཁེལ་ཡོད། འོན་ཀྱང་ཕྱི་ཚེས་ ༡༠ ཉིན་བདམས་ཐོན་བཀའ་བློན་གསུམ་གྱི་དམ་འབུལ་ཡིན་སྟབས་དུས་ཚོད་ཕྱིར་བཤོལ་གནང་ཡོད། དེ་རིང་ཚོགས་ཆེན་ཐོག་རྣམ་པ་ཚང་མ་ཚང་འཛོམས་བྱུང་ཐུབ་པར་དགའ་ཚོར་ཆེན་པོ་བྱུང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱིང་སྤེན་པ་ཚེ་རིང་མཆོག་ཐེངས་འདིའི་དབུ་འབྱེད་མཛད་སྒོར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། མཐའ་དོན་སྤྱི་ནོར་༸གོངས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་པ་དང་། དེ་བཞིན་བོད་མིའི་སྒྲིག་འཛུགས་ནས་བོད་མིའི་བདེ་དོན་སླད་ཕྱག་ལས་ཇི་ལྟར་གནང་རུང་ལམ་ལྷོངས་ཚད་ལྡན་ཡོང་བའི་སྨོན་འདུན་དང་། གཞིས་བྱེས་བོད་མི་མཉམ་འཛོམས་ཡོང་བའི་སྐལ་བཟང་གི་ཉི་མ་མགྱོགས་ནས་མྱུར་དུ་འཆར་བའི་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་བཅར་བ་ཡོངས་ལ་གསུང་བཤད་གནང་ཡོད། མཐར་ནང་སྲིད་དྲུང་འཕར་ཚེ་བརྟན་སྐལ་བཟང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཚོགས་འདུ་དབུ་འབྱེད་ཀྱི་ལས་རིམ་གྲོལ་ཡོད།
ཐེངས་འདིའི་གྲོས་གཞི་ཁག་གཤམ་གསལ།
༡། ཀ ས་གནས་འགོ་འཛིན་རྣམ་པས་ནང་སྲིད་ལས་ཁུངས་གཙོས་བོད་མིའི་སྒྲིག་འཛུགས་ལ་དུས་རྒྱུན་འགན་འཁུར་ཞུ་ཕྱོགས་དང་། དེ་མཚུངས་སོ་སོའི་ཁྱབ་ཁོངས་མང་ཚོགས་ལའང་འགན་འཁུར་ལན་འདེབས་ཞུ་ཕྱོགས།
༡། ཁ ས་གནས་འགོ་འཛིན་རྣམས་ནས་འབྲེལ་ཡོད་རྒྱ་གར་མངའ་གཞུང་གནད་ཡོད་མི་སྣ་ཁག་དང་ཡུལ་མི་བཅས་པར་འབྲེལ་ལམ་དམ་ཟབ་གནང་ཕྱོགས་བཅས་སྐོར།
༢། ས་གནས་འགོ་འཛིན་རྣམས་ནས་སོ་སོའི་ཁྱབ་ཁོངས་ས་ཆ་ཡོངས་རྫོགས་རྒྱུས་ལོན་ཐུབ་པ་གནང་བའི་ཐོག་སོ་སོའི་ཁྱབ་ཁོངས་གཞིས་ཆགས་ཀྱི་སྤྱི་ཡོངས་གནས་སྟངས་དང་མི་འབོར་སྐྱེས་འདས་སོགས་ཀྱི་གྲངས་མཛོད་ཚད་ལྡན་ཉར་ཚགས་དགོས་གལ་ལྟར་ཞུ་ཕྱོགས་སྐོར།
༣།ཀ བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་དང་འབྲེལ་བའི་དཀའ་ངལ་ཆེ་འཕྲད་རིགས་གང་དང་གང་ཡོད། དེ་དག་སེལ་ཕྱིར་ཐབས་ལམ་ཇི་ཡོད། དཔེར་ན་རྒྱ་གར་གཞུང་གི་བཀའ་འཁྲོལ་ཡོད་ན་ད་ལྟ་ས་ཆའི་བདག་དབང་སུར་ཡོད་པ་དེར་བདག་ཐོབ་བྱུང་ན་གནས་སྟངས་ཇི་ཆགས།
༣།ཁ བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་གཙོ་བོར་གྱུར་བའི་ཐོག་གཞན་སྒྲིག་གཞི་ཁག་ལ་བསྐྱར་བཅོས་དགོས་རིགས་ཇི་གཟིགས་ཐོག་དགོངས་ཚུལ།
༤ རྒྱ་བལ་འབྲུག་གསུམ་ནང་གི་བཙན་བྱོལ་བོད་མིའི་གཞིས་ཆགས་ཁག་སྲ་བརྟན་ཡོང་ཐབས་སུ་རྒྱུན་གནས་ཐུབ་ཅིང་ཡོང་འབབ་ལྡན་པའི་ཕུགས་འཕེར་ལས་གཞི་གང་དང་གང་གཟིགས་ཀྱི་ཡོད་མེད་དང་། ས་གནས་འགོ་འཛིན་ལས་ཁུངས་ཁག་རང་ཁ་རང་གསོ་ཐུབ་ཐབས་དང་ལས་ཁུངས་ཀྱི་རྒྱུན་གྲོན་ལ་ཕན་པའི་ལས་གཞི་གསར་རྩོམ་དགོས་རིགས་ཇི་གཟིགས་སྐོར།
༥ རྒྱ་གར་གཞུང་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ དངོས་སུ་ལག་བསྟར་སྐབས་དཀའ་ངལ་དངོས་འཕྲད་ཇི་མཆིས་དང་། དེ་དག་སེལ་སླད་ཐབས་ཤེས་གང་གཟིགས་ཀྱི་ཡོད་མེད།
༦། མ་འོངས་པར་བོད་མིའི་སྒྲིག་འཛུགས་ལས་ཁུངས་མ་ལག་དང་བཅས་པའི་ནང་འཛིན་སྐྱོང་གནང་ཕྱོགས་མཐའ་དག་ཤོག་བུའི་སྟེང་ནས་མིན་པར་དྲ་ཐོག་ནས་[e-governance/paperless] འཛིན་སྐྱོང་ལམ་སྲོལ་གསར་གཏོད་གནང་ཕྱོགས་དང་འབྲེལ་བའི་ཐོག་ལ་དགོངས་ཚུལ།
༦།ཁ བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཁག་གི་ནང་ཡིག་སྣོད་ཉར་ཚགས་ཚད་ལྡན་དང་གཅིག་མཚུངས་ Standardization of Filing System བཟོ་ཕྱོགས། དེ་འབྲེལ་ལས་བྱེད་ལ་དམིགས་བསལ་ཟབ་སྦྱོང་དང་མཐུན་འགྱུར་སྦྱོར་དགོས་རིགས་ཇི་མཆིས།
༧། རྒྱ་བལ་འབྲུག་གསུམ་ནང་གནས་འཁོད་ནང་སྲིད་ཁྱབ་ཁོངས་ས་གནས་འགོ་འཛིན་ལས་ཁུངས་ཀྱི་རང་ཁོངས་ལས་བྱེད་རྣམས་ཀྱི་བླང་དོར་དང་ཐོབ་ཐང་གི་སྒྲིག་གཞིའི་ཐོག་ལ་དཀའ་ངལ་ཇི་འཕྲད་དང་ཐབས་ལམ་ཇི་གཟིགས།
༨། རྒྱ་བལ་འབྲུག་གསུམ་ནང་གི་གཞིས་ཆགས་ཁག་དང་སློབ་གྲྭ་ཁག་གི་གནས་སྟངས་ཉམས་དམས་སུ་འགྲོ་གཞིའི་རྐྱེན་རྩ་གཙོ་བོ་གང་ལ་ཐུག་ཡོད་མེད་དང་། དེ་དག་ལ་གདོང་ལེན་བྱེད་ཕྱོགས། དེ་བཞིན་གཞིས་ཆགས་ཁག་དང་སློབ་གྲྭ་ཁག་ཟླ་སྒྲིལ་གཏོང་ཕྱོགས་དང་འབྲེལ་བའི་སྐོར།
༩།ཀ བཙན་བྱོལ་བོད་མི་སུད་ཚོང་བ་རྣམས་ལ་མ་འོངས་པར་དགུན་ཚོང་དང་འབྲེལ་བའི་དཀའ་ངལ་སེལ་ཐབས་སུ་ Shopping Complex སོགས་ཀྱི་མཐུན་འགྱུར་སྦྱར་ཐབས་ཇི་གཟིགས།
༩།ཁ གཞིས་ཆགས་སོ་སོའི་ནང་དཔལ་འབྱོར་འདུ་འགོད་ལས་གཞི་གསར་རྩོམ་དགོས་རིགས་ཇི་གཟིགས།
༡༠།ཀ གཞིས་ཆགས་སོ་སོའི་ནང་གཞུང་ཁོངས་དང་གཞུང་ཁོངས་མིན་པའི་རྒས་གསོ་ཁང་ཁྱོན་བསྡོམས་ཇི་བྱེད་དེ་དག་ལ་ས་གནས་འགོ་འཛིན་བརྒྱུད་ནང་སྲིད་ལས་ཁུངས་ནས་གཅིག་མཚུངས་ཀྱི་གཟིགས་རྟོག་གནང་ཕྱོགས།
༡༠།ཁ དེ་བཞིན་ས་གནས་འགོ་འཛིན་སོ་སོའི་ཁྱབ་ཁོངས་སུ་སེམས་ནད་བཅོས་ཁང་རིགས་ཡོད་མེད། ཡོད་ཚེ་གཟིགས་རྟོག་གནང་ཕྱོགས་སྐོར།
༡༠།ག འགོ་འཛིན་ལས་ཁུངས་སོ་སོའི་ཁྱབ་ཁོངས་སུ་གཏོགས་པའི་གཞོན་སྐྱེས་ལས་མེད་བར་ལྡིང་རིགས་ཡོད་མེད། ཡོད་ཚེ་དེ་དག་ལའང་དཀའ་སེལ་གཟིགས་རྟོག་གནང་ཕྱོགས།
༡༡། བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ས་མིག་གཏོད་ཕྱོགས་དང་ལས་བྱེད་བཀོད་སྒྲིག་གནང་སྟངས་ཐད་ལ་དགོངས་ཚུལ།
༡༢། ད་ལྟའི་ཆར་རང་རིགས་མང་ཚོགས་ཁྲོད་སྡོད་ཁང་མེད་པའི་དཀའ་ངལ་འཕྲད་བཞིན་པ་དང་། སྡོད་ཁང་ཞུ་མཁན་ཡང་གང་མཚམས་བྱུང་དང་འབྱུང་བཞིན་པར་སོང་། སྡོད་ཁང་དཀའ་སེལ་སླད་གཞིས་ཆགས་ཁག་སོ་སོའི་ནང་ས་ཁང་སྟོང་པ་ཡོད་མེད་ཀྱི་གནས་སྟངས་ཇི་ཡིན་དང་བགོ་སྤྲོད་གནང་ཕྱོགས་ཇི་དགེའི་སྐོར་བཀའ་བསྡུར་གནང་རྒྱུ་ཡིན་འདུག་པ་བཅས། །
